Otsak 10

10 ¹Caesareali Cornelius kaho mi akha leisai, ana Italy Shipai Ashang kaho shipai shākhawui akhavāna. ²A shitkasanga, ashi shimkhur katonga eina ithumwui Avāli ngachee, mibingli lemmet kachungkha mi, kala atam kachida ithumwui Avāli seihā sāchinga. ³Pung kachiko atamli, ithumwui Avāwui kazingrao akha awuili rāda, "Cornelius" da kahāng chi ana khamahā akhali tharlak eina thei. ^a a v3 Pung kachiko atam hi Jihudibingwui seihā sāwui atam ngarān kahai akha sai.

⁴Ali yangtitta, ngacheenāhaida, ana hānga, "Amei, khikhala?" Kazingrao china ngahānkai, "Nawui seihā kasā kala kachāmabingli mi lemmet hi ithumwui Avā mangāli phaningung khavai kāshunghaira."

⁵Ara Joppali mibing chihovāda Peter kaho Simonli khuirālu. ⁶Ana yireiwui shakhali kapam sāhui khamathena Simon kaho mi akhawui shimli pamsanghaida lei.

⁷Awuili khangazeka kazingrao chi thuikahai eina, Corneliusna ashi shimkhurwui rao khani kala awui otram khangatha̱ raobingwui ngachaili shitkasanga raimi akhali ahokhuilaga, ⁸athumli ot saikora hāngchitheilaga Joppali chihovai.

Avāna Peterwui alung rak ngasaka

⁹Akhama kathā, athum zatlakha keinung vānganaiuda, pung katharuka atam katā tharan, Peterna seihā sā khavai shimtungli kāhaowa. ¹⁰Ana thaihaoda kazā ngaiya, kha athumna kashakazā ngarān sāda leilakha, awuili mahākhami akha rāza̱haira, ¹¹kala kazingram shokahai kala kachon kahaka hakva akha chonmarei matili singlaga ngaleili chihokatā chi ana thei. ¹²Chi alungli aphei mati kakā sāyur saikora, ngaleiwui phara̱-pharā kala masiwui vānaoyur zangsera.

¹³Kala akhon akha awuili rāhānga: "Peter, ngakarthuilu; shaothatlaga shailu." ^b b v13 Akhon hi kathiwui eina ringshok kahai Jishuna. Verse 15li, chi akhon kachāna "ithumwui Avā"na kathar sāhai chi pongli hānga, chithāda Avā chi a khalatta eina khangatei akha da chitheimi.

¹⁴Kha Peterna hānga, "Maningphutmana, Proho; kaja ina makathar lah khamakhao ot akhala mashailak maleimana."

¹⁵Chi akhon china awuili latluida, kakhane shida, rāhānga: "Ina kathar sāhai chi, na makathar da mahomilu."

¹⁶Hithada kathum shida shokkahailaga hengsāda kachon chi kazingram khuikāluihaowa.

¹⁷Peterna mahākhami chiwui kakhalat khikhala da ning pa̱ngapālakha, yanglu, Corneliusna chihovā kahai mibing china Simonwui shim shongfa ngahānlaga, ngavei zangkhavaili nganinga, ¹⁸kala khangakaoda, Peter kaho Simon apam chili ngayā ngasāda leiakha jiakha da ngahānna.

¹⁹Peterna mahākhami chi thoukai tharan, Manglā Katharana ali hānga, "Mi kathumna nali phāda lei. ²⁰Ngakarthuida tunglu, kala ngachāng maleila athumli ngasoda vālu, kaja ina athumli chihovāhaira."

²¹Peterna mibing chili tunglaga hānga, "Nathumna kaphāda khalei mipa chi I hina. Khisāda nathum kharākhala?"

²²Athumna hānga, "Shipai akhavā, mashungrik kala ithumwui Avāli khangachee, Jihudi yur katonga eina solaka Corneliusli kazingrao katharana nali awui shimli hokhuida nawui kahāng shākhavai hāngchitheihaira." ²³Chieina ana athumli hozangda ngasāmkhui ngasaka. Akhama kathā ana athumli ngasoda zatphoka, kala Joppawui avānao kaikhana ngasovai.

²⁴Akhama kathā ana Caesareali vāzanga. Corneliusna athumli ngachonmida, awui theisābing kala ngahānkhangai ngasotnaobingli kazipkhuisai. ²⁵Peter vāzang tharan, Corneliusna ali samphanga kala awui pheizingli ngakhumshamda ali khoruma. ²⁶Kha Peterna ali khāngkaida hānga, "Nganingthotlu! I tākam eina mi akhamānga." ²⁷Corneliusli chān ngazekta, Peterna azangda mi kachungkha kazipa chi thei. ²⁸Ana athumli hānga, "Jihudi mi akhana yur khangateiwui mili ngaso lah vāyang khavai masakhangayi kaji chi nathum khalatta thei. Kha ithumwui Avāna ili mi khipānakha khamakhao lah makathar da mahopaimana kaji chitheimi. ²⁹Chiwui vang eina ili hokkahai tharan I ngakaikashi maleila rāhaira. Ara, khisāda nathumna ili hokvāhaikhala?"

³⁰Corneliusna hānga, "Zimiksho mati katā, pung kachiko hi atamli, ina ishimli seihā sāda leilakha, kashuirak eina kachon kahorda shankhavai mi akha iwui mangāli nganinga, ³¹kala hānga, 'Cornelius, nawui seihā kasā shāmihaira kala kachāmabingli nawui khamila ithumwui Avāwui mangāli phaningungsera. ³²Chiwui vang eina Joppali mi chihovāda Peter kaho Simonli hokhuilu. A yireiwui shakhali sāhui khamathena Simonwui shimli pamda lei.' ³³Chiwui vang eina ina chichangli nali hokvāhaira, kala na rāhaira chi kaphā sai. Ara Prohona nali kaso kahai saikora shākhavai, ithum saikora hili Varewui mangāli leihaira."

³⁴Peterna hāngphoka, "Ithumwui Avā mijang mavaimana kaji chi I kachangkhat eina thei, ³⁵Kha yur saikorali ali khangachee kala khamashung khangarong kasā mi chi awuina khuisangmira. ³⁶Jishu Khristawui mangā eina chingri kahaiwui paokaphā hāshokta ana Israelnaobingli awui tui chihovai; a hi saikorawui Prohona. ^c c v36 Peterna Jishuli "saikorawui Proho" da hoi—ringkashoka Anaomayarana yur kachiva̱wuitungli munga, chiwui vang eina ara paokaphā chi Gentilebingli ungshunga. ³⁷Johnna pao hāshok ra̱kahikwui thili, Galilee eina thuida Judea ngalei katongali shokkahai chi nathum khalattana theihaira: ³⁸ithumwui Avāna Nazarethwui Jishuli Manglā Kathara kala pangshap eina neomihaira, kala ana kaphā ot sāda zatmamānda chipeena rekhareka mi saikorali raimi; kaja ithumwui Avāna ali ngasomisai. ^d d v38 Hili mipā kathum saikora ngasoda phongkharā: ithumwui Avāna Anaomayara Jishuli Manglā Kathara kala pangshap eina neomi. ³⁹Jihudibingwui ngaleili kala Jerusalemli ana sā saikorawui ithum shākhina. Athumna ali thingtungli shaoshanda sāthathaowa, ⁴⁰Kha ithumwui Avāna ali kakathumathang ringshok ngasaka kala ali chitheimi, ⁴¹mi saikorali maningla kha ana kathiwui eina ringshok kahaiwui thili awuili ngasoda phāshak phāzai kahai, ithumwui Avāna rida kapangkhui shākhibing ithumli chitheimi. ⁴²Ana ithumli mibingli pao hāshok kala shākhi sā khavai kasoi: ithumwui Avāna ali kharingabing kala thikahaibingli bichar sāngasaka. ⁴³Ali shitkasanga mi kachiva̱na awui ming singda morei pheomi samphangra da marānbing saikorana awui pongli shākhi mi."

⁴⁴Peterna tuibing hi lāngda hānglakha, tui shākahai saikorawuitungli Manglā Kathara chi tāshunga. ⁴⁵Peter eina ngasoda rā ahui rimshok shitkasangbing china, Manglā Katharawui lemmet chi Gentilebingwuitunglila heirormi kaji matakhakhai. ⁴⁶Kaja athumna Gentilebing tuiyur khamatuida ithumwui Avāli masot chikatlakha shai. Chieina Peterna hānga,

⁴⁷"Ithum thada Manglā Kathara samkaphang mipā hibingli ra̱hikmi khavai, khipānakha tara̱ machihola paira̱khala?" ⁴⁸Ana athumli Jishu Khristawui mingli ra̱hikmi khavai kasoi. Chieina athumna ali zimiksho sha̱rākhathang pamsang khavai poi.