使徒行傳 9

9 ¹但係掃羅重係向住主嘅門徒噴住恐嚇同兇殺嘅話，佢去搵大祭司， ² 向佢攞介紹信去大馬士革嘅各會堂，為咗如果搵到信呢個道嘅人，無論男女，都可以捆綁佢哋，帶返去耶路撒冷。 ^a a v2 「呢個道」係耶穌嘅跟隨者最早期嘅名稱，喺佢哋被叫做基督徒之前。 ³佢一路行，快要到大馬士革嘅時候，忽然有一道從天上嚟嘅光四面圍住佢照落嚟。

⁴佢仆咗喺地上，聽見有聲音同佢講：「掃羅，掃羅，你點解要迫害我呀？」

⁵佢話：「主啊，你係邊個呀？」嗰位話：「我就係你所迫害嘅耶穌。

⁶你而家起身，入城去，就會有人話俾你知你要做啲乜嘢。」

⁷同佢一齊行嘅人企喺度講唔出聲，聽見嗰把聲，但係乜嘢人都見唔到。 ⁸掃羅從地上起身，眼雖然開住，但係乜嘢都睇唔到；佢哋就拖住佢隻手，帶佢入大馬士革。 ⁹佢有三日睇唔到嘢，又唔食又唔飲。

¹⁰喺大馬士革有一個門徒叫亞拿尼亞。主喺異象中對佢講：「亞拿尼亞。」佢應話：「主啊，我喺度。」

¹¹主對佢講：「你起身，去嗰條叫直街嘅街道，喺猶大屋企搵一個大數人叫掃羅——佢而家正喺度祈禱， ¹²佢喺異象中見到一個叫亞拿尼亞嘅人入嚟，按手喺佢身上，好等佢可以再睇見。」

¹³亞拿尼亞應話：「主啊，我聽好多人講起呢個人，佢喺耶路撒冷對你嘅聖徒做咗幾多壞事。 ¹⁴而家佢喺呢度有祭司長俾嘅權柄，要捆綁一切求告你名嘅人。」

¹⁵但係主對佢講：「你去啦，因為呢個人係我揀選嘅器皿，要喺列國、君王同以色列人面前傳揚我嘅名。 ¹⁶我要指俾佢睇，佢為咗我嘅名必須要受幾多苦。」

¹⁷亞拿尼亞就去，入咗嗰間屋，按手喺掃羅身上，話：「掃羅兄弟，喺你行嗰條路上向你顯現嘅主耶穌，差我嚟等你可以再睇見，又被聖靈充滿。」 ¹⁸即刻有啲好似鱗片嘅嘢從佢眼度甩落嚟，佢就再睇得到。佢起身，受咗洗， ¹⁹食咗嘢之後，就恢復咗體力。佢同大馬士革嘅門徒一齊住咗幾日， ²⁰就即刻喺各會堂裏面傳講耶穌，話佢就係我哋嘅父嘅兒子。 ²¹所有聽見嘅人都好詫異，話：「呢個咪就係喺耶路撒冷殘害嗰啲求告呢個名嘅人咩？佢咪就係為咗呢件事嚟到呢度，要捆綁佢哋帶去祭司長面前咩？」

²²但係掃羅越發有力，用證據證明呢一位就係基督，令住喺大馬士革嘅猶太人不知所措。

²³過咗好多日之後，啲猶太人就商議要殺佢， ²⁴但係掃羅知道咗佢哋嘅陰謀；佢哋日夜都守住城門要殺佢， ²⁵但係喺夜晚，佢嘅門徒用一個籃仔將佢從城牆縋落去。

²⁶佢到咗耶路撒冷，想同啲門徒相交，但係大家都怕佢，唔信佢係一個門徒。 ²⁷但係巴拿巴帶佢去見眾使徒，同佢哋講明掃羅點樣喺路上見到主，主又點樣同佢講嘢，仲有佢喺大馬士革點樣奉耶穌嘅名放膽講道。 ²⁸於是佢同佢哋一齊，喺耶路撒冷出入來去自如，奉主嘅名放膽講道。 ²⁹ 佢又同啲講希臘話嘅猶太人講論辯道，但係佢哋想殺佢。 ^b b v29 講希臘話嘅猶太人：即係採納咗希臘語言同文化嘅猶太人。 ³⁰眾弟兄知道咗呢件事，就帶佢落去該撒利亞，再打發佢去大數。

聖子藉住彼得醫好以尼雅

³¹於是遍布猶太、加利利同撒瑪利亞嘅教會就得到平安，而且被建立起嚟；喺敬畏主嘅心中行事，又得住聖靈嘅安慰，人數不斷加增。

³²彼得走遍各處嘅信徒嗰陣，亦都落去住喺呂大嘅聖徒嗰度。 ³³喺嗰度佢遇見一個叫以尼雅嘅人，臥床八年，因為癱瘓咗。 ³⁴彼得對佢講：「以尼雅，耶穌基督醫好你。起身，執返好你張床。」佢即刻就起身。 ³⁵所有住喺呂大同沙崙嘅人都見到佢，佢哋就歸向主。

³⁶ 喺約帕有一個門徒叫大比大，翻譯出嚟就係多加。佢滿有善行同賙濟窮人嘅愛心。 ^c c v36 大比大（亞蘭文）同多加（希臘文）都係「羚羊」嘅意思。 ³⁷嗰啲日子佢病咗，然後死咗；佢哋幫佢洗淨，放喺樓上一間房。 ³⁸因為呂大近約帕，門徒聽見彼得喺嗰度，就打發兩個人去搵佢，懇求話：「你唔好耽誤，快啲嚟我哋呢度啦。」 ³⁹彼得就起身同佢哋一齊去。到咗之後，佢哋帶佢上樓房。眾寡婦企喺佢身邊喊，攞出多加同佢哋一齊嗰陣所做嘅裏衣同外衣俾佢睇。 ⁴⁰彼得叫所有人出去，跪低祈禱，然後轉身向住屍體講：「大比大，起身啦。」佢就張開眼，見到彼得，就坐起身。 ⁴¹彼得伸手扶佢，將佢拉起身，再叫眾聖徒同寡婦入嚟，將佢活生生咁交返俾佢哋。 ⁴²呢件事傳遍成個約帕，好多人就信咗主。 ⁴³之後彼得喺約帕一個叫西門嘅硝皮匠嗰度住咗好多日。