Putro pora Tar ke satai diya manuh ke lok paise

Saul dhorbole laga hukum chithi loi kene Damascus rasta te ase, titia ekta saki pora taike girai dise aru ekta awaj pora hudise kele taike sotai thake. Tin din andha, bhoi kori thaka Ananias pora bhal kori dise, tai prochar koribole shuru korise. Biswasi khan taike biswas nakorise, Barnabas pora tai laga gawahi diya tak. Peter pora Joppa te Tabitha ke jinda kori dise.

Adhyay 9.

Kintu Saul tu, Prabhu laga chela khan birodh te etiya bhi bhoi dikha aru khun kora laga kotha ulai kene, moha purohit logot te jaise, aru Damascus laga Yehudi mondoli khan nimite chithi khan tar pora mangise, titia jodi tai etu Rasta te kun manuh, mota khan nohoile maiki khan, ke pabo, tarkhan ke bandhi kene Jerusalem te ani bole nimite. ^a Tai jai thaki kene Damascus usor te ponchise, titia achanak sorgo pora ekta puhor tar chari phale te chamkise.

Tai matite giri kene ekta awaj huni paise, juntu koise, “Saul, Saul, tumi kele Moi ke satai ase?”

Tai koise, “Prabhu, Apuni kun ase?” Aru Tai koise, “Moi Jisu ase, kunke tumi satai ase.

Kintu uthibi aru sheher te ghusi jabi, titia tumi ki koribo lage etu tumi ke koi dibo.”

Tar logote safar kora manuh khan awaj huni kene, kintu kun ke bhi nadikhi kene, chup-chap khara hoi thakise. Saul mati pora uthise, kintu tar suku khula thakile bhi eku nadikhise; tarkhan tar ke hath te dhori kene Damascus te loi anise. Tai tin din andha hoi thakise, aru eku khua nai aru piya bhi nai.

Damascus te Ananias koi kene ekjon chela thakise. Prabhu pora ekta darshan te koise, “Ananias.” Tai jawab dise, “Prabhu, moi yate ase.”

Prabhu pora tar ke koise, “Uthibi, aru Sidha koi mata rasta te jabi, aru Judas laga ghor te Tarsus sheher laga Saul koi kene ekjon manuh ke bisaribi—kilemane tai prathana kori ase, aru tai darshan te dikhise, Ananias koi kene ekjon manuh bhitor te ahhi kene tar uporte hath rakhise, titia tai aru bar dikhibo paribo.”

Ananias jawab dise, “Prabhu, moi etu manuh laga kotha bisi manuh pora hunise—tai Jerusalem te Apuni laga pobitro manuh khan ke kiman dukh dise etu bhi. Aru tai yate, Apuni laga naam mata sob manuh ke bandhi bole, moha purohit khan pora adhikar loi ahhise.”

Kintu Prabhu pora tar ke koise, “Jabi, kilemane etu manuh to Moi laga naam desh khan aru raja khan aru Israel laga manuh khan age te loi jabole, Moi pora basi luwa ekta patro ase. Kilemane Moi laga naam nimite tai kiman dukh pabo lage, etu Moi tar ke dikhai dibo.”

Ananias jai kene etu ghor te ghusi jaise. Tai Saul uporte hath rakhise aru koise, “Bhai Saul, tumi aha rasta te tumi ke dikhai diya Prabhu Jisu pora moi ke pathaise, titia tumi aru bar dikhibo paribo aru Pobitro Atma pora bhorta hobo.” Achanak tar suku pora machor khola nisena kiba giri jaise, aru tai aru bar dikhise. Titia tai uthise aru baptizma loise, aru tai khana khai kene takot pai loise. Tai kunba din tak Damascus te chela khan logot te thakise, aru loge-loge tai Yehudi mondoli khan te Jisu to amar Pitri laga Putro ase koi kene prachar koribole shuru korise. Jun khan huni paise sob asurit hoi kene koise, “Etu manuh to Jerusalem te etu naam loi kene mata khan ke eneka dukh diya manuh nohoi naki? Aru tai yate, tarkhan ke bandhi kene moha purohit khan age te loi jabole nimite aha nohoi naki?”

Kintu Saul aru bhi bisi takot hoise, aru etu manuh he Khrista ase koi kene pruman dikhai kene Damascus te thaka Yehudi khan ke asurit korise.

Bisi din paar hua pichete, Yehudi khan pora tar ke morai dibole lukai kene kotha milaise, kintu Saul tarkhan laga etu kotha jani loise; tarkhan tar ke morai dibole din aru raat sheher laga dorja khan te rukhi thakise, kintu rati te tar chela khan pora tar ke ekta tukri te bohai kene deewar laga uporte pora nichete namai dise.

Jerusalem te ponchi kene, tai chela khan logot te milibole kosis korise, kintu tai ekjon chela ase koi kene sob manuh biswas nakori kene tar ke bhoi korise. Kintu Barnabas pora tar ke pasharita khan logot te loi jaise, aru Saul kineka rasta te Prabhu ke dikhise aru Prabhu tar logote kotha korise, aru tai kineka Damascus te Jisu laga naam te mon dangor pora kotha koise, etu sob bujhai dise. Titia tai tarkhan logot te thakise, aru Jerusalem te ahi-jai kori kene, Prabhu laga naam te mon dangor pora kotha koise. Tai Hellenist khan logot te kotha korise aru bahas korise, kintu tarkhan tar ke morai dibole bisari thakise. ^b Jitia bhai khan etu jani paise, tarkhan tar ke Caesarea te loi namai dise aru Tarsus te pathai dise.

Putro pora Peter laga hath pora Aeneas ke bhal kori dise

Titia Judea aru Galilee aru Samaria sob jagah te laga mondoli te shanti thakise aru takot paise; Prabhu laga bhoi te berai kene aru Pobitro Atma pora mon dangor pai kene, tarkhan laga ginti bisi hoi jaise.

Peter pora sob biswasi khan majot te safar kori thaka homoi te, tai Lydda te thaka pobitro manuh khan logot te bhi namai jaise. Ta te tai Aeneas koi kene ekjon manuh ke paise, kun jothor bemar hoi kene aath saal tak bisna te pori thakise. Peter pora tar ke koise, “Aeneas, Jisu Khrista pora tumi ke bhal kori ase. Uthibi, tumi laga bisna bonabi.” Tai loge-loge uthi jaise. Aru Lydda aru Sharon te thaka sob manuh tar ke dikhise, aru tarkhan Prabhu phale ghuri ahhise.

Joppa te Tabitha koi kene ekjon maiki chela thakise, jun laga ortho Dorcas ase. Tai bhal kaam aru gorib khan ke modot kora pora bhorta asele. ^c Utu din khan te tai bemar hoise aru mori jaise; tarkhan tar ke dhui kene uporte thaka ekta kamra te rakhise. Lydda to Joppa usor te asele karne, Peter ta te ase koi kene huni paise chela khan pora tar logote duijon manuh pathaise, aru kaku-minti kori koise, “Amikhan logote ahibole deri nakoribi.” Titia Peter uthise aru tarkhan logote jaise. Jitia tai ponchise, tarkhan tar ke uporte thaka kamra te loi jaise. Sob bidhowa khan tar usorte khara hoi kene kandise, aru Dorcas tarkhan logote thaka homoi te bona kurta aru chador khan dikhai dise. Peter sob ke bahar te pathai dise, aru athu teki kene prathana korise. Tai mora gaw phale ghuri kene koise, “Tabitha, uthibi.” Tai suku khuli kene, Peter ke dikhise, aru uthi bohise. Tai tar ke hath di kene, tai ke uthai dise. Tai pobitro manuh khan aru bidhowa khan ke mati kene, tai ke jinda dikhai dise. Aru etu kotha pura Joppa te jani jaise, aru bisi manuh Prabhu ke biswas korise. Aru tai Joppa te, chamra kaam kora Simon koi kene ekjon manuh logot te, bisi din tak thakise.