அப்போஸ்தலர் 9

9 ¹சவுலோ, கர்த்தருடைய சீஷருக்கு விரோதமாய் இன்னமும் பயமுறுத்தலையும் கொலையையும் மூச்செறிந்துகொண்டு, பிரதான ஆசாரியனிடத்திற்குப் போய், ²இந்த மார்க்கத்தைச் சேர்ந்த ஆண்களையும் பெண்களையும் யாரையாகிலும் கண்டுபிடித்தால், அவர்களைக் கட்டி எருசலேமுக்குக் கொண்டுவரும்படி, தமஸ்குவிலுள்ள ஜெப ஆலயங்களுக்கு அவனிடத்தில் கடிதங்களைக் கேட்டான். ^a a v2 “இந்த மார்க்கம்” என்பது, கிறிஸ்தவர்கள் என்று அழைக்கப்படுவதற்குமுன், இயேசுவைப் பின்பற்றினவர்களுக்கு வழங்கப்பட்ட ஆதி நாமமாயிருந்தது. ³அவன் பிரயாணம்பண்ணித் தமஸ்குவுக்குச் சமீபமாய் வந்தபோது, சடிதியில் வானத்திலிருந்து ஒரு ஒளி அவனைச் சுற்றிலும் பிரகாசித்தது.

⁴அவன் தரையிலே விழுந்து, “சவுலே, சவுலே, ஏன் என்னைத் துன்பப்படுத்துகிறாய்?” என்று தன்னிடத்தில் சொல்லுகிற ஒரு சத்தத்தைக் கேட்டான்.

⁵அதற்கு அவன், “ஆண்டவரே, நீர் யார்?” என்றான். அதற்கு அவர், “நீ துன்பப்படுத்துகிற இயேசு நானே.

⁶ஆனாலும் நீ எழுந்து, நகரத்திற்குள் போ; நீ செய்யவேண்டியது உனக்குச் சொல்லப்படும்” என்றார்.

⁷அவனோடேகூடப் பிரயாணம்பண்ணின மனிதர் அந்தச் சத்தத்தைக் கேட்டும் ஒருவரையும் காணாமல், பேசமுடியாமல் நின்றார்கள். ⁸சவுல் தரையிலிருந்து எழுந்து, தன் கண்களைத் திறந்தபோது ஒன்றையும் காணவில்லை; ஆகையால் அவர்கள் அவனைக் கைப்பிடித்து நடத்தித் தமஸ்குவுக்குக் கொண்டுபோனார்கள். ⁹அவன் மூன்று நாள் பார்வையற்றவனாயிருந்து, புசிக்கவுமில்லை குடிக்கவுமில்லை.

¹⁰தமஸ்குவிலே அனனியா என்னும் பேருள்ள ஒரு சீஷன் இருந்தான். அவனைக் கர்த்தர் ஒரு தரிசனத்தில், “அனனியாவே” என்றார். அவன், “இதோ, இருக்கிறேன், ஆண்டவரே” என்றான்.

¹¹அப்பொழுது கர்த்தர் அவனை நோக்கி, “நீ எழுந்து, நேர்த்தெரு என்னப்பட்ட வீதிக்குப்போய், யூதாவின் வீட்டிலே தர்சுபட்டணத்தானாகிய சவுல் என்னும் பேருள்ள ஒருவனைத் தேடு; இதோ, அவன் ஜெபம்பண்ணுகிறான். ¹²அனனியா என்னும் பேருள்ள ஒரு மனிதன் தன்னிடத்தில் வந்து, தான் திரும்பப் பார்வையடையும்படி தன்மேல் கைகளை வைக்கிறதை அவன் தரிசனத்தில் கண்டான்” என்றார்.

¹³அதற்கு அனனியா, “ஆண்டவரே, இந்த மனிதனைக்குறித்து அநேகரால் கேள்விப்பட்டேன்; இவன் எருசலேமிலே உம்முடைய பரிசுத்தவான்களுக்கு எத்தனையோ தீங்குசெய்தான். ¹⁴இங்கேயும் உம்முடைய நாமத்தைத் தொழுதுகொள்ளுகிற யாவரையும் கட்டும்படிக்குப் பிரதான ஆசாரியர்களால் அதிகாரம் பெற்றிருக்கிறான்” என்றான்.

¹⁵அதற்குக் கர்த்தர் அவனை நோக்கி, “நீ போ; அவன் புறஜாதிகளுக்கும் ராஜாக்களுக்கும் இஸ்ரவேல் புத்திரருக்கும் என்னுடைய நாமத்தை அறிவிக்கிறதற்காக நான் தெரிந்துகொண்ட பாத்திரமாயிருக்கிறான். ¹⁶என்னுடைய நாமத்தினிமித்தம் இவன் எவ்வளவாய்ப் பாடுபடவேண்டும் என்பதை நான் இவனுக்குக் காண்பிப்பேன்” என்றார்.

¹⁷அப்பொழுது அனனியா போய், வீட்டிற்குள் பிரவேசித்து, அவன்மேல் கைகளை வைத்து, “சகோதரனாகிய சவுலே, நீ திரும்பப் பார்வையடையும்படிக்கும் பரிசுத்த ஆவியினால் நிரப்பப்படும்படிக்கும், நீ வந்த வழியிலே உனக்குத் தரிசனமான இயேசுவாகிய கர்த்தர் என்னை அனுப்பினார்” என்றான். ¹⁸உடனே அவன் கண்களிலிருந்து மீன்செதிள்போன்ற ஏதோ விழுந்தது; அவன் திரும்பப் பார்வையடைந்து, எழுந்து, ஞானஸ்நானம் பெற்றான். ¹⁹பின்பு அவன் போஜனம்பண்ணிப் பலனடைந்தான். சவுல் தமஸ்குவிலிருந்த சீஷரோடே சிலநாள் தங்கியிருந்து, ²⁰உடனே ஜெப ஆலயங்களில் இயேசுவே எங்கள் பிதாவின் குமாரன் என்று அவரைக்குறித்துப் பிரசங்கித்தான். ²¹கேட்டவர்கள் எல்லாரும் ஆச்சரியப்பட்டு, “இந்த நாமத்தைத் தொழுதுகொள்ளுகிறவர்களை எருசலேமிலே பாழாக்கினவன் இவன் அல்லவா? இவர்களைக் கட்டிப் பிரதான ஆசாரியர்களிடத்தில் கொண்டுபோகும்படிக்கல்லவா இங்கேயும் வந்தான்?” என்றார்கள்.

²²சவுலோ மேன்மேலும் பலப்பட்டு, இயேசுவே கிறிஸ்து என்று ஸ்தாபித்து, தமஸ்குவில் குடியிருந்த யூதரைக் கலங்கப்பண்ணினான்.

²³அநேகநாள் சென்றபின்பு, யூதர்கள் அவனைக் கொலைசெய்யும்படி ஆலோசனைபண்ணினார்கள். ²⁴அவர்களுடைய சதி சவுலுக்குத் தெரியவந்தது; அவனைக் கொலைசெய்யும்படி இரவும்பகலும் வாசல்களைக் காவல்காத்துக்கொண்டிருந்தார்கள். ²⁵ஆனாலும் சீஷர்கள் இராத்திரியிலே அவனை ஒரு கூடையில் வைத்து மதிலின் வழியாய் இறக்கிவிட்டார்கள்.

²⁶சவுல் எருசலேமுக்கு வந்து, சீஷரோடே சேர்ந்துகொள்ள முயற்சித்தான்; ஆனாலும் அவன் சீஷனென்று விசுவாசியாமல் எல்லாரும் அவனுக்குப் பயந்தார்கள். ²⁷அப்பொழுது பர்னபா அவனை அப்போஸ்தலரிடத்தில் அழைத்துக்கொண்டுபோய், அவன் வழியிலே கர்த்தரைக் கண்டதையும், அவர் அவனோடே பேசினதையும், அவன் தமஸ்குவிலே இயேசுவின் நாமத்தில் தைரியமாய்ப் பிரசங்கித்ததையும் அவர்களுக்கு விவரித்துச் சொன்னான். ²⁸அதன்பின்பு அவன் எருசலேமிலே அவர்களோடே சுயாதீனமாய்ச் சஞ்சரித்து, கர்த்தருடைய நாமத்தில் தைரியமாய்ப் பேசி, ²⁹கிரேக்கு பாஷைக்காரராகிய யூதரோடே சம்பாஷித்து வாதாடினான்; அவர்களோ அவனைக் கொலைசெய்யத் தேடினார்கள். ^b b v29 கிரேக்கு பாஷைக்காரர்: கிரேக்கு பாஷையையும் கலாசாரத்தையும் தழுவிக்கொண்ட கிரேக்கு பேசுகிற யூதர்கள். ³⁰சகோதரர் இதை அறிந்தபோது, அவனைச் செசரியாவுக்குக் கொண்டுபோய், தர்சுவுக்கு அனுப்பிவிட்டார்கள்.

குமாரன் பேதுருவின் மூலமாய் ஐனேயாவைச் சொஸ்தமாக்குகிறார்

³¹அப்பொழுது யூதேயா கலிலேயா சமாரியா நாடுகளிலெங்குமுள்ள சபை சமாதானமடைந்து, பலப்பட்டு, கர்த்தருக்குப் பயந்து நடந்து, பரிசுத்த ஆவியின் ஆறுதலினால் தேறி, எண்ணிக்கையில் பெருகிற்று.

³²பேதுரு எல்லா விசுவாசிகளிடத்திலும் சுற்றிப் பிரயாணம்பண்ணுகையில், லித்தா என்னும் ஊரில் குடியிருந்த பரிசுத்தவான்களிடத்திற்கும் போனான். ³³அங்கே எட்டு வருஷமாய் மெத்தையிலே கிடந்த திமிர்வாதக்காரனாகிய ஐனேயா என்னும் பேருள்ள ஒரு மனிதனைக் கண்டு, ³⁴அவனை நோக்கி, “ஐனேயாவே, இயேசுகிறிஸ்து உன்னைச் சொஸ்தமாக்குகிறார்; நீ எழுந்து, உன் படுக்கையை நீயே சரிப்படுத்து” என்றான். உடனே அவன் எழுந்திருந்தான். ³⁵லித்தாவிலும் சாரோனிலும் குடியிருந்த யாவரும் அவனைக் கண்டு, கர்த்தரிடத்தில் திரும்பினார்கள்.

³⁶யோப்பா என்னும் பட்டணத்திலே தபீத்தாள் என்னும் பேருள்ள ஒரு சீஷி இருந்தாள்; அதற்குத் தொற்காள் என்று அர்த்தம். அவள் நற்கிரியைகளையும் தான தர்மங்களையும் மிகுதியாய்ச் செய்துவந்தாள். ^c c v36 தபீத்தாள் (அரமேயம்), தொற்காள் (கிரேக்கு) ஆகிய இரண்டு பேர்களுக்கும் “வெளிமான்” என்று அர்த்தம். ³⁷அந்நாட்களில் அவள் வியாதிப்பட்டு மரித்தாள்; அவளைக் குளிப்பாட்டி, மேல்வீட்டறையிலே வைத்தார்கள். ³⁸லித்தா யோப்பாவுக்குச் சமீபமாயிருந்தபடியால், பேதுரு அங்கே இருக்கிறானென்று சீஷர்கள் கேள்விப்பட்டு, அவன் தாமதம்பண்ணாமல் தங்களிடத்திற்கு வரவேண்டுமென்று வேண்டிக்கொள்ள, இரண்டு மனிதரை அவனிடத்திற்கு அனுப்பினார்கள். ³⁹பேதுரு எழுந்து அவர்களோடேகூடப் போனான்; அவன் வந்தபோது, அவனை மேல்வீட்டறைக்கு அழைத்துக்கொண்டுபோனார்கள். விதவைகள் எல்லாரும் அழுதுகொண்டு, தொற்காள் தங்களோடிருந்தபோது செய்த அங்கிகளையும் வஸ்திரங்களையும் காண்பித்து அவனருகே நின்றார்கள். ⁴⁰பேதுரு எல்லாரையும் வெளியே அனுப்பிவிட்டு, முழங்காற்படியிட்டு ஜெபம்பண்ணி, சரீரத்தினிடமாய்த் திரும்பி, “தபீத்தாளே, எழுந்திரு” என்றான். அவள் தன் கண்களைத் திறந்து, பேதுருவைக் கண்டு, உட்கார்ந்தாள். ⁴¹அவன் அவளுக்குக் கையைக்கொடுத்து, அவளைத் தூக்கிவிட்டு, பரிசுத்தவான்களையும் விதவைகளையும் அழைத்து, அவளை உயிரோடிருக்கக் காண்பித்தான். ⁴²இது யோப்பா முழுவதிலும் அறியப்பட்டது; அநேகர் கர்த்தரிடத்தில் விசுவாசமாயிருந்தார்கள். ⁴³பின்பு அவன் யோப்பாவிலே தோல்பதனிடுகிறவனாகிய சீமோன் என்னும் ஒருவனிடத்தில் அநேகநாள் தங்கியிருந்தான்.