Kowong'ei Saulo Kaniset
Koitoi Saulo che iyani koba korgoreet, ak koip che kiyestoigei ng'olyoot kobooten. Koip Philipu chametapkei ak boiboiyet Samaria; kotem Simion punindet koald mieetap Kwandanyo, ak kimwachi kole ng'waan muguleldanyi. Eng' ooreetap surkwen kosoom kiboityotap Ethiopia kobatisan ineendet.
8 1Ki chame Saulo pareetap Stephen. Eng' peetuunooto ki ng'eet usiisyet ne oo agobo kanisetap Jerusalem, koyestoigei piik tugul kobatee che kiyooktoi eng' Judea ak Samaria. 2Ki rub murenik che konyiti Kamuktaindet Stephen ak koriir agobo ineendet eng' kutit ne oo. 3Ago ki wong'ei Saulo kaniset, kochut koriik tugul, koitoi murenik ak kwonyiik, kowiir korgoreet.
Amdooti Philipu eng' Samaria
4Ki pa anyun che kiyestoigei komoswek tugul, koamdooti logoiywek che myach che po ng'olyoot. 5Ki choorugei Philipu nganaseetap Samaria ak koamdaanji icheek Kristo. 6Ki igas tuiyosyek ng'aleegap Philipu kibagenge, ye kogas ak koger kaboorunoik che ki yai ineendet. 7Ki manda tamirmirik che murwonen eng' piik che chaang' che ki tinyei, kowaach eng' kutit ne oo; ak kisoop che chaang' che meiyotiin poorwek ak che ing'waldos. 8Ki mi anyun poiboiyet ne oo eng' nganasanooto.
9Ki mi chiito age ne kiguure Simion, ne ki igoiyae pooniik eng' nganasanooto, kot kokwong'iisyei piigap Samaria, kole ineendet ko chiito ne oo. 10Ki igas ineendet piik tugul, kobooch ne ming'in koit ne oo, koleenji, “Chiichi ko kimnateetap Kamuktaindet, ne kiguure Ne oo.” 11Ki igas ineendet amu ki kwong'iisyei icheek eng' ponikyik eng' kasarta ne koi. 12Ago ye kingo iyan logoiywek che myach che ki amdaanji Philipu agobo laitornatetap Kwandanyo ak kainetap Jeso Kristo, kibatisan murenik ak kwonyiik. 13Ki iyan Simion ineegei, ak kibatisan, ak kotebee neegit Philipu, kokwong'yo agobo kaboorunoik ak poisyonigap kimnateet che oo che ki geer.
14Ye kingo kas che kiyooktoi che mi Jerusalem kole kagotaach Samaria ng'olyootap Kwandanyo, koiyookto Petero ak Johana ole mi icheek. 15Ye kingo it, kosaachi icheek si konyoor Kabuuset ne Tiliil, 16amu kitom koibutyi Kabuuset ne Tiliil age tugul eng' icheek; ki kibatisan kityo eng' kainetap Kiptaiyat Jeso. 17Yeityo konde eunekwak icheek, ak konyoor Kabuuset ne Tiliil. 18Ye kingo keer Simion kole kigoochin Kabuuset eng' indetap eunegap che kiyooktoi, koochi icheek fedhaisyek, 19kole, “Koono kimnateet ni agine, si age tugul ne ande eunek konyoor Kabuuset ne Tiliil.” 20Koleenji Petero, “Ingobet fedhaisyeguk kobooto inyee, amu ki ibwaat ile imuuchi ial kaigaetap Kwandanyo eng' fedhaisyek! 21Ma itinye partoi anan kebeberta eng' ng'olyoondoni, amu ma karaaran muguleldang'ung' eng' taitap Kwandanyo. 22Ketite anyun yaityet ni, ak isaachi Kwandanyo si, ngo mugaksei, konyoetin kabwaatutigap muguleldang'ung'. 23Keere ile imi eng' nyigiis ne po ung'wan ak koratyin yaityet.”
24Kowol Simion kole, “Osachi Kamuktaindet agobo anee, si matonyowo age tugul eng' che kimwae.”
25Kingo kagobaoryan ak kong'alaal ng'olyootap Kiptaiyannyo Jeso, koweekyigei Jerusalem, koamdooti logoiywek che myach eng' kooriik che chaang' che po Samaria.
Philipu ak Ethiopiandet
26Yeityo koleenji angeetap Kwandanyo Philipu, “Ing'eet ak iwe murot, eng' ooreet ne choorugei kobun Jerusalem koba Gaza”—ne ooreetap surkwen. 27Ki ng'eet ak kowo. Ak keero, ki mi chiito ne po Ethiopia, kiboityot ne tilyot, kiboityotap Kandake laitoryatap Ethiopiaik, ne ki riibei kaonoreetap tuguukyik tugul, ne ki konyo Jerusalem si konyiti, a a v27 Kandake ko ma ki kainet ne po chiito, ago ki kaainetap laitornatet ne po kametap laitoryat eng' laitornatetap Kush, ne mi murotap Misiri. 28ak ki weekyigei, kotebee eng' charunnyi ak kosome maotyot Isaiah.
29Ak koleenji Kabuuset ne Tiliil Philipu, “Nyoon ak inamgei charunooto.”
30Ki labat Philipu, ak kogas kosome maotyot Isaiah, ak koteebe, “Inai kiy ne isome?”
31Kole, “Amuuchi ano, ngo matinye chiito ne indoiywo?” ak koguur Philipu kotogos kotebi kobooto ineendet. 32Ko ni siruutyet ne ki some: “Kou keechiir ne ki ib koba kebar, ak kou lakweetap keechiir ne silem eng' taitap ne tilei koroorik, kou nooto ma ki yaat kutinnyi. 33Eng' ng'anyotennyi ki keisto kaataamnatennyi. Ng'oo ne imuuchi komwa ibindanyi? Amu ki keisto saboondanyi eng' ng'wony.”
34Koleenji kiboityot Philipu, “Imwaiwo, agobo ng'oo ne mwaei maotyot ni—agobo ineegei, anan ko agobo chii age?”
35Ki yaat Philipu kutinnyi, ak kotaune eng' siruutyet ni, komwachi logoiywek che myach agobo Jeso. 36Ye kibendi ooreet, koit peek, ak kole kiboityot, “Keero, peek! Nee ne tang'uno si ma kibatisan?” b b v36 Siriisyek che ki tai ko ma tinyei isttaetap 37 yonaa; siriisyek che kinyo let koteso: “Ki le Philipu, ‘Ngot iyan eng' muguleldang'ung' tugul, imuuchi.’ Ak kowol kole, ‘Ayan ale Jeso Kristo ko Weeriitap Kamuktaindet.’” 38Ki ng'at kotang'un charu; kochoorugei icheek aeng' tugul eng' peek, Philipu ak kiboityot, ak kibatisan Philipu ineendet.
39Ye kingo ng'etunen eng' peek, koip Kabuusetap Kwandanyo Philipu; ak ma ki geer kiboityot ineendet agine, ago ki panda ooreennyi kobaibait. 40Ki nyoorgei Philipu eng' Azoto. Ki panda, koamdooti logoiywek che myach eng' nganasookyik tugul agoi koit Kaisarea.