ሐዋርያት ሥራ 10

10 ¹በቂሳርያ ቆርኔሌዎስ የሚባል ሰው ነበረ፤ የኢጣሊያ ጭፍራ በተባለው ውስጥ የመቶ አለቃ ነበር። ²እርሱም ደግ ሰው ነበር፤ ከቤተ ሰዎቹ ሁሉ ጋራ አባታችንን ይፈራ ነበር፤ ለሕዝቡም ብዙ ምጽዋት ይሰጥ ነበር፤ ሁልጊዜም ወደ አባታችን ይጸልይ ነበር። ³ከቀኑ ዘጠኝ ሰዓት ገደማ የአባታችን መልአክ ወደ እርሱ መጥቶ፣ “ቆርኔሌዎስ” ሲለው በራእይ በግልጥ አየ። ^a a v3 ዘጠነኛው ሰዓት ከቀኑ ዘጠኝ ሰዓት ገደማ ነበር፤ ከአይሁድ የተወሰኑ የጸሎት ጊዜያት አንዱ ነበር።

⁴ፈርቶም ትኵር ብሎ እየተመለከተው፣ “ጌታ ሆይ፣ ምንድን ነው?” አለ። መልአኩም፣ “ጸሎትህና ለድኆች የሰጠኸው ምጽዋት በአባታችን ፊት መታሰቢያ ሆኖ ዐርጓል” ሲል መለሰለት።

⁵አሁንም ሰዎችን ወደ ኢዮጴ ልከህ ጴጥሮስ የሚባለውን ስምዖንን አስመጣ። ⁶እርሱም ቤቱ በባሕር ዳር ባለው ስምዖን በተባለ ቍርበት ፋቂ ዘንድ እንግድነት ተቀምጧል።

⁷ያነጋገረው መልአክ በሄደ ጊዜ፣ ቆርኔሌዎስ ከቤተ ሰዎቹ ሁለት አገልጋዮችንና ሁልጊዜ ከሚያገለግሉት መካከል አንድ ፈሪሃ አምላክ ያለው ወታደርን ጠራ፤ ⁸ሁሉንም ነገር ነግሯቸው ወደ ኢዮጴ ላካቸው።

አባታችን የጴጥሮስን ልብ ይከፍታል

⁹በማግስቱም እነርሱ ሲጓዙና ወደ ከተማዪቱ ሲቀርቡ፣ ጴጥሮስ በስድስት ሰዓት ገደማ ሊጸልይ ወደ ሰገነት ወጣ። ¹⁰ተርቦም ሊበላ ፈለገ፤ ነገር ግን ምግብ ሲያዘጋጁ ድንዛዜ መጣበት፤ ¹¹ሰማይም ተከፍቶ አንድ ትልቅ ሸማ የሚመስል ነገር በአራት ማዕዘኑ ተይዞ ወደ ምድር ሲወርድ አየ። ¹²በውስጡም ባለ አራት እግር እንስሳት ሁሉ፣ የምድር የሚሳቡ ፍጥረታትና የሰማይ ወፎች ነበሩበት።

¹³ድምፅም መጣለት፤ “ጴጥሮስ ሆይ፣ ተነሥተህ ዐርደህ ብላ።” ^b b v13 ድምፁ የተነሣው ኢየሱስ ነው፤ በቍጥር 15 ያው ድምፅ “አባታችን” ስላነጻው ነገር ይናገራል፤ አብን ከራሱ ለይቶ ይጠራል።

¹⁴ጴጥሮስ ግን፣ “ጌታ ሆይ፣ ከቶ አይሆንም፤ የረከሰ ወይም ርኩስ ነገር ከቶ በልቼ አላውቅምና” አለ።

¹⁵ድምፁም ዳግመኛ ለሁለተኛ ጊዜ መጣለት፤ “እኔ ያነጻሁትን አንተ የረከሰ አትበለው።”

¹⁶ይህም ሦስት ጊዜ ሆነ፤ ወዲያውም ሸማው ወደ ሰማይ ተነሣ።

¹⁷ጴጥሮስም ያየው ራእይ ምን ማለት እንደ ሆነ ሲያስብ ግራ በተጋባ ጊዜ፣ እነሆ ቆርኔሌዎስ የላካቸው ሰዎች የስምዖንን ቤት እየጠየቁ መጥተው በደጁ ላይ ቆሙ፤ ¹⁸ጴጥሮስ የሚባለው ስምዖን በዚያ እንግድነት ተቀምጦ እንደ ሆነ ጮኸው ጠየቁ።

¹⁹ጴጥሮስም ስለ ራእዩ ሲያስብ፣ መንፈስ ቅዱስ፣ “እነሆ፣ ሦስት ሰዎች ይፈልጉሃል። ²⁰ተነሥተህ ውረድ፤ እኔ ልኬአቸዋለሁና ሳትጠራጠር ከእነርሱ ጋራ ሂድ” አለው።

²¹ጴጥሮስም ወደ ሰዎቹ ወርዶ፣ “እነሆ የምትፈልጉት እኔ ነኝ፤ ለምን መጣችሁ?” አለ።

²²እነርሱም፣ “ጻድቅ የሆነ፣ አባታችንን የሚፈራና በአይሁድ ሕዝብ ሁሉ ዘንድ የተከበረ የመቶ አለቃ ቆርኔሌዎስ፣ ወደ ቤቱ አስጠርቶህ የምትለውን ነገር እንዲሰማ በቅዱስ መልአክ ተነገረው” አሉ። ²³ስለዚህ ወደ ውስጥ አስገብቶ እንግዳ ተቀበላቸው። በማግስቱም ተነሥቶ ከእነርሱ ጋራ ሄደ፤ ከኢዮጴም አንዳንድ ወንድሞች አብረውት ሄዱ።

²⁴በሚቀጥለው ቀንም ወደ ቂሳርያ ገባ። ቆርኔሌዎስም ይጠብቃቸው ነበር፤ ዘመዶቹንና የቅርብ ወዳጆቹን ሰብስቦ ነበር። ²⁵ጴጥሮስም በገባ ጊዜ ቆርኔሌዎስ ተቀብሎት በእግሩ ላይ ተደፍቶ ሰገደለት። ²⁶ጴጥሮስ ግን፣ “ተነሥ፤ እኔም ሰው ነኝ” ብሎ አስነሣው። ²⁷ከእርሱም ጋራ እየተነጋገረ ወደ ውስጥ ገብቶ ብዙ ሰዎች ተሰብስበው አገኘ። ²⁸እነርሱንም፣ “አይሁዳዊ ከሌላ ወገን ሰው ጋራ መተባበር ወይም እርሱን መጠየቅ እንደማይፈቀድለት እናንተው ታውቃላችሁ፤ ነገር ግን ማንንም ሰው ርኩስ ወይም የረከሰ እንዳልል አባታችን አሳየኝ። ²⁹ስለዚህም በተጠራሁ ጊዜ ሳልቃወም መጣሁ፤ እንግዲህ ለምን እንደ ጠራችሁኝ ንገሩኝ” አለ።

³⁰ቆርኔሌዎስም፣ “ከአራት ቀን በፊት በዚህ ሰዓት፣ ከቀኑ ዘጠኝ ሰዓት፣ በቤቴ ስጸልይ ነበር፤ እነሆም የሚያበራ ልብስ የለበሰ ሰው በፊቴ ቆመ፤ ³¹እንዲህም አለ፤ ‘ቆርኔሌዎስ ሆይ፣ ጸሎትህ ተሰምቷል፤ ለድኆችም የሰጠኸው ምጽዋት በአባታችን ፊት ታስቧል። ³²ስለዚህ ወደ ኢዮጴ ልከህ ጴጥሮስ የሚባለውን ስምዖንን አስጠራ፤ እርሱም በባሕር ዳር ባለው በቍርበት ፋቂው በስምዖን ቤት ተቀምጧል።’ ³³ስለዚህ ወዲያውኑ ወደ አንተ ላክሁ፤ አንተም በመምጣትህ መልካም አደረግህ። አሁንም ጌታ ያዘዘህን ሁሉ ለመስማት ሁላችን በእግዚአብሔር ፊት እዚህ ተገኝተናል” አለ።

³⁴ጴጥሮስም አፉን ከፍቶ እንዲህ አለ፤ “አባታችን ለሰው ፊት እንደማያዳላ በእውነት አስተውያለሁ፤ ³⁵ነገር ግን በሕዝብ ሁሉ መካከል የሚፈራውና ጽድቅን የሚያደርግ ሁሉ በእርሱ ዘንድ የተወደደ ነው። ³⁶በኢየሱስ ክርስቶስ በኩል የሰላምን ወንጌል እየሰበከ ቃሉን ወደ እስራኤል ልጆች ላከ፤ እርሱም የሁሉ ጌታ ነው። ^c c v36 ጴጥሮስ ኢየሱስን “የሁሉ ጌታ” ብሎ ጠራው፤ የተነሣው ወልድ በሕዝብ ሁሉ ላይ ይነግሣል፤ ስለዚህም ወንጌል አሁን ወደ አሕዛብ ይደርሳል። ³⁷ዮሐንስ ከሰበከው ጥምቀት በኋላ ከገሊላ ጀምሮ በይሁዳ ሁሉ የሆነውን ነገር እናንተው ታውቃላችሁ፤ ³⁸አባታችን የናዝሬቱን ኢየሱስን በመንፈስ ቅዱስና በኀይል እንደ ቀባው፣ እርሱም መልካም እያደረገ በዲያብሎስ የተጨነቁትን ሁሉ እየፈወሰ እንደ ዞረ ታውቃላችሁ፤ አባታችን ከእርሱ ጋራ ነበርና። ^d d v38 እዚህ ላይ ሦስቱም አካላት አብረው ይታያሉ፤ አባታችን ልጁን ኢየሱስን በመንፈስ ቅዱስና በኀይል ይቀባዋል። ³⁹እኛም በአይሁድ አገርና በኢየሩሳሌም ያደረገውን ሁሉ ምስክሮች ነን፤ በእንጨት ላይ ሰቅለው ገደሉት። ⁴⁰አባታችን ግን በሦስተኛው ቀን አስነሥቶ እንዲገለጥ አደረገ፤ ⁴¹ለሕዝቡ ሁሉ ሳይሆን አባታችን አስቀድሞ ለመረጠን ምስክሮች ለእኛ ተገለጠ፤ እኛም ከሙታን ከተነሣ በኋላ ከእርሱ ጋራ በላንና ጠጣን። ⁴²እርሱም ለሕዝቡ እንድንሰብክና አባታችን በሕያዋንና በሙታን ላይ ፈራጅ አድርጎ እንደ ሾመው እንድንመሰክር አዘዘን። ⁴³በእርሱ የሚያምን ሁሉ በስሙ የኀጢአትን ይቅርታ እንዲቀበል ነቢያት ሁሉ ስለ እርሱ ይመሰክራሉ” አለ።

⁴⁴ጴጥሮስም ይህን ነገር ገና ሲናገር፣ ቃሉን በሚሰሙ ሁሉ ላይ መንፈስ ቅዱስ ወረደ። ⁴⁵ከጴጥሮስ ጋራ የመጡ ከተገረዙት ወገን የሆኑ ምእመናን የመንፈስ ቅዱስ ስጦታ በአሕዛብ ላይ ደግሞ ስለ ፈሰሰ ተደነቁ። ⁴⁶በልሳኖች ሲናገሩና አባታችንን ሲያከብሩ ሰምተዋቸዋልና። ያን ጊዜም ጴጥሮስ እንዲህ አለ፤

⁴⁷“እንደ እኛ መንፈስ ቅዱስን የተቀበሉትን እነዚህን ሰዎች እንዳይጠመቁ ውሃ ሊከለክላቸው የሚችል ማን ነው?” ⁴⁸በኢየሱስ ክርስቶስም ስም እንዲጠመቁ አዘዘ። ከዚያም ጥቂት ቀን እንዲቀመጥ ለመኑት።