Dinadael ni Saulo ti Iglesia

Guyguyoden ni Saulo dagiti mamati iti pagbaludan, ket dagiti naiwaras ket ipanda ti mensahe. Iyeg ni Felipe ti pannakaagas ken rag-o iti Samaria; padasen ni Simon a salamangkero a gatangen ti sagut ni Amatayo ket maibaga kenkuana a nasabidong ti pusona. Iti dalan iti let-ang, maysa nga opisial a taga-Etiopia ti agkiddaw a mabautisaran.

Kapitulo 8.

Immannugot ni Saulo iti pannakapapatay ni Esteban. Iti dayta nga aldaw, nangrugi ti dakkel a pannakaidadanes iti iglesia idiay Jerusalem, ket naiwaras amin, malaksid kadagiti apostol, iti intero a Judea ken Samaria. Intanem dagiti nadiosan a lallaki ni Esteban ket nagladingitda a nagsangit iti napigsa gapu kenkuana. Ngem ni Saulo ket dinadaelna ti iglesia, sumrekna iti balay ken balay, kinaladkadna dagiti lallaki ken babbai, ket imbaonna ida iti presuan.

Impakaammo ni Felipe ti Naimbag a Damag idiay Samaria

Isu ngarud, napan iti sadinoman dagiti naiwaras, a mangipakpakaammo iti naimbag a damag ti sao. Simmalog ni Felipe iti siudad ti Samaria ket inwaragawagna ni Cristo kadakuada. Nagkaykaysa a nangimano dagiti adu a tattao kadagiti imbagbaga ni Felipe, idi nangngegda ken nakitada dagiti pagilasinan nga inaramidna. Rimmuar dagiti narugit nga espiritu kadagiti adu a nasaniban, nga agpukpukkaw iti napigsa, ket naagasan dagiti adu a nalumpo ken napilay. Isu nga adda dakkel nga ragsak iti dayta a siudad.

Adda idi maysa a lalaki nga agnagan Simon, nga nagaramid dan iti salamangka iti dayta a siudad, a pinagsiddaawna dagiti tattao ti Samaria ket imbagana a isu ket maysa a dakkel a tao. Dinegdegngan isuna amin, manipud iti kabassitan agingga iti kadakkelan, ket kinunada, “Daytoy a lalaki ket isu ti pigsa ti Dios, a maawagan iti Dakkel.” Nangnangegda kenkuana gapu ta iti nabayag a panawen pinagsiddaawna ida babaen ti salamangkana. Ngem idi namatida iti naimbag a damag nga impakaammo ni Felipe maipapan iti pagarian ni Amatayo ken iti nagan ni Jesu-Cristo, nabautisaran dagiti lallaki ken babbai. Namati met ni Simon a mismo, nabautisaran, ket nagtalinaed iti abay ni Felipe, a naseddaaw kadagiti pagilasinan ken dadakkel a milagro a nakitana.

Idi nangngeg dagiti apostol idiay Jerusalem a inawat ti Samaria ti sao ni Amatayo, imbaonda da Pedro ken Juan kadakuada. Idi nakadanonda, nagkararagda para kadakuada tapno awatenda ti Espiritu Santo, ta saan pay a simmapul ti Espiritu Santo iti asinoman kadakuada; nabautisaranda laeng iti nagan ni Apo Jesus. Kalpasanna, inkabilda dagiti imada kadakuada, ket inawatda ti Espiritu Santo. Idi nakita ni Simon a naited ti Espiritu babaen ti panangikabil dagiti apostol kadagiti imada, indawatna kadakuada ti kuarta, ket kinunana, “Itedyo met kaniak daytoy a pannakabalin, tapno asinoman a pagikabilak kadagiti imak ket awatenna ti Espiritu Santo.” Kinuna ni Pedro kenkuana, “Madadaelka koma a kadua ti pilakmo, gapu ta pinanunotmo a mabalinmo a gatangen ti sagut ni Amatayo babaen ti kuarta! Awan ti pasetmo wenno bingaymo iti daytoy a banag, ta saan a nalinteg ti pusom iti sangoanan ni Amatayo. Agbabawika ngarud iti daytoy a kinadakes, ket agkararagka ken ni Amatayo, tapno no mabalin, mapakawan koma kenka ti panggep ti pusom. Makitak a nalasonka iti pait ken nakaweska iti kinadakes.”

Insungbat ni Simon, “Ikararagyo ak ken ni Dios, tapno awan kadagiti naibagayo ti mapasamak kaniak.”

Isu ngarud, kalpasan a nagsaksi ken insaoda ti sao ni Apotayo a Jesus, nagsublida idiay Jerusalem, a mangipakpakaammo iti naimbag a damag kadagiti adu nga ili ti Samaria.

Ni Felipe ken ti Taga-Etiopia

Kalpasanna, imbaga ti anghel ni Amatayo ken ni Felipe, “Bumangonka ket mapanka iti abagatan, iti dalan a bumaba manipud Jerusalem agingga idiay Gaza”—maysa a let-ang a dalan. Timmakder ket napan. Adda maysa a eunuko a taga-Etiopia, opisial ni Candace, ti reyna dagiti taga-Etiopia, nga isu ti mangimatmat iti intero a pagidulinan ti kuartana, a napan idiay Jerusalem tapno agdayaw, ^a ket agsubsubli, nakatugaw iti karwahena ken agbasbasa iti naisurat ni Isaias a propeta.

Kinuna ti Espiritu Santo ken ni Felipe, “Umasidegka ket sarakenmo dayta a karwahe.”

Nagtaray ni Felipe a immasideg, nangngegna nga agbasbasa isuna iti naisurat ni Isaias a propeta, ket sinaludsodna, “Maawatam kadi ti basaem?”

Kinunana, “Kasano a maawatak, no awan ti mangiwanwan kaniak?” ket inawisna ni Felipe a sumang-at tapno makitugaw kenkuana. Ita, ti paset ti Nasantuan a Kasuratan a basbasaenna ket daytoy: “Kas karnero, naiturong isuna iti pannakapapatay, ken kas kordero a naulimek iti sangoanan ti mangputputed iti buokna, kasta met a saanna a linukatan ti ngiwatna. Iti pannakaibabana, ti hustisia naiparit kenkuana. Siasino ti makailawlawag iti kaputotanna? Ta maikkat ti biagna manipud iti daga.”

Kinuna ti eunuko ken ni Felipe, “Ibagam kaniak, siasino ti pakaibagaan ti propeta iti daytoy—isuna a mismo, wenno sabali a tao?”

Inlukat ni Felipe ti ngiwatna ket, nangrugi iti daytoy a Kasuratan, impakaammona kenkuana ti naimbag a damag maipapan ken ni Jesus. Bayat a magmagnada iti dalan, nakadanonda iti danum, ket kinuna ti eunuko, “Kitaem, adda danum! Ania ti manglapped kaniak a mabautisaran?” ^b Imbilinna nga isardeng ti karwahe; simmalog a dua iti danum, ni Felipe ken ti eunuko, ket binautisaran ni Felipe isuna.

Idi rimmuarda manipud iti danum, innala a dagus ti Espiritu ni Amatayo ni Felipe; saanen a nakita ti eunuko, ngem intuloyna ti dalanna nga agrag-o. Nasarakan ni Felipe ti bagina nga adda idiay Azoto. Nagdaliasat isuna, a mangipakpakaammo iti naimbag a damag iti tunggal ili agingga a nakadanon idiay Cesarea.