Yon Sòlda ki Gen Krentif pou Bondye Tande Vwa ki Soti nan Syèl la

Yon ofisye women ap priye, epi yo di l voye chèche Pyè. Pyè, sou yon do kay, wè yon dra plen bèt ki pa pwòp epi li tande sa Papa nou fè pwòp, se pwòp li ye. Li antre nan kay yon moun ki pa jwif, epi Sentespri desann anvan l fin pale.

Chapit 10.

Te gen yon nonm nan lavil Sezare yo te rele Kònèy. Li te yon kaptenn nan rejiman yo te rele rejiman Itali a. Se te yon nonm relijye ki te gen krentif pou Papa nou ansanm ak tout moun lakay li. Li te bay pèp la anpil kado, epi li t'ap lapriyè Papa nou san rete. Vè twazè nan apremidi, li fè yon vizyon. Li wè aklè yon zanj Papa nou vin jwenn li, li di l': “Kònèy.” ^a

Kònèy t'ap gade zanj lan, li te pè anpil, li di: “Kisa ki genyen, mèt?” Zanj lan reponn li: “Lapriyè ou yo ak kado ou bay pòv yo moute devan Papa nou, yo fè l' chonje ou.”

Koulye a, voye kèk moun lavil Jope al chache yon nonm yo rele Simon, ki gen yon lòt non Pyè. L'ap fè ladesant lakay yon bòs tanè yo rele Simon tou, ki gen kay li bò lanmè a.

Lè zanj ki t'ap pale avè l' la ale, Kònèy rele de nan domestik lakay li ansanm ak yon sòlda ki gen krentif pou Bondye pami moun ki te toujou avè l' yo, li rakonte yo tout bagay, epi li voye yo lavil Jope.

Papa a Louvri Kè Pyè

Nan denmen, pandan yo te sou wout la, lè yo t'ap pwoche bò lavil la, Pyè moute sou tèt kay la pou l' lapriyè. Lè sa a, li te vè midi. Grangou pran l', li te anvi manje. Pandan yo t'ap pare manje a, li tonbe nan yon vizyon, li wè syèl la louvri, epi yon bagay ki tankou yon gwo dra t'ap desann. Yo te kenbe l' nan kat kwen l' pou file l' desann atè. Te gen tout kalite bèt kat pat, bèt ki trennen sou vant atè, ak zwazo k'ap vole nan syèl la.

Li tande yon vwa ki di l': “Leve non, Pyè. Touye, epi manje.” ^b

Men Pyè reponn: “Non, non, Senyè. Mwen pa janm manje anyen ki sal ni anyen ki pa nan kondisyon pou yo manje l'.”

Vwa a pale avè l' yon dezyèm fwa ankò: “Sa mwen menm fè vin pwòp, ou pa dwe di l' sal.”

Sa rive twa fwa. Apre sa, lamenm yo wete dra a, yo moute l' nan syèl la.

Pyè t'ap kase tèt li pou l' konnen sa vizyon li te fè a te vle di. Lè sa a, mesye Kònèy te voye yo te fin mande kote kay Simon an ye, yo rive kanpe devan pòtay la, yo rele, yo mande èske se la Simon yo rele Pyè a ap fè ladesant.

Pandan Pyè t'ap kalkile sou vizyon an, Sentespri di l': “Gade, gen twa nonm k'ap chache ou. Leve non, desann, ale avèk yo san ou pa ezite, paske se mwen menm ki voye yo.”

Pyè desann al jwenn mesye yo, li di: “Se mwen menm n'ap chache a. Poukisa nou vini?”

Yo reponn li: “Se Kònèy, yon kaptenn, yon nonm ki dwat, ki gen krentif pou Papa nou, tout nasyon jwif la respekte l'. Yon zanj ki sen di l' pou l' fè ou vin lakay li pou l' ka tande sa ou gen pou di l'.” Se konsa Pyè fè yo antre, li resevwa yo pou lannwit lan. Nan denmen, li leve, li pati avèk yo. Te gen kèk frè ki soti lavil Jope ki te ale avèk li tou.

Nan denmen ankò, li antre lavil Sezare. Kònèy t'ap tann yo. Li te sanble tout fanmi l' ak bon zanmi l' yo. Lè Pyè t'ap antre, Kònèy vin jwenn li, li lage kò l' nan pye Pyè pou l' adore l'. Men Pyè fè l' leve, li di l': “Kanpe non! Mwen menm tou se yon moun mwen ye.” Pyè kontinye pale avèk Kònèy, li antre nan kay la, li jwenn anpil moun ki te sanble la. Li di yo: “Nou menm, nou konnen lalwa pa pèmèt yon jwif fè zanmi ak yon moun lòt nasyon, ni al lakay li. Men, Papa nou fè m' konnen mwen pa dwe gade pèsonn tankou yon moun ki sal ni ki pa nan kondisyon. Se poutèt sa, lè nou voye chache m', mwen vini san m' pa fè kont. Koulye a, mwen ta renmen konnen poukisa nou voye chache m'.”

Kònèy reponn: “Sa gen kat jou, vè lè sa a menm, twazè nan apremidi, mwen t'ap lapriyè nan kay mwen. Epi, yon sèl kou, yon nonm ak yon rad ki klere parèt kanpe devan m', li di m': ‘Kònèy, Papa nou tande lapriyè ou, li chonje kado ou te bay pòv yo. Se poutèt sa, voye moun lavil Jope al rele Simon, moun yo rele Pyè a. L'ap fè ladesant lakay Simon, bòs tanè a, ki gen kay li bò lanmè a.’ Se konsa, mwen voye chache ou lamenm, epi ou byen fè ou vini. Koulye a, nou tout la devan Bondye, pou n' tande tout sa Senyè a ba ou lòd pou di nou.”

Lè sa a, Pyè pran lapawòl, li di: “Koulye a, mwen wè tout bon: Papa nou pa fè patipri, men nan tout nasyon, moun ki gen krentif pou li, ki fè sa ki dwat, se moun li dakò resevwa. Li voye pawòl li bay pèp Izrayèl la, li anonse yo bon nouvèl lapè a gremesi Jezikri—se li menm ki Senyè tout moun. ^c Nou menm, nou konnen sa ki te pase nan tout peyi Jide a, depi nan peyi Galile, apre batèm Jan te anonse a: nou konnen ki jan Papa nou te vide Sentespri ak pouvwa sou Jezi, moun Nazarèt la. Jezi menm mache toupatou, li t'ap fè byen, li t'ap geri tout moun ki te anba pouvwa dyab la, paske Papa nou te avèk li. ^d Nou menm, nou se temwen tout sa li te fè nan peyi jwif yo ak nan lavil Jerizalèm—yo touye l', yo kloure l' sou yon bwa, men, sou twazyèm jou a, Papa nou fè l' leve soti vivan nan lanmò, epi li fè l' parèt, se pa tout pèp la ki te wè l', men se nou menm, nou menm Papa nou te chwazi davans pou sèvi temwen, nou menm ki te manje, ki te bwè avè l' apre li te leve soti vivan nan lanmò. Li ban nou lòd pou n' preche bay pèp la, pou n' fè konnen se Papa nou ki mete l' jij pou jije ni moun vivan yo ni moun mò yo. Se sou li tout pwofèt yo t'ap pale lè yo te di nenpòt moun ki mete konfyans li nan li va resevwa padon pou peche l' yo gremesi non li.”

Pyè t'ap pale toujou, lè Sentespri desann sou tout moun ki t'ap koute pawòl la. Kwayan jwif yo ki te sikonsi, sa yo ki te vini ansanm ak Pyè yo, te sezi wè Bondye te vide kado Sentespri a sou moun lòt nasyon yo tou. Yo te tande moun sa yo ap pale langaj, yo t'ap fè lwanj Papa nou. Lè sa a, Pyè di:

“Moun sa yo resevwa Sentespri menm jan avèk nou. Eske gen yon moun ki ka anpeche yo jwenn dlo pou batize yo?” Epi li bay lòd pou yo batize yo nan non Jezikri. Apre sa, yo mande Pyè pou l' rete kèk jou ankò avèk yo.