ሐዋርያት ሥራ 8

8 ¹ሳውልም እስጢፋኖስ መገደሉን ደግፎ ነበር። በዚያም ቀን በኢየሩሳሌም ቤተ ክርስቲያን ላይ ታላቅ ስደት ተነሣ፤ ከሐዋርያት በስተቀር ሁሉም በይሁዳና በሰማርያ አገሮች ተበተኑ። ²ደጋግ ሰዎች እስጢፋኖስን ቀበሩት፤ ስለ እርሱም ከፍ ባለ ድምፅ አለቀሱ። ³ሳውል ግን ከቤት ወደ ቤት እየገባ፣ ወንዶችንና ሴቶችን እየጎተተ ወደ እስር ቤት እየጣለ ቤተ ክርስቲያንን ያጠፋ ነበር።

ፊልጶስ በሰማርያ ይሰብካል

⁴የተበተኑትም የቃሉን ወንጌል እየሰበኩ በየስፍራው ሄዱ። ⁵ፊልጶስም ወደ ሰማርያ ከተማ ወርዶ ክርስቶስን ሰበከላቸው። ⁶ብዙ ሕዝብ ፊልጶስ የሚያደርገውን ምልክት እየሰሙና እያዩ፣ የተናገረውን በአንድ ልብ አዳመጡ። ⁷ርኩሳን መናፍስት በታላቅ ድምፅ እየጮኹ፣ ካደረባቸው ከብዙዎች ወጡ፤ ብዙ ሽባዎችና አንካሶችም ተፈወሱ። ⁸በዚያችም ከተማ ታላቅ ደስታ ሆነ።

⁹ሲሞን የሚባል አንድ ሰው ግን ቀድሞ በዚያች ከተማ ጥንቆላ ይሠራ፤ የሰማርያንም ሕዝብ እያስደነቀ ራሱን ታላቅ ሰው አድርጎ ያቀርብ ነበር። ¹⁰ከታናሹ እስከ ታላቁ ሁሉም፣ “ይህ ሰው ታላቅ ተብሎ የሚጠራ የእግዚአብሔር ኀይል ነው” እያሉ ያዳምጡት ነበር። ¹¹ለረጅም ጊዜ በጥንቆላው ስላስደነቃቸው፣ ትኩረት ይሰጡት ነበር። ¹²ነገር ግን ፊልጶስ ስለ አባታችን መንግሥትና ስለ ኢየሱስ ክርስቶስ ስም የሰበከላቸውን ወንጌል ባመኑ ጊዜ፣ ወንዶችም ሴቶችም ተጠመቁ። ¹³ሲሞንም ራሱ አመነ፤ ተጠመቀም፤ ያየውንም ምልክትና ታላቅ ተአምር እያደነቀ ከፊልጶስ ጋራ ተጠግቶ ቆየ።

¹⁴በኢየሩሳሌም የነበሩ ሐዋርያት ሰማርያ የአባታችንን ቃል እንደ ተቀበለች በሰሙ ጊዜ፣ ጴጥሮስንና ዮሐንስን ወደ እነርሱ ላኩ። ¹⁵በመጡም ጊዜ መንፈስ ቅዱስን እንዲቀበሉ ስለ እነርሱ ጸለዩ፤ ¹⁶ገና በአንዳቸውም ላይ መንፈስ ቅዱስ አልወረደም ነበርና፤ በጌታ ኢየሱስ ስም ብቻ ተጠምቀው ነበር። ¹⁷ከዚያም እጆቻቸውን ጫኑባቸው፤ እነርሱም መንፈስ ቅዱስን ተቀበሉ። ¹⁸ሲሞንም በሐዋርያት እጅ መጫን መንፈስ እንደ ተሰጠ ባየ ጊዜ ገንዘብ አቀረበላቸው፤ ¹⁹“እጄን የምጭንበት ሁሉ መንፈስ ቅዱስን እንዲቀበል፣ ይህን ኀይል ለእኔም ስጡኝ” አለ። ²⁰ጴጥሮስም፣ “የአባታችንን ስጦታ በገንዘብ ልትገዛ ስለ አሰብህ፣ ብርህ ከአንተ ጋራ ይጥፋ! ²¹በዚህ ነገር ዕድል ፈንታም ሆነ ድርሻ የለህም፤ ልብህ በአባታችን ፊት ቅን አይደለምና። ²²ስለዚህ ከዚህ ክፋትህ ተመለስ፤ ቢቻልም የልብህ አሳብ ይቅር እንዲባልልህ ወደ አባታችን ጸልይ። ²³በምሬት መርዝ ተመርዘህ፣ በክፋትም ማሰሪያ ታስረህ አያለሁ” አለው።

²⁴ሲሞንም መልሶ፣ “ከተናገራችሁት ነገር አንዳች በእኔ ላይ እንዳይደርስ፣ እናንተ ወደ እግዚአብሔር ጸልዩልኝ” አለ።

²⁵እነርሱም መስክረው የጌታችንን የኢየሱስን ቃል ከተናገሩ በኋላ፣ በብዙ የሰማርያ መንደሮች ወንጌልን እየሰበኩ ወደ ኢየሩሳሌም ተመለሱ።

ፊልጶስና ኢትዮጵያዊው

²⁶የአባታችንም መልአክ ፊልጶስን፣ “ተነሥተህ ከኢየሩሳሌም ወደ ጋዛ ወደሚወርደው መንገድ ወደ ደቡብ ሂድ” አለው፤ ይህም የምድረ በዳ መንገድ ነው። ²⁷ተነሥቶም ሄደ። እነሆም፣ የኢትዮጵያ ንግሥት የህንደኬ ባለሟል የሆነ፣ ግምጃ ቤቷን ሁሉ የሚያስተዳድር አንድ ኢትዮጵያዊ ጃንደረባ ነበረ፤ እርሱም ሊሰግድ ወደ ኢየሩሳሌም መጥቶ ነበር፤ ^a a v27 ህንደኬ የግል ስም ሳይሆን፣ ከግብፅ በስተ ደቡብ ያለችው የኩሽ መንግሥት ንግሥተ እናት የንጉሣዊ ማዕረግ ስም ነበር። ²⁸በሠረገላውም ተቀምጦ የነቢዩን የኢሳይያስን መጽሐፍ እያነበበ ይመለስ ነበር።

²⁹መንፈስ ቅዱስም ፊልጶስን፣ “ወደዚያ ሠረገላ ቀርበህ ተከተለው” አለው።

³⁰ፊልጶስም ሮጦ ሄዶ የነቢዩን የኢሳይያስን መጽሐፍ ሲያነብ ሰማው፤ “የምታነበውንስ ታስተውለዋለህን?” ብሎም ጠየቀው።

³¹እርሱም፣ “የሚመራኝ ሰው ባይኖር እንዴት ልችል?” አለ፤ ፊልጶስም ወጥቶ ከእርሱ ጋራ እንዲቀመጥ ለመነው። ³²ያነበበውም የመጽሐፉ ክፍል ይህ ነበር፤ “እንደ በግ ወደ መታረድ ተነዳ፤ እንደ ዝም ያለ ጠቦትም በሸላቹ ፊት፣ እንዲሁ አፉን አልከፈተም። ³³በውርደቱ ፍርድ ተከለከለ። ትውልዱንስ ማን ሊናገር ይችላል? ሕይወቱ ከምድር ተወስዳለችና።”

³⁴ጃንደረባውም ፊልጶስን፣ “እባክህ ንገረኝ፤ ነቢዩ ይህን ስለ ማን ይናገራል? ስለ ራሱ ነውን ወይስ ስለ ሌላ ሰው?” አለው።

³⁵ፊልጶስም አፉን ከፍቶ ከዚህ የመጽሐፍ ክፍል ጀምሮ ስለ ኢየሱስ ወንጌልን ነገረው። ³⁶በመንገድም ሲሄዱ ወደ ውሃ ደረሱ፤ ጃንደረባውም፣ “እነሆ ውሃ! እንዳልጠመቅ የሚከለክለኝ ምንድን ነው?” አለ። ^b b v36 ጥንታዊዎቹ ቅጂዎች እዚህ ላይ ቍጥር ፴፯ የላቸውም፤ የኋለኞቹ ቅጂዎች ግን እንዲህ ይጨምራሉ፤ “ፊልጶስም፣ ‘በፍጹም ልብህ ብታምን ተፈቅዶልሃል’ አለ። እርሱም መልሶ፣ ‘ኢየሱስ ክርስቶስ የእግዚአብሔር ልጅ እንደ ሆነ አምናለሁ’ አለ።” ³⁸ሠረገላውም እንዲቆም አዘዘ፤ ፊልጶስና ጃንደረባው ሁለቱም ወደ ውሃ ውስጥ ወረዱ፤ ፊልጶስም አጠመቀው።

³⁹ከውሃውም በወጡ ጊዜ፣ የአባታችን መንፈስ ፊልጶስን ነጠቀው፤ ጃንደረባውም ዳግመኛ አላየውም፤ ነገር ግን ደስ እያለው በመንገዱ ሄደ። ⁴⁰ፊልጶስ ግን በአዛጦን ተገኘ፤ ወደ ቂሳርያ እስኪደርስ ድረስ በሚያልፍባቸው ከተሞች ሁሉ ወንጌልን እየሰበከ አለፈ።