ዘፍጥረት 37

37 ¹ያዕቆብም አባቱ በእንግድነት በኖረባት ምድር፣ በከነዓን ምድር ተቀመጠ። ²የያዕቆብ የትውልድ ታሪክ ይህ ነው። ዮሴፍ የዐሥራ ሰባት ዓመት ጎበዝ ሆኖ ከወንድሞቹ፣ ከአባቱ ሚስቶች ከባላና ከዘለፋ ልጆች ጋራ መንጋውን ይጠብቅ ነበር፤ ስለ እነርሱም ክፉ ወሬ ለአባታቸው አመጣ። ³እስራኤልም በስተ ርጅናው ስለ ተወለደለት ዮሴፍን ከልጆቹ ሁሉ ይበልጥ ይወደው ነበር፤ ባለ ብዙ ቀለም ልብስም ሠራለት። ⁴ወንድሞቹም አባታቸው ከሁላቸው ይበልጥ እንደሚወደው ባዩ ጊዜ ጠሉት፤ በመልካምም ሊያነጋግሩት አልቻሉም።

⁵ዮሴፍም ሕልም አለመ፤ ለወንድሞቹም ነገራቸው፤ እነርሱም ይበልጥ ጠሉት። ⁶እርሱም እንዲህ አላቸው፤ “ያለምሁትን ይህን ሕልም ስሙ፤ ⁷እነሆ፣ በእርሻ ውስጥ ነዶ እናስር ነበር፤ እነሆም፣ የእኔ ነዶ ተነሥቶ ቀጥ ብሎ ቆመ፤ እነሆም፣ የእናንተ ነዶዎች ዙሪያውን ከበው ሰገዱለት።”

⁸ወንድሞቹም፣ “በእውነት ትነግሥብናለህን? በእርግጥስ ትገዛናለህን?” አሉት፤ ስለ ሕልሞቹና ስለ ቃሉም ይበልጥ ጠሉት። ⁹ደግሞም ሌላ ሕልም አለመ፤ ለወንድሞቹም፣ “እነሆ፣ ሌላ ሕልም አለምሁ፤ ፀሐይና ጨረቃ ዐሥራ አንዱም ከዋክብት ይሰግዱልኝ ነበር” ብሎ ነገራቸው። ¹⁰ለአባቱና ለወንድሞቹም በነገራቸው ጊዜ አባቱ፣ “ይህ ያለምኸው ሕልም ምንድር ነው? በእውነት እኔና እናትህ ወንድሞችህም መጥተን በፊትህ እስከ ምድር እንሰግዳለንን?” ብሎ ገሠጸው። ¹¹ወንድሞቹም ቀኑበት፤ አባቱ ግን ነገሩን በልቡ ያዘ።

ወደ ወንድሞቹ ተላከ

¹²ወንድሞቹም የአባታቸውን መንጋ ሊያግዱ ወደ ሴኬም አጠገብ ሄደው ነበር። ¹³እስራኤልም ዮሴፍን፣ “ወንድሞችህ በሴኬም መንጋውን እያገዱ አይደሉምን? ና፣ ወደ እነርሱ እልክሃለሁ” አለው። እርሱም፣ “እነሆኝ” ብሎ መለሰ።

¹⁴እርሱም፣ “ሄደህ ወንድሞችህና መንጋው እንዴት እንዳሉ እይ፤ ወሬም መልስልኝ” አለው። ከኬብሮንም ሸለቆ ሰደደው፤ ዮሴፍም ወደ ሴኬም መጣ። ¹⁵አንድ ሰውም በሜዳ ላይ ሲንከራተት አገኘው፤ “ምን ትፈልጋለህ?” ብሎም ጠየቀው።

¹⁶እርሱም፣ “ወንድሞቼን እፈልጋለሁ፤ የት እያገዱ እንዳሉ ልትነግረኝ ትችላለህን?” ብሎ መለሰ።

¹⁷ሰውዬውም፣ “ከዚህ ሄደዋል፤ ‘ወደ ዶታን እንሂድ’ ሲሉ ሰማኋቸው” አለ። ዮሴፍም ወንድሞቹን ተከትሎ ሄደ፤ በዶታንም አገኛቸው።

¹⁸በሩቅም አዩት፤ ወደ እነርሱ ሳይደርስም ሊገድሉት ተማከሩ።

¹⁹እርስ በርሳቸውም፣ “እነሆ፣ ያ ሕልመኛ መጣ!” ተባባሉ። ²⁰“አሁንም ኑ፣ እንግደለው፤ ከጒድጓዶቹም በአንዱ ውስጥ እንጣለው፤ ‘ክፉ አውሬ በላው’ እንበል፤ ከዚያም ሕልሞቹ ምን እንደሚሆኑ እናያለን።”

²¹ሮቤልም ሰማ፤ ከእጃቸውም ሊያድነው ሞከረ፤ “ነፍሱን አንንሣ” አለ። ²²ሮቤልም፣ “ደም አታፍስሱ፤ በምድረ በዳ ባለው በዚህ ጒድጓድ ውስጥ ጣሉት እንጂ እጅ አትንኩበት” አላቸው፤ ይህንም ያለው ከእጃቸው አድኖ ወደ አባቱ ሊመልሰው ፈልጎ ነበር። ²³ዮሴፍም ወደ ወንድሞቹ በደረሰ ጊዜ የለበሰውን ልብሱን፣ ባለ ብዙ ቀለም ልብሱን ገፈፉት። ²⁴ወስደውም በጒድጓዱ ውስጥ ጣሉት፤ ጒድጓዱም ባዶ ነበር፤ በውስጡም ውሃ አልነበረም።

²⁵እንጀራም ሊበሉ ተቀመጡ፤ ዐይናቸውንም አነሡ፤ እነሆም፣ ከገለዓድ የመጡ የእስማኤላውያን ነጋዴዎች ግመሎቻቸው ሽቱ፣ በለሳንና ከርቤ ተሸክመው ወደ ግብፅ ሊወርዱ ሲመጡ አዩ። ²⁶ይሁዳም ወንድሞቹን፣ “ወንድማችንን ገድለን ደሙን ብንሰውር ምን እንጠቀማለን? ²⁷ኑ፣ ለእስማኤላውያን እንሽጠው እንጂ እጃችን አይነካው፤ እርሱ ወንድማችን፣ የገዛ ሥጋችን ነውና” አላቸው፤ ወንድሞቹም ተስማሙ። ²⁸ምድያማውያን ነጋዴዎችም ባለፉ ጊዜ ወንድሞቹ ዮሴፍን ከጒድጓዱ አወጡት፤ ለእስማኤላውያንም በሃያ ብር ሸጡት፤ እስማኤላውያኑም ዮሴፍን ወደ ግብፅ ወሰዱት።

²⁹ሮቤልም ወደ ጒድጓዱ በተመለሰ ጊዜ ዮሴፍ በዚያ እንደሌለ አየ፤ ልብሱንም ቀደደ። ³⁰ወደ ወንድሞቹም ተመልሶ፣ “ልጁ የለም! እኔስ አሁን ወዴት እሄዳለሁ?” አለ።

³¹የዮሴፍንም ልብስ ወስደው ፍየል አረዱ፤ ልብሱንም በደም ነከሩት። ³²ባለ ብዙ ቀለም ልብሱንም ልከው ወደ አባታቸው አመጡት፤ “ይህን አገኘን፤ የልጅህ ልብስ ይሁን አይሁን መርምረው” አሉ።

³³እርሱም አወቀው፤ “የልጄ ልብስ ነው፤ ክፉ አውሬ በላው! ዮሴፍ በእርግጥ ተሰነጣጥቆአል።” ³⁴ያዕቆብም ልብሱን ቀደደ፤ ማቅም ለበሰ፤ ስለ ልጁም ብዙ ቀን አለቀሰ። ³⁵ወንዶችና ሴቶች ልጆቹ ሁሉ ሊያጽናኑት መጡ፤ እርሱ ግን መጽናናትን እንቢ አለ፤ “አይሆንም፣ እያዘንሁ ወደ ልጄ ወደ መቃብር እወርዳለሁ” አለ፤ አባቱም ስለ እርሱ አለቀሰ። ^a a v35 ሲኦል የሙታን መኖሪያ ነው፤ በሞት ጊዜ ሰው ሁሉ የሚሄድበት ጥላ የሞላበት ስፍራ ነው እንጂ በኋላ በአዲስ ኪዳን እንደሚታወቀው የፍርድ ስፍራ የሆነው ገሃነም አይደለም። ³⁶ምድያማውያኑም ዮሴፍን በግብፅ ለፈርዖን ባለሥልጣንና ለዘበኞች አለቃ ለጲጥፋራ ሸጡት።