ግብሪ ሃዋርያት 9 FHB Father's Heart Bible™

9 ¹ሳውል ግና፥ ገና ኣብ ልዕሊ ደቀ መዛሙርቲ ጐይታ ምፍርራህን ቅትለትን እናተንፈሰ፥ ናብ ሊቀ ካህናት ከደ፤ ²ካብ ሰዓብቲ እታ መንገዲ ዝኾኑ፥ ሰብኡት ኮኑ ኣንስቲ፥ እንተ ረኺቡ፥ ኣሲሩ ናብ ኢየሩሳሌም ምእንቲ ኸምፅኦም፥ ናብ ኣብያተ ፀሎት ደማስቆ ዝኸውን መልእኽቲ ሓተቶ። ^a a v2 “እታ መንገዲ” ዝብል፥ ክርስትያናት ቅድሚ ምብሃሎም፥ ንሰዓብቲ ኢየሱስ ዝወሃብ ዝነበረ ቐዳማይ ስም እዩ። ³ክኸይድ እንተሎ ናብ ደማስቆ እናቐረበ ከሎ፥ ሃንደበት ካብ ሰማይ ብርሃን ኣብ ዙርያኡ ኣንፀባረቐ።

⁴ናብ ምድሪ ድማ ወደቐ፤ “ሳውል፥ ሳውል፥ ስለ ምንታይ ትሰጎኒ ኣለኻ?” ዝብል ድምፂ ኸዓ ሰምዐ።

⁵ንሱ ድማ “ጐይታይ፥ ንስኻ መን ኢኻ?” በለ። ንሱ ኸዓ “ኣነ እቲ ንስኻ እትሰጎ ዘለኻ ኢየሱስ እየ።

⁶ግና ተሲእካ ናብታ ኸተማ እቶ፤ እቲ ክትገብሮ ዝግብአካ ኸዓ ክንገረካ እዩ።”

⁷እቶም ምስኡ ዝኸዱ ዝነበሩ ሰባት ድማ፥ ድምፂ እናሰምዑ ሓደ እኳ ግና እንተይረኣዩ፥ ቃል ስኢኖም ደው በሉ። ⁸ሳውል ድማ ካብ ምድሪ ተስአ፤ ኣዒንቱ ኸፊቱ ግና ገለ እኳ ኣይረኣየን፤ ብኢዱ ሒዞም ድማ ናብ ደማስቆ ኣእተውዎ። ⁹ሰለስተ መዓልቲ ኸዓ ዓዊሩ ነበረ፤ ኣይበልዐን ኣይሰተየን።

¹⁰ኣብ ደማስቆ ኸዓ ሃናንያስ ዝስሙ ሓደ ደቀ መዝሙር ነበረ። ጐይታ ድማ ብራእይ “ሃናንያስ” በሎ። ንሱ ኸዓ “እኔኹ፥ ጐይታይ” ኢሉ መለሰ።

¹¹ጐይታ ድማ ከምዙይ በሎ፦ “ተሲእካ ናብታ ‘ቅንዕቲ’ ተብሂላ እትፅዋዕ መንገዲ ኪድ፤ ኣብ ቤት ይሁዳ ድማ ሳውል ዝስሙ፥ ሰብ ጠርሴስ ድለ፤ እንሆ፥ ይፅሊ ኣሎ እሞ፥ ¹²ሃናንያስ ዝስሙ ሰብ ኣትዩ፥ መሊሱ ምእንቲ ኽርኢ ኸዓ ኢዱ ኣብ ልዕሊኡ ኸንብር፥ ብራእይ ርእዩ ኣሎ።”

¹³ሃናንያስ ድማ ከምዙይ ኢሉ መለሰ፦ “ጐይታይ፥ ብዛዕባ እዝ ሰብኣይ እዙይ፥ ኣብ ኢየሩሳሌም ኣብ ልዕሊ ቅዱሳንካ ኽንደይ ክፍኣት ከም ዝገበረ፥ ብዙሓት ነጊሮሙኒ ኣለዉ። ¹⁴እንሆ ድማ፥ ንዅሎም እቶም ብስምካ ዝፅውዑ ኽኣስር፥ ካብ ሊቃውንቲ ካህናት ስልጣን ኣለዎ።”

¹⁵ጐይታ ግና ከምዙይ በሎ፦ “ኪድ፤ እዝ ሰብኣይ እዙይ፥ ስመይ ኣብ ቅድሚ ኣህዛብን ነገስታትን ደቂ እስራኤልን ክፅውዕ፥ ዝሓረኽዎ መሳርሒ እዩ እሞ። ¹⁶ምእንቲ ስመይ ኢሉ ኽንደይ መከራ ኽቕበል ከም ዝግብኦ፥ ኣነ ኽርእዮ እየ እሞ።”

¹⁷ሃናንያስ ከዓ ከይዱ ናብታ ቤት ኣተወ፤ ኣብ ልዕሊ ሳውል ኢዱ ኣንቢሩ ኸዓ ከምዙይ በሎ፦ “ሓወይ ሳውል፥ እቲ ብእትኸዶ ዝነበርካ መንገዲ ዝተገለፀልካ ጐይታ ኢየሱስ፥ መሊስካ ምእንቲ ኽትርኢ፥ ብመንፈስ ቅዱስ ድማ ምእንቲ ኽትመልእ፥ ናባኻ ለኣኸኒ።” ¹⁸ሽዑ ንሽዑ ኸዓ፥ ከም ቅረፍቲ ዝኾነ ነገር ካብ ኣዒንቱ ወደቐ፤ መሊሱ ድማ ረአየ። ተሲኡ ኸዓ ተጠምቀ፤ ¹⁹ምስ በልዐ ድማ ሓይሉ ተመለሰ። ገለ መዓልቲታት ከዓ ምስቶም ኣብ ደማስቆ ዝነበሩ ደቀ መዛሙርቲ ነበረ፤ ²⁰ሽዑ ንሽዑ ድማ፥ ኣብ ኣብያተ ፀሎት፥ ኢየሱስ ንሱ ወዲ ኣቦና ኸም ዝኾነ ክሰብኽ ጀመረ። ²¹እቶም ዝሰምዑ ዅሎም ከዓ ተገሪሞም፥ ከምዙይ በሉ፦ “እዝ ሰብኣይ እዙይ፥ እቲ ኣብ ኢየሩሳሌም ኣብ መንጎ እቶም በዝ ስም እዙይ ዝፅውዑ ኽንድዙይ ዝበሃል ዕንወት ዘውረደ ደይኮነን? ኣብዙይውን ኣሲሩ ናብ ሊቃውንቲ ካህናት ከምፅኦም ኢሉ ዝመፀ ደይኮነን?”

²²ሳውል ግና ኣዝዩ እናበርትዐ ኸደ፤ እዝ ሰብ እዙይ ክርስቶስ ከም ዝኾነ ብምርግጋፅ ድማ ነቶም ኣብ ደማስቆ ዝነብሩ ኣይሁድ ኣገረሞም።

²³ብዙሕ መዓልቲታት ምስ ሓለፈ ኸዓ፥ ኣይሁድ ክቐትልዎ ተማኸሩ፤ ²⁴ሳውል ግና ተንኰሎም ፈለጠ፤ ክቐትልዎ ኢሎም ድማ ለይትን መዓልትን ነቶም ኣፍ ደገታት ይሕልዉ ነበሩ። ²⁵ደቀ መዛሙርቱ ግና ብለይቲ ወሲዶም፥ ብመንደቕ ኣቢሎም ኣብ ሰፈድ ገይሮም ኣውረድዎ።

²⁶ናብ ኢየሩሳሌም ምስ በፅሐ ኸዓ፥ ምስ ደቀ መዛሙርቲ ክሕበር ፈተነ፤ ደቀ መዝሙር ምዃኑ እንተይኣመኑ ግና ኵሎም ፈርሕዎ። ²⁷በርናባስ ግና ወሲዱ ናብ ሃዋርያት ኣምፅኦ፤ ሳውል ኣብ መንገዲ ንጐይታ ኸም ዝረኣዮ፥ ንሱ ድማ ከም ዝተዛረቦ፥ ኣብ ደማስቆ ኸዓ ብስም ኢየሱስ ብትብዓት ከም ዝተዛረበ ነገሮም። ²⁸ስለዙይ ምሳታቶም ነበረ፤ ኣብ ኢየሩሳሌም ብናፃ እናተንቀሳቐሰ፥ ብስም ጐይታ ብትብዓት ይዛረብ ነበረ። ²⁹ምስቶም ፅርኣውያን ይዛረብ፥ ይማጐትውን ነበረ፤ ንሳቶም ግና ክቐትልዎ ይደልዩ ነበሩ። ^b b v29 ፅርኣውያን፦ ቋንቋ ግሪኽን ባህሉን ዝተቐበሉ፥ ግሪኽ ዝዛረቡ ኣይሁድ እዮም። ³⁰እቶም ኣሕዋት እዙይ ምስ ፈለጡ ኸዓ፥ ናብ ቂሳርያ ኣውረድዎ፤ ናብ ጠርሴስ ድማ ሰደድዎ።

ወልድ ብጴጥሮስ ኣቢሉ ንኤንያስ ኣሕወዮ

³¹ስለዙይ እታ ኣብ ኵላ ይሁዳ፥ ገሊላ፥ ሰማርያን ዝነበረት ቤተ ክርስቲያን፥ ሰላም ረኸበት፤ በርትዐትውን፤ ብፍርሓት ጐይታ እናተመላለሰት፥ ብመንፈስ ቅዱስ ድማ እናተፀናንዐት፥ ብቚፅሪ በዝሐ።

³²ጴጥሮስ ኣብ መንጎ ኵሎም እቶም ዝኣመኑ እናተዘዋወረ ኸሎ፥ ናብቶም ኣብ ልዳ ዝነብሩ ቅዱሳን ድማ ወረደ። ³³ኣብኡ ኸዓ፥ መፃጕዕ ዝኾነ፥ ሸሞንተ ዓመት ኣብ ዓራት ደቂሱ ዝነበረ፥ ኤንያስ ዝስሙ ሰብ ረኸበ። ³⁴ጴጥሮስ ድማ “ኤንያስ፥ ኢየሱስ ክርስቶስ የሕውየካ ኣሎ፤ ተስእ፥ ዓራትካ ኣንፅፍ” በሎ። ንሱ ኸዓ ሽዑ ንሽዑ ተስአ። ³⁵ኣብ ልዳን ሳሮንን ዝነብሩ ዅሎም ከዓ ረአይዎ፤ ናብ ጐይታ ድማ ተመለሱ።

³⁶ኣብ ኢዮጴ ኸዓ ጣቢታ ዝስማ ሓንቲ ደቀ መዝሙር ነበረት፤ ትርጕሙ ዶርቃስ ማለት እዩ። ንሳ ኸዓ ብሰናይ ግብርን ንድኻታት ብምሕጋዝን ምልእቲ ነበረት። ^c c v36 ጣቢታ (ኣራማይስጢ) ኾነ ዶርቃስ (ግሪኽ) ክልቲኡ “ወዓግ” ማለት እዩ። ³⁷በቲ መዓልቲታት እቱይ ከዓ፥ ሓሚማ ሞተት፤ ሓፂቦማ ድማ ኣብ ላዕለወይቲ ደብሪ ኣደቀስዋ። ³⁸ልዳ ናብ ኢዮጴ ቀረባ ስለ ዝነበረት ከዓ፥ እቶም ደቀ መዛሙርቲ ጴጥሮስ ኣብኡ ኸም ዘሎ ሰሚዖም፥ “ናባና ኽትመፅእ ኣይትደንጒ” ኢሎም እናለመኑ ኽልተ ሰብኡት ናብኡ ለኣኹ። ³⁹ጴጥሮስ ድማ ተሲኡ ምሳታቶም ከደ። ምስ በፅሐ ኸዓ፥ ናብታ ላዕለወይቲ ደብሪ ኣደየብዎ። ኵለን እተን መበለታት ድማ እናበኸያ ኣብ ጥቓኡ ደው ኢለን፥ እታ ዶርቃስ ምሳታተን ከላ ዝገበረተን ቀማውሽን ክዳውንትን የርእያኦ ነበራ። ⁴⁰ጴጥሮስ ድማ ንዅሎም ናብ ደገ ኣውፂኡ፥ ተንበርኪኹ ፀለየ። ናብታ ሬሳ ዘወር ኢሉ ኸዓ፥ “ጣቢታ፥ ተስኢ” በላ። ንሳ ድማ ኣዒንታ ኸፈተት፤ ንጴጥሮስ ርእያ ኸዓ ተቐመጠት። ⁴¹ኢዱ ሂቡ ኸዓ ኣተንስኣ። ነቶም ቅዱሳንን መበለታትን ፀዊዑ ድማ፥ ህያው ኮይና ኣቕረባ። ⁴²እዙይ ድማ ኣብ ኵላ ኢዮጴ ተፈለጠ፤ ብዙሓት ከዓ ብጐይታ ኣመኑ። ⁴³ኣብ ኢዮጴ ኸዓ ፋፃይ ቈርበት ምስ ዝኾነ ስምኦን ዝስሙ ሰብኣይ ብዙሕ መዓልቲ ተቐመጠ።