Pirei Herod Kaniset
Kobar Herod Jakobo, ak konam Petero korgoreet. Kibutun angeetap Kwandanyo sirimwek eng' kemout, ak koyatagei kurgeetinwek icheek koigeiin; kobwaat Petero kole keerei ng'ang'utyet. Eng' tuiyetap saaet, kimwachi lakwetap otwogik kole kagoamin iywek. Kome Herod, ne kikuure kole kamuktaindet.
12 1Eng' sait nooto ko ki nam Laitoryat Herod alage che po kaniset, komachei koyachi icheek ne ya. 2Ki bar Jakobo, tupchennyi Johana, eng' rotweet. 3Ye kingo keer Herod kole kocham Yahudik niito, kotestai konam Petero kora, eng' peetuusyegap magatiinik che ma kinde mermereek. 4Ki nam ineendet ak ki toorchi korgoreet, ak ki goochi kagilenwek ang'wan che tinyei murenigap lugeet ang'wan age tugul koriibei, komachei koimutu saang' koba ole mi piik yeityo paska.
5Ki kiger Petero korgoreet, ago ki saaei kaniset Kwandanyo eng' kimnateet agobo ineendet. 6Eng' kemounooto, kitom koimutu Herod ineendet, ki ru Petero kwenutap murenik aeng' che po lugeet, ko kirate eng' sirimwek aeng'; ak ki riibei asigarik che mi taitap kurgeet korgoreet. 7Kotuiyo angeetap Kwandanyo kotonone keetennyi, ak ki nyi lelutyeet koyooto. Ki bir sere Petero koing'eeti ineendet, koleenji, “Ng'eet kararan.” Ki ibutyo sirimwechooto eng' eunekyik. 8Ki leenji angeet, “Ilaachgei ak ilaach sandenguk.” Ki yai Petero ko uu nooto. Yeityo koleenji, “Ingurangei ngoroiguk ak isupwo.” 9Ki mong' Petero koosup, ago ma ki nai kole iman tuguuk che yaei angeet; ki bwaat kole keerei ng'ang'utyet. 10Ye kingo siir ribseetap tai ak ne po aeng', koit kurgeetap iron ne chorchini nganaseet, ne ki yaatei ineegei. Ki mong' ak ki wo ooreet agenge, ak kotuiyo komong' angeet eng' ineendet.
11Yeityo konai Petero eng' ineegei koleenji, “Nguno ko angen komyee iman: ki iyookto Kwandanyo angeennyi ak kosarwo eng' eunegap Herod ak eng' tuguuk tugul che ki bwaatei piigap Yahudik.” 12Ye kingo nai niito, ki wo kap Maria, kametap Johana ne kiguure kora Mareko, ole kiga koyumjigei che chaang' kosaaei. 13Ye kingo tuch Petero kurgeetap ormariichet, konyo tiibiit ne otwogin ne kiguure Rhoda kowol. 14Ye kingo inyit kutitap Petero, ki ibaibai miising' kot kolabat ko ama ki yaat kurgeet, ak komwa kole kotonone Petero saang'.
15Koleen, “Imong'ung' muguleldang'ung'.” Ago ki mwa ineendet eng' kimnateet kole iman. Ki le anyun, “Angeennyi.” 16Ago ki testai Petero kotuch, ak ye kingo yaat kurgeet ak koger ineendet, ki kwong'yo. 17Ki boorchi icheek eunnyi kole kosisye, ak ki ng'alaalji icheek ole ki imutyi Kwandanyo saang' eng' korgoreet. Koleenji, “Mwachi Jakobo ak che kitupche niito,” yeityo kwo olo age.
18Ye kingo eech, ki mi wasetapkei ne oo eng' murenigap lugeet agobo ole kigoek Petero. 19Ye kingo cheeng' Herod ineendet ama nyoor, koteebe asigarik che riibei, ak ki ng'at kobar icheek. Yeityo koba eng' Judea kwo Kaisarea komeny olooto.
Pirei Kwandanyo Herod
20Ki nereekyi Herod piigap Tyro ak Sidon. Ki pwo togeennyi ole mi ineendet, ak ye kingo kowelel Blasto, poisiindetap laitoryat, kosoom kaalyeet, amu ki punei emetap laitoryat amitwogik che amei emengwong'. 21Eng' peetuut ne ki kagoger, ki laach Herod ngoroik che po laitornatet, ak ki tebee kabungutyet, ak ki ng'alaalji icheek. 22Ak ki waach tuiyet koleen, “Kutitap Kamuktaindet niito, ma kutitap chiito!” 23Kotuiyo kobir ineendet angeetap Kwandanyo, amu ma ki goochi Kwandanyo kabelisyet, ak ki am ineendet kuutik ak kome.
24Ago ki testai ng'olyootap Kwandanyo koeet ak kochang'. 25Ki weektagei Barnaba ak Saulo eng' Jerusalem, ye kingo bata poisyekwak, koip togeennywa Johana, ne kiguure kora Mareko.