Mi eng' bukuit

Poisyonigap che Kiyoktoi 9 FHB Father's Heart Bible™

Kiistoi 15% eng' kiy ne iale korook →
Bukuit

Kotuiye Weeriit ne usei ineendet

Kita Saulo ooreetap Damasko kotinye paronok che po namnatet ye kolal liilindo komulennyi kobut ng'wony, ak kogas kutit ne teebei amu nee si usei ineendet. Koma keer peetuusyek somok, koyaech Ananias ne iywei, ak konam koamdooti. Iywei che iyani ineendet agoi komwachi Barnaba agobo ineendet. King'etu Petero Tabitha eng' Joppa.

Sura 9.

Ago Saulo, ne kita kobunei burgeiywet ak rumisyet agobo kasubigap Kiptaiyat, kwo ole mi tisiindet ne oo, ak kosoom ineendet paronok che koba sinagogisyek che po Damasko, si ngot konyoor age tugul che po Ooreet, murenik anan chebyosok, koip icheek che kirate koba Jerusalem. a a v2 "Ooreet" ko ki kaina ne ki tai agobo che sibei Jeso, kotom kiguure icheek Kristoik. Ye kita kowendi ak koriik Damasko, koma tyanit kolal liilindo ne punu kipsengwet komulennyi.

Kobut ng'wony ak kogas kutit ne le, “Saulo, Saulo, amu nee si us anee?”

Kole, “Ii ng'oo, Kiptaiyat?” Ak kole, “Anee Jeso, ne usei inyee.

Ago ing'eet ak imanda nganaseet, ak kimwaun ne imache iyai.”

Ki tonon muren che kibendi ak ineendet komalngalaali, kogas kutit ago ma keer chii. Ki ng'eet Saulo eng' ng'wony, ago ye kiga yaat konyeguk ma keer kiy; kinam eunnyi ak koip koba Damasko. Ki koryo peetuusyek somok ak ma koam anan koe.

Ki menyei Damasko kasuubindet age ne kiguure Ananias. Eng' ng'ang'utyet kole Kiptaiyat, “Ananias.” Kowolji kole, “Ami yu, Kiptaiyat.”

Koleenji Kiptaiyat, “Ing'eet, iwe ooreet ne kiguure Ne Litiit, ak icheeng' eng' kootap Judas chiito ne po Tarso ne kiguure Saulo—amu kosaaei, ak kageer eng' ng'ang'utyet chiito ne kiguure Ananias konyo ole mi ak konde eunekyik eng' ineendet si koger kogeny.”

Kowolji Ananias kole, “Kiptaiyat, kaamwachi anee che chaang' agobo chiichi—yaityet ne kayachi che tiliileenguk eng' Jerusalem. Ak yu kotinyei kimnateet ne punu tisiik che oo si korat tugul che guurei kaineng'ung'.”

Ago koleenji Kiptaiyat, “Iwe, amu chiichi ko kiboisyeennyu ne kaalewen si koip kainennyu taitap pororyosyek, laitorinik, ak piigap Israel. Amu aboorchini ineendet ole chaang' ne imache konyaliil agobo kainennyu.”

Ki wo Ananias ak komanda koot. Konde eunekyik eng' Saulo ak kole, “Saulo tupchennyu, Kiptaiyat Jeso—ne kiboorun eng' ooreet ne kiwendi—koyookwo si iger kogeny ak inyiit Kabuuset ne Tiliil.” Koma tyanit kobut tuguuk che kergei ak peerik eng' konyeguk, ak koger kogeny. Ki ng'eet ak kibatisan, ak ye kingo am, konyoor kimnateennyi. Ki mi peetuusyek alak kobooto kasubik eng' Damasko, ak koma tyanit kotoi koamdoi Jeso eng' sinagogisyek, kole ko Weeriitap Kwandanyo. Ki kwong'yo tugul che ki kas ak kole, “Tos ma chiichi ne ki iyai yaityet ne oo eng' Jerusalem among che guurei kainani? Ak tos ma kinyonei yu agobo niito: si koip icheek che kirate taitap tisiik che oo?”

Ago kitesagis Saulo kimnateet, koisoisio Yahudik che menyei Damasko, koboorun ole niito ko Kristo.

Ye kingo pata peetuusyek che chaang', kotet Yahudik ng'aleek si kobar ineendet, ago konai Saulo ng'aleekwak che chobei; kiriibei kurgotik peetuut ak kemeut si kobar ineendet, ago eng' kemoi koituunji kasubikyik ineendet eng' kiruget kobun irimeet.

Ye kingo it Jerusalem, kimachei kotuiyogei ak kasubik, ago kiywei tugul ineendet, ko ma iyani kole ko kasuubindet. Ago koip Barnaba ineendet ole mi che kiyooktoi ak komwachi ole kigeer Saulo Kiptaiyat eng' ooreet, ne king'alaalji ineendet, ak ole king'alaal eng' kimnateet eng' Damasko eng' kainetap Jeso. Kingotuun ki mi kobooto icheek, kowendoot eng' Jerusalem, kong'alaal eng' kimnateet eng' kainetap Kiptaiyat. King'alaal ak kong'aroor ak Helenik, ago kicheeng'ei kobar ineendet. b b v29 Helenik: Yahudik che ng'alaalei ng'alekap Giriik che ki nam ng'olyoondo ak kaanametap Giriik. Ye kingo nai tupchoosyek niito, koitu icheek ineendet Kaisarea ak koyookto koba Tarso.

Kosaap Weeriit Aeneas kobun Petero

Kingotuun kaniset ne mi Judea komugul, Galilaya, ak Samaria kotinyei kaalyeet ak kigimit; kowendote eng' iywanatetap Kiptaiyat ak koigaigai Kabuuset ne Tiliil, kotesagis ak kochang'a.

Ye kita kowendi Petero among tugul che iyani, kwo kora ole mi che tiliileen che menyei Lida. Konyoor eng' olooto chiito ne kiguure Aeneas, ne kiga koru eng' itogunnyi kenyiisyek sisiit, ne ki meiyo poorwek. Koleenji Petero, “Aeneas, kasaabin Jeso Kristo. Ing'eet, iyachi itogung'ung'.” Ki ng'eet koma tyanit. Ak ki keer tugul che menyei Lida ak Sharon ineendet, ak kong'aanyeigei Kiptaiyat.

Ki menyei Joppa kasuubindet age ne kiguure Tabitha, ne weech ni Dorka. Ki nyiitaat poisyonik che myee ak toretetap poorotiin. c c v36 Tabitha (eng' Aramaik) ak Dorka (eng' Giriik) kobootugul weechi "roon." Eng' peetuusyechooto komyan ak kome; kiuun icheek ak komogonji koot ne po parak. Amu kiga neegitee Lida ak Joppa, koyookto kasubik che ki kas kole kimi Petero yooto muren aeng' ole mi ineendet, kobirchin, “Amegagei inyoonech.” Kingotuun ki ng'eet Petero ak kowo kobooto icheek. Ye kingo it, koip icheek koit koot ne po parak. Ki tonon mosoogik tugul neegitennyi koriir, koboorunoti tunis ak ngoroik che ki inap Dorka ye kita komi kobooto icheek. Koyookto Petero tugul saang', kigutuny, ak kosaa. Kong'aanyei poorto, kole, “Tabitha, ing'eet.” Koyaat konyekyik, ak koger Petero, ak kotep. Ki goochi ineendet eunnyi ak koing'eeti. Ak ki guur tiliileen ak mosoogik, ak kobooru ineendet kosabei. Ak ki inai niito eng' Joppa komugul, ak ki iyan che chaang' Kiptaiyat. Ak ki meny ineendet Joppa peetuusyek che chaang', kobooto chii age ne kiguure Simion, ne chobei poorwek.