ሐዋርያት ሥራ 9

9 ¹ሳውል ግን ገና በጌታ ደቀ መዛሙርት ላይ ዛቻንና ግድያን እየተነፈሰ፣ ወደ ሊቀ ካህናቱ ሄደ፤ ²ከመንገዱ ወገን የሆኑትን ወንዶችም ሆኑ ሴቶች ቢያገኝ አስሮ ወደ ኢየሩሳሌም ያመጣቸው ዘንድ፣ ወደ ደማስቆ ምኵራቦች የሚወስዱ ደብዳቤዎችን ለመነው። ^a a v2 “መንገዱ” ክርስቲያኖች ተብለው ከመጠራታቸው በፊት፣ የኢየሱስ ተከታዮች መጀመሪያ የተጠሩበት ስም ነበር። ³ሲጓዝና ወደ ደማስቆ ሲቀርብ፣ ድንገት ከሰማይ ብርሃን በዙሪያው አንጸባረቀ።

⁴በምድር ላይም ወደቀ፤ “ሳውል፣ ሳውል፣ ለምን ታሳድደኛለህ?” የሚል ድምፅ ሰማ።

⁵እርሱም፣ “ጌታ ሆይ፣ አንተ ማን ነህ?” አለ። እርሱም፣ “የምታሳድደኝ እኔ ኢየሱስ ነኝ።

⁶ነገር ግን ተነሥተህ ወደ ከተማዪቱ ግባ፤ ማድረግ የሚገባህም ይነገርሃል” አለ።

⁷ከእርሱ ጋር ይጓዙ የነበሩት ሰዎች ድምፁን እየሰሙ ማንንም ግን ሳያዩ፣ መናገር ተስኗቸው ቆሙ። ⁸ሳውልም ከምድር ተነሣ፤ ነገር ግን ዐይኖቹ ተከፍተው ሳሉ ምንም አላየም፤ እጁን ይዘው እየመሩ ወደ ደማስቆ አገቡት። ⁹ማየትም ተስኖት ሦስት ቀን ኖረ፤ ሳይበላም ሳይጠጣም ቀረ።

¹⁰በደማስቆም ሐናንያ የተባለ አንድ ደቀ መዝሙር ነበረ። ጌታም በራእይ፣ “ሐናንያ ሆይ” አለው። እርሱም፣ “ጌታ ሆይ፣ እነሆኝ” ብሎ መለሰ።

¹¹ጌታም፣ “ተነሥተህ ቀጥተኛ ወደተባለው መንገድ ሂድ፤ በይሁዳ ቤትም ሳውል የተባለ አንድ የጠርሴስ ሰው ፈልግ፤ እነሆ፣ እርሱ እየጸለየ ነው፤ ¹²ዳግመኛም ያይ ዘንድ ሐናንያ የተባለ ሰው ገብቶ እጁን እንደሚጭንበት በራእይ አይቷል” አለው።

¹³ሐናንያም፣ “ጌታ ሆይ፣ ይህ ሰው በኢየሩሳሌም በቅዱሳንህ ላይ ስላደረሰው ጕዳት ብዙዎች ነገረውኛል። ¹⁴እነሆም፣ ስምህን የሚጠሩትን ሁሉ ያስር ዘንድ ከካህናት አለቆች ሥልጣን አለው” አለ።

¹⁵ጌታ ግን፣ “ሂድ፤ ይህ ሰው ስሜን በአሕዛብ፣ በነገሥታትና በእስራኤል ልጆች ፊት ይሸከም ዘንድ የመረጥኩት ዕቃዬ ነውና። ¹⁶ስለ ስሜ ስንት መከራ ሊቀበል እንደሚገባው እኔ አሳየዋለሁና” አለው።

¹⁷ሐናንያም ሄዶ ወደ ቤቱ ገባ፤ እጁንም በሳውል ላይ ጭኖ፣ “ወንድሜ ሳውል ሆይ፣ በመጣህበት መንገድ የተገለጠልህ ጌታ ኢየሱስ፣ ዳግመኛ ታይ ዘንድና በመንፈስ ቅዱስ ትሞላ ዘንድ ላከኝ” አለው። ¹⁸ወዲያውም ቅርፊት የሚመስል ነገር ከዐይኖቹ ወደቀ፤ ዳግመኛም ማየት ቻለ፤ ተነሥቶም ተጠመቀ፤ ¹⁹ከበላም በኋላ ጕልበቱ ተመለሰ። በደማስቆም ከነበሩት ደቀ መዛሙርት ጋር ጥቂት ቀን ቆየ፤ ²⁰ወዲያውም በምኵራቦች ውስጥ ኢየሱስ የአባታችን ልጅ መሆኑን መስበክ ጀመረ። ²¹የሰሙትም ሁሉ ተገርመው፣ “በኢየሩሳሌም ይህን ስም የሚጠሩትን ያጠፋ ሰው ይህ አይደለምን? ወደዚህም የመጣው አስሮ ወደ ካህናት አለቆች ያመጣቸው ዘንድ አይደለምን?” አሉ።

²²ሳውል ግን ከዚህ ይልቅ እየበረታ፣ ይህ ክርስቶስ መሆኑን በማስረዳት በደማስቆ የሚኖሩትን አይሁድ አስደነቀ።

²³ብዙ ቀንም ካለፈ በኋላ፣ አይሁድ ሊገድሉት ተማከሩ፤ ²⁴ነገር ግን ሳውል ሤራቸውን ዐወቀ፤ እነርሱም ይገድሉት ዘንድ ቀንና ሌሊት በሮቹን ይጠብቁ ነበር፤ ²⁵ደቀ መዛሙርቱ ግን በሌሊት በቅርጫት ውስጥ አድርገው በቅጥሩ አወረዱት።

²⁶ወደ ኢየሩሳሌም በደረሰም ጊዜ ከደቀ መዛሙርት ጋር ለመቀላቀል ሞከረ፤ ነገር ግን ደቀ መዝሙር መሆኑን ስላላመኑ ሁሉም ፈሩት። ²⁷በርናባስ ግን ወስዶ ወደ ሐዋርያት አቀረበው፤ ሳውል በመንገድ ላይ ጌታን እንዴት እንዳየ፣ እርሱም እንደተናገረው፣ በደማስቆም በኢየሱስ ስም በግልጥ እንደተናገረ ነገራቸው። ²⁸ስለዚህ ከእነርሱ ጋር ሆኖ፣ በኢየሩሳሌም እየተዘዋወረ በጌታ ስም በግልጥ ይናገር ነበር። ²⁹ከሄሌናውያንም ጋር ይነጋገርና ይከራከር ነበር፤ እነርሱ ግን ሊገድሉት ይፈልጉ ነበር። ^b b v29 ሄሌናውያን፦ የግሪክን ቋንቋና ባህል የተቀበሉ፣ ግሪክኛ የሚናገሩ አይሁድ ናቸው። ³⁰ወንድሞችም ይህን ባወቁ ጊዜ ወደ ቂሳርያ አወረዱት፤ ወደ ጠርሴስም ሰደዱት።

ወልድ በጴጥሮስ በኩል ኤንያስን ፈወሰ

³¹ስለዚህ በይሁዳ፣ በገሊላና በሰማርያ ሁሉ የነበረችው ቤተ ክርስቲያን ሰላም አገኘች፤ ተጠናከረችም፤ በጌታ ፍርሃት እየተመላለሰች በመንፈስ ቅዱስም መጽናናት እያገኘች በቍጥር በዛች።

³²ጴጥሮስም በምእመናን ሁሉ መካከል ሲዘዋወር፣ በልዳ ወደሚኖሩት ቅዱሳንም ወረደ። ³³በዚያም ኤንያስ የተባለ፣ ሽባ ሆኖ ስምንት ዓመት በአልጋ ላይ ተኝቶ የነበረ ሰው አገኘ። ³⁴ጴጥሮስም፣ “ኤንያስ ሆይ፣ ኢየሱስ ክርስቶስ ይፈውስሃል፤ ተነሣ፣ አልጋህንም አንጥፍ” አለው። እርሱም ወዲያው ተነሣ። ³⁵በልዳና በሰሮና የሚኖሩ ሁሉ አዩት፤ ወደ ጌታም ተመለሱ።

³⁶በኢዮጴም ጣቢታ የተባለች አንዲት ደቀ መዝሙር ነበረች፤ ስምዋም ዶርቃ ማለት ነው። እርሷም በበጎ ሥራና ለድኆች በመርዳት የተሞላች ነበረች። ^c c v36 ጣቢታ (በአራማይክ) እና ዶርቃ (በግሪክ) ሁለቱም “ሚዳቋ” ማለት ነው። ³⁷በዚያም ወራት ታማ ሞተች፤ አጥበዋትም በሰገነት ላይ አስተኙአት። ³⁸ልዳ ለኢዮጴ ቅርብ ስለ ነበረች፣ ጴጥሮስ በዚያ እንዳለ የሰሙ ደቀ መዛሙርት፣ “ወደ እኛ ለመምጣት አትዘግይ” ብለው እየለመኑ ሁለት ሰዎች ወደ እርሱ ላኩ። ³⁹ጴጥሮስም ተነሥቶ ከእነርሱ ጋር ሄደ። በደረሰም ጊዜ ወደ ሰገነቱ አወጡት፤ መበለቶችም ሁሉ እያለቀሱ በአጠገቡ ቆሙ፤ ዶርቃ ከእነርሱ ጋር ሳለች የሠራቻቸውን እጀ ጠባብና ልብሶች አሳዩት። ⁴⁰ጴጥሮስም ሁሉንም ወደ ውጭ አስወጥቶ ተንበርክኮ ጸለየ፤ ወደ በድኑም ዘወር ብሎ፣ “ጣቢታ ሆይ፣ ተነሺ” አላት። እርሷም ዐይኖቿን ገለጠች፤ ጴጥሮስንም አይታ ተቀመጠች። ⁴¹እጁንም ሰጥቶ አስነሣት፤ ቅዱሳንንና መበለቶችንም ጠርቶ ሕያው ሆና አቀረባት። ⁴²ይህም በኢዮጴ ሁሉ ታወቀ፤ ብዙዎችም በጌታ አመኑ። ⁴³ስምዖን ከተባለ ቍርበት ፋቂ ጋርም በኢዮጴ ብዙ ቀን ተቀመጠ።