அப்போஸ்தலர் 8

8 ¹ஸ்தேவானை கொலைசெய்ததற்கு சவுல் சம்மதித்தான். அந்த நாளிலே எருசலேமிலுள்ள சபைக்கு விரோதமாய் மிகுந்த துன்பம் மூண்டது; அப்போஸ்தலர்களைத் தவிர மற்ற யாவரும் யூதேயா, சமாரியா நாடுகள் எங்கும் சிதறடிக்கப்பட்டார்கள். ²பக்தியுள்ள மனிதர்கள் ஸ்தேவானை அடக்கம்பண்ணி, அவனுக்காக மிகவும் புலம்பி அழுதார்கள். ³சவுலோ சபையை அழித்து, வீடுவீடாய் நுழைந்து, ஆண்களையும் பெண்களையும் இழுத்துக்கொண்டுபோய், சிறையிலே அடைத்தான்.

பிலிப்பு சமாரியாவில் அறிவிக்கிறான்

⁴அப்படி சிதறடிக்கப்பட்டவர்கள் எங்கும் சென்று, வார்த்தையின் நற்செய்தியை அறிவித்தார்கள். ⁵பிலிப்பு சமாரியா பட்டணத்திற்குப் போய், அங்குள்ளவர்களுக்கு கிறிஸ்துவை அறிவித்தான். ⁶பிலிப்பு செய்த அடையாளங்களைக் கேட்டும் கண்டும், ஜனக்கூட்டங்கள் ஒருமனதாய் அவனுடைய வார்த்தைகளைக் கவனித்தார்கள். ⁷அசுத்த ஆவிகள் பிடித்திருந்த அநேகரிடமிருந்து அவைகள் உரத்த சத்தமிட்டு வெளியேறின; திமிர்வாதக்காரரும் சப்பாணிகளுமான அநேகர் சொஸ்தமாக்கப்பட்டார்கள். ⁸அதினால் அந்தப் பட்டணத்திலே மிகுந்த சந்தோஷம் உண்டாயிற்று.

⁹சீமோன் என்னும் ஒரு மனிதன் அந்தப் பட்டணத்திலே ஏற்கெனவே சூனியம்பண்ணி, தன்னை ஒரு பெரியவனாகக் காண்பித்து, சமாரியா ஜனங்களை பிரமிக்கப்பண்ணிக்கொண்டிருந்தான். ¹⁰சிறியோர் முதல் பெரியோர் வரை எல்லாரும் அவனுக்குச் செவிகொடுத்து, “பெரியது என்று அழைக்கப்படுகிற தேவனுடைய வல்லமை இந்த மனிதனே” என்றார்கள். ¹¹நெடுங்காலமாய் அவன் தன் சூனியத்தினால் அவர்களை பிரமிக்கப்பண்ணியிருந்ததால், அவர்கள் அவனைக் கவனித்துக்கொண்டிருந்தார்கள். ¹²ஆனால் எங்கள் பிதாவின் ராஜ்யத்தையும் இயேசுகிறிஸ்துவின் நாமத்தையும் குறித்து பிலிப்பு அறிவித்த நற்செய்தியை அவர்கள் விசுவாசித்தபோது, ஆண்களும் பெண்களும் ஞானஸ்நானம் பெற்றார்கள். ¹³சீமோனும் விசுவாசித்து, ஞானஸ்நானம் பெற்று, பிலிப்புவோடு உடன்சேர்ந்திருந்து, நடந்த அடையாளங்களையும் பெரிய அற்புதங்களையும் கண்டு பிரமித்தான்.

¹⁴சமாரியா நாட்டார் எங்கள் பிதாவின் வார்த்தையை ஏற்றுக்கொண்டதை எருசலேமிலிருந்த அப்போஸ்தலர்கள் கேள்விப்பட்டபோது, பேதுருவையும் யோவானையும் அவர்களிடத்திற்கு அனுப்பினார்கள். ¹⁵அவர்கள் வந்து, அவர்கள் பரிசுத்த ஆவியானவரைப் பெற்றுக்கொள்ளும்படி அவர்களுக்காக ஜெபம்பண்ணினார்கள். ¹⁶ஏனெனில் அவர்களில் ஒருவர்மேலும் பரிசுத்த ஆவியானவர் இன்னும் இறங்கியிருக்கவில்லை; அவர்கள் கர்த்தராகிய இயேசுவின் நாமத்திலே ஞானஸ்நானம் மாத்திரம் பெற்றிருந்தார்கள். ¹⁷அப்பொழுது அவர்கள் தங்கள் கைகளை அவர்கள்மேல் வைத்தார்கள்; அவர்கள் பரிசுத்த ஆவியானவரைப் பெற்றுக்கொண்டார்கள். ¹⁸அப்போஸ்தலர்கள் கைகளை வைக்கிறதினால் ஆவியானவர் அளிக்கப்படுகிறதை சீமோன் கண்டபோது, அவர்களுக்குப் பணத்தைக் கொடுத்து, ¹⁹“நான் யார்மேல் கைகளை வைக்கிறேனோ அவர்கள் பரிசுத்த ஆவியானவரைப் பெறும்படி, இந்த வல்லமையை எனக்கும் கொடுங்கள்” என்றான். ²⁰அதற்குப் பேதுரு அவனை நோக்கி: “தேவனுடைய வரத்தைப் பணத்தினாலே பெற்றுக்கொள்ளலாம் என்று நீ நினைத்தபடியால், உன் வெள்ளி உன்னோடேகூட அழிந்துபோகக்கடவது! ²¹இந்தக் காரியத்தில் உனக்குப் பங்கும் இல்லை, பாகமும் இல்லை; ஏனெனில் உன் இருதயம் எங்கள் பிதாவுக்கு முன்பாக செம்மையாயிருக்கவில்லை. ²²ஆகையால் இந்தத் தீமையைவிட்டு மனந்திரும்பி, உன் இருதயத்தின் நினைவு உனக்கு மன்னிக்கப்படும்படி கூடுமானால் எங்கள் பிதாவை நோக்கி வேண்டிக்கொள். ²³நீ கசப்பினாலே நஞ்சூட்டப்பட்டு, தீமையினாலே கட்டப்பட்டிருக்கிறதை நான் காண்கிறேன்” என்றான்.

²⁴அதற்கு சீமோன்: “நீங்கள் சொன்னவைகளில் ஒன்றும் என்மேல் வராதபடிக்கு, எனக்காக தேவனை நோக்கி வேண்டிக்கொள்ளுங்கள்” என்றான்.

²⁵இப்படியாக அவர்கள் சாட்சிகூறி, நம்முடைய கர்த்தராகிய இயேசுவின் வார்த்தையைப் பேசினபின்பு, சமாரியருடைய அநேக கிராமங்களில் நற்செய்தியைப் பிரசங்கித்து, எருசலேமுக்குத் திரும்பினார்கள்.

பிலிப்பும் எத்தியோப்பியனும்

²⁶பின்பு எங்கள் பிதாவின் தூதன் பிலிப்பை நோக்கி: “நீ எழுந்து, எருசலேமிலிருந்து காசாவுக்குப் போகிற வழியிலே தெற்குமுகமாய்ப் போ” என்றான்—அது வனாந்தரமான வழி. ²⁷அவன் எழுந்து போனான். அப்பொழுது எத்தியோப்பியருடைய ராணியாகிய கந்தாகேயின் ஒரு பிரதானியும், அவளுடைய பொக்கிஷம் அனைத்திற்கும் அதிகாரியுமான ஓர் எத்தியோப்பிய அண்ணகன் தொழுதுகொள்ளும்படி எருசலேமுக்கு வந்திருந்தான். ^a a v27 கந்தாகே என்பது ஒருவரின் சொந்தப் பெயர் அல்ல; அது எகிப்துக்குத் தெற்கேயுள்ள கூஷ் ராஜ்யத்தின் ராஜமாதாவுக்குரிய அரச பட்டமாயிருந்தது. ²⁸அவன் திரும்பிப்போகும்போது, தன் இரதத்தில் உட்கார்ந்து, ஏசாயா தீர்க்கதரிசியின் புத்தகத்தை வாசித்துக்கொண்டிருந்தான்.

²⁹பரிசுத்த ஆவியானவர் பிலிப்பை நோக்கி: “நீ போய், அந்த இரதத்தை நெருங்கிச் சேர்ந்துகொள்” என்றார்.

³⁰பிலிப்பு ஓடிச்சென்று, அவன் ஏசாயா தீர்க்கதரிசியின் புத்தகத்தை வாசிக்கிறதைக் கேட்டு, “நீ வாசிக்கிறது உனக்கு விளங்குகிறதா?” என்று கேட்டான்.

³¹அதற்கு அவன்: “ஒருவர் எனக்கு வழிகாட்டாவிட்டால் அது எனக்கு எப்படி விளங்கும்?” என்று சொல்லி, பிலிப்பைத் தன்னோடு உட்காரும்படி ஏறிவரும்படி அழைத்தான். ³²அவன் வாசித்துக்கொண்டிருந்த வேதவாக்கியப் பகுதி இதுவே: “ஆடு அடிக்கப்படுவதற்குக் கொண்டுசெல்லப்படுவதுபோலவும், மயிர்கத்தரிக்கிறவனுக்கு முன்பாக மவுனமாயிருக்கிற ஆட்டுக்குட்டியைப்போலவும், அவர் தம்முடைய வாயைத் திறவாதிருந்தார். ³³அவர் தாழ்த்தப்பட்டதில் அவருக்கு நீதி மறுக்கப்பட்டது. அவருடைய சந்ததியை யார் விவரிப்பார்? அவருடைய ஜீவன் பூமியிலிருந்து எடுபட்டுப்போயிற்றே.”

³⁴அப்பொழுது அந்த அண்ணகன் பிலிப்பை நோக்கி: “தீர்க்கதரிசி இதை யாரைக்குறித்துச் சொல்லுகிறார்? தன்னைக்குறித்தோ, வேறொருவரைக்குறித்தோ? எனக்குச் சொல்லும்” என்றான்.

³⁵அப்பொழுது பிலிப்பு தன் வாயைத் திறந்து, இந்த வேதவாக்கியத்தில் தொடங்கி, இயேசுவைக்குறித்த நற்செய்தியை அவனுக்கு அறிவித்தான். ³⁶அவர்கள் வழியே பிரயாணமாய்ப்போகையில் தண்ணீருள்ள ஓரிடத்தை அடைந்தார்கள்; அப்பொழுது அண்ணகன்: “இதோ, தண்ணீர்! நான் ஞானஸ்நானம் பெறுவதற்கு என்ன தடை?” என்றான். ^b b v36 ஆரம்பகால கையெழுத்துப் பிரதிகளில் இங்கே 37-ஆம் வசனம் இல்லை; பிற்காலப் பிரதிகள் இவ்வாறு சேர்க்கின்றன: “அதற்குப் பிலிப்பு, ‘நீ முழு இருதயத்தோடும் விசுவாசித்தால் ஆகலாம்’ என்றான். அவன் மறுமொழியாக, ‘இயேசுகிறிஸ்து தேவகுமாரன் என்று விசுவாசிக்கிறேன்’ என்றான்.” ³⁸அவன் இரதத்தை நிறுத்தும்படி கட்டளையிட்டான்; பிலிப்பும் அண்ணகனுமாகிய இருவரும் தண்ணீரில் இறங்கினார்கள்; பிலிப்பு அவனுக்கு ஞானஸ்நானம் கொடுத்தான்.

³⁹அவர்கள் தண்ணீரிலிருந்து ஏறினபோது, எங்கள் பிதாவின் ஆவி பிலிப்பைத் தூக்கிக்கொண்டுபோய்விட்டது; அண்ணகன் அவனைப் பின்பு காணாமல், சந்தோஷத்தோடே தன் வழியே போனான். ⁴⁰பிலிப்பு அசோத்து பட்டணத்திலே காணப்பட்டான்; அவன் அங்கிருந்து கடந்துபோய், செசரியா பட்டணத்தை அடையும்வரை ஒவ்வொரு ஊரிலும் நற்செய்தியை அறிவித்துக்கொண்டேபோனான்.