Matendo ya Mitume 9

9 ¹Lakini Sauli, akiendelea kupumua vitisho na mauaji juu ya wanafunzi wa Bwana, akaenda kwa kuhani mkuu, ²akamwomba barua za kwenda kwa masinagogi ya Dameski, ili kwamba akiwakuta wo wote wa Njia ile, waume kwa wake, awalete Yerusalemu wamefungwa. ^a a v2 "Njia" lilikuwa jina la kwanza kabisa la wafuasi wa Yesu, kabla hawajaitwa Wakristo. ³Alipokuwa akisafiri na kukaribia Dameski, ghafula nuru kutoka mbinguni ikamwangaza pande zote.

⁴Akaanguka chini, akasikia sauti ikimwambia, "Sauli, Sauli, mbona unanitesa?"

⁵Akasema, "U nani wewe, Bwana?" Naye akasema, "Mimi ni Yesu, ambaye wewe unanitesa.

⁶Lakini inuka uingie mjini, nawe utaambiwa yale yakupasayo kutenda."

⁷Wale watu waliokuwa wakisafiri pamoja naye wakasimama bila kusema neno, wakiisikia sauti lakini hawakumwona mtu. ⁸Sauli akainuka kutoka chini, lakini alipofumbua macho hakuona kitu; wakamshika mkono, wakamwongoza mpaka Dameski. ⁹Akawa kipofu kwa siku tatu, hakula wala hakunywa.

¹⁰Palikuwa na mwanafunzi mmoja huko Dameski aliyeitwa Anania. Bwana akamwambia katika maono, "Anania." Akajibu, "Mimi hapa, Bwana."

¹¹Bwana akamwambia, "Ondoka, uende katika njia iitwayo Nyoofu, ukatafute katika nyumba ya Yuda mtu mmoja atokaye Tarso aitwaye Sauli—kwa maana yeye anaomba, ¹²naye ameona katika maono mtu aitwaye Anania akiingia na kumwekea mikono ili apate kuona tena."

¹³Anania akajibu, "Bwana, nimesikia kwa watu wengi habari za mtu huyu—madhara aliyowatenda watakatifu wako huko Yerusalemu. ¹⁴Na hapa ana mamlaka kutoka kwa wakuu wa makuhani ya kuwafunga wote waliitiao jina lako."

¹⁵Lakini Bwana akamwambia, "Nenda, kwa maana mtu huyu ni chombo changu kiteule, ili alichukue jina langu mbele ya mataifa, na wafalme, na wana wa Israeli. ¹⁶Kwa maana nitamwonyesha kadiri ya mateso yampasayo kuyapata kwa ajili ya jina langu."

¹⁷Anania akaenda, akaingia ndani ya nyumba. Akamwekea mikono Sauli, akasema, "Ndugu Sauli, Bwana Yesu—yeye aliyekutokea njiani uliyoiendea—amenituma ili upate kuona tena na kujazwa Roho Mtakatifu." ¹⁸Mara vitu kama magamba vikaanguka kutoka machoni pake, akapata kuona tena. Akainuka akabatizwa, ¹⁹na baada ya kula, akapata nguvu zake. Akakaa siku kadha wa kadha pamoja na wanafunzi huko Dameski, ²⁰na mara akaanza kumhubiri Yesu katika masinagogi, ya kwamba yeye ni Mwana wa Baba yetu. ²¹Wote waliomsikia wakastaajabu, wakasema, "Je, huyu siye yule aliyewaharibu wale waliitiao jina hili huko Yerusalemu? Na je, hakuja hapa kwa kusudi hili: awalete wamefungwa mbele ya wakuu wa makuhani?"

²²Lakini Sauli akazidi kupata nguvu, akawatia wasiwasi Wayahudi waliokaa Dameski kwa kuthibitisha ya kwamba huyu ndiye Kristo.

²³Baada ya siku nyingi kupita, Wayahudi wakafanya shauri baya la kumwua, ²⁴lakini Sauli akalifahamu shauri lao; wakayalinda malango mchana na usiku ili wapate kumwua, ²⁵lakini usiku wanafunzi wake wakamteremsha kupitia ukutani ndani ya kapu.

²⁶Alipofika Yerusalemu, akajaribu kujiunga na wanafunzi, lakini wote wakamwogopa, wasiamini ya kuwa yeye ni mwanafunzi. ²⁷Lakini Barnaba akamtwaa, akampeleka kwa mitume, akawaeleza jinsi Sauli alivyomwona Bwana njiani, na ya kuwa amesema naye, na jinsi alivyonena kwa ujasiri huko Dameski kwa jina la Yesu. ²⁸Basi akawa pamoja nao, akiingia na kutoka huko Yerusalemu, akinena kwa ujasiri kwa jina la Bwana. ²⁹Akanena na kuhojiana na Wayahudi wa Kiyunani, lakini wakawa wakitafuta kumwua. ^b b v29 Wayahudi wa Kiyunani: Wayahudi waliosema Kigiriki ambao walikuwa wamefuata lugha na desturi za Kigiriki. ³⁰Ndugu walipojua hayo, wakamteremsha mpaka Kaisaria, wakampeleka Tarso.

Mwana Amponya Ainea kwa Kupitia Petro

³¹Basi kanisa katika Uyahudi wote, na Galilaya, na Samaria, likawa na amani na likajengwa; likienenda katika kumcha Bwana na likifarijiwa na Roho Mtakatifu, likaongezeka hesabu.

³²Ikawa Petro alipokuwa akizunguka pande zote kati ya waaminio wote, akashuka pia kwa watakatifu waliokaa Lida. ³³Huko akamkuta mtu mmoja aitwaye Ainea, aliyekuwa kitandani miaka minane, kwa kuwa alikuwa amepooza. ³⁴Petro akamwambia, "Ainea, Yesu Kristo anakuponya. Inuka ukatandike kitanda chako." Mara akainuka. ³⁵Nao wote waliokaa Lida na Sharoni wakamwona, wakamgeukia Bwana.

³⁶Katika Yafa palikuwa na mwanafunzi mmoja aitwaye Tabitha, maana yake Dorkasi. Alikuwa amejaa matendo mema na msaada kwa maskini. ^c c v36 Tabitha (Kiaramu) na Dorkasi (Kiyunani) zote maana yake ni "paa." ³⁷Siku zile akaugua, akafa; wakamwosha, wakamlaza katika chumba cha juu. ³⁸Kwa kuwa Lida ilikuwa karibu na Yafa, wanafunzi waliposikia ya kwamba Petro yupo huko, wakatuma watu wawili kwake, wakimsihi, "Usikawie kuja kwetu." ³⁹Basi Petro akaondoka, akaenda pamoja nao. Alipofika, wakampandisha katika chumba cha juu. Wajane wote wakasimama karibu naye wakilia, wakionyesha kanzu na mavazi ambayo Dorkasi aliyafanya alipokuwa pamoja nao. ⁴⁰Petro akawatoa wote nje, akapiga magoti, akaomba. Kisha akaugeukia mwili, akasema, "Tabitha, inuka." Naye akafumbua macho, akamwona Petro, akaketi. ⁴¹Akampa mkono wake, akamwinua. Kisha akawaita watakatifu na wajane, akamweka mbele yao yu hai. ⁴²Habari hii ikajulikana Yafa pote, na watu wengi wakamwamini Bwana. ⁴³Naye akakaa Yafa siku nyingi kwa mtu mmoja aitwaye Simoni, mtengenezaji wa ngozi.