ዘፍጥረት 36

36 ¹የዔሳው (ማለትም የኤዶም) የትውልድ ታሪክ ይህ ነው። ²ዔሳው ሚስቶቹን ከከነዓን ሴቶች ልጆች መካከል አገባ፤ የኬጢያዊው የኤሎን ልጅ ዓዳን፣ የኤዊያዊው የሲብዖን ልጅ የዓና ልጅ አህሊባማን፣ ³የናባዮትን እኅት የእስማኤልን ልጅ ባሥማትንም አገባ። ⁴ዓዳ ለዔሳው ኤልፋዝን ወለደች፤ ባሥማትም ራጉኤልን ወለደች፤ ⁵አህሊባማም የዑስን፣ ያላምንና ቆራን ወለደች፤ እነዚህ በከነዓን ምድር የተወለዱለት የዔሳው ልጆች ናቸው። ⁶ዔሳው ሚስቶቹን፣ ወንዶችና ሴቶች ልጆቹን፣ ቤተ ሰቡን ሁሉ፣ ከብቶቹን፣ እንስሶቹን ሁሉ፣ በከነዓን ያፈራውን ንብረቱን ሁሉ ይዞ ከወንድሙ ከያዕቆብ ርቆ ወደ ሌላ ምድር ሄደ። ⁷ሀብታቸው ብዙ ስለ ነበር አብረው መኖር አልቻሉም፤ የሰፈሩባት ምድር ከብቶቻቸው ስለ በዙ ሁለቱንም ልትሸከም አልቻለችም። ⁸ስለዚህ ዔሳው በሴይር ተራራማ አገር ሰፈረ። (ዔሳው ኤዶም ነው።)

⁹በሴይር ተራራማ አገር የኤዶማውያን አባት የሆነው የዔሳው የትውልድ ታሪክ ይህ ነው። ¹⁰የዔሳው ልጆች ስሞች እነዚህ ናቸው፤ የዔሳው ሚስት የዓዳ ልጅ ኤልፋዝ፤ የዔሳው ሚስት የባሥማት ልጅ ራጉኤል። ¹¹የኤልፋዝ ልጆች ቴማን፣ ኦማር፣ ሴፎ፣ ጋዕታምና ቄኔዝ ነበሩ። ¹²የዔሳው ልጅ የኤልፋዝ ቁባት ተምናዕ አማሌቅን ወለደችለት፤ እነዚህ የዔሳው ሚስት የዓዳ ልጆች ነበሩ። ¹³የራጉኤል ልጆች እነዚህ ናቸው፤ ናሖት፣ ዛራ፣ ሳማ፣ ሚዛ። እነዚህ የዔሳው ሚስት የባሥማት ልጆች ናቸው። ¹⁴የሲብዖን ልጅ የዓና ልጅ የሆነችው የዔሳው ሚስት የአህሊባማ ልጆች እነዚህ ናቸው፤ ለዔሳው የዑስን፣ ያላምንና ቆራን ወለደችለት።

¹⁵የዔሳው ልጆች አለቆች እነዚህ ናቸው። የዔሳው በኵር የኤልፋዝ ልጆች፤ አለቃ ቴማን፣ አለቃ ኦማር፣ አለቃ ሴፎ፣ አለቃ ቄኔዝ፣ ¹⁶አለቃ ቆራ፣ አለቃ ጋዕታም፣ አለቃ አማሌቅ፤ እነዚህ በኤዶም ምድር የኤልፋዝ አለቆች ናቸው፤ እነዚህ የዓዳ ልጆች ነበሩ። ¹⁷የዔሳው ልጅ የራጉኤል ልጆች እነዚህ ናቸው፤ አለቃ ናሖት፣ አለቃ ዛራ፣ አለቃ ሳማ፣ አለቃ ሚዛ። እነዚህ በኤዶም ምድር የራጉኤል አለቆች ናቸው። እነዚህ የዔሳው ሚስት የባሥማት ልጆች ናቸው። ¹⁸የዔሳው ሚስት የአህሊባማ ልጆች፤ አለቃ የዑስ፣ አለቃ ያላም፣ አለቃ ቆራ። እነዚህ የዓና ልጅ የሆነችው የዔሳው ሚስት የአህሊባማ አለቆች ናቸው። ¹⁹እነዚህ የዔሳው (ማለትም የኤዶም) ልጆች ናቸው፤ አለቆቻቸውም እነዚህ ናቸው።

²⁰በምድሪቱ ይኖሩ የነበሩት የኦሪያዊው የሴይር ልጆች እነዚህ ናቸው፤ ሎጣን፣ ሦባል፣ ሲብዖን፣ ዓና፣ ²¹ዲሶን፣ ኤጽር፣ ዲሳን። እነዚህ በኤዶም ምድር ያሉት የሴይር ልጆች የኦሪያውያን አለቆች ናቸው። ²²የሎጣን ልጆች ሖሪና ሄማም ነበሩ፤ የሎጣንም እኅት ተምናዕ ነበረች። ²³የሦባል ልጆች እነዚህ ናቸው፤ ዐልዋን፣ ማናሃት፣ ዔባል፣ ሴፎና ዖናም። ²⁴የሲብዖን ልጆች እነዚህ ናቸው፤ አያና ዓና። የአባቱን የሲብዖንን አህዮች ሲጠብቅ በምድረ በዳ ፍል ውሃ ያገኘው ይህ ዓና ነው። ²⁵የዓና ልጆች እነዚህ ናቸው፤ ዲሶንና የዓና ልጅ አህሊባማ። ²⁶የዲሶን ልጆች እነዚህ ናቸው፤ ሐምዳን፣ ኤሽባን፣ ይትራንና ካራን። ²⁷የኤጽር ልጆች እነዚህ ናቸው፤ ቢልሃን፣ ዛዋንና ዓቃን። ²⁸የዲሳን ልጆች እነዚህ ናቸው፤ ዑፅና አራን። ²⁹የኦሪያውያን አለቆች እነዚህ ናቸው፤ አለቃ ሎጣን፣ አለቃ ሦባል፣ አለቃ ሲብዖን፣ አለቃ ዓና፣ ³⁰አለቃ ዲሶን፣ አለቃ ኤጽር፣ አለቃ ዲሳን። እነዚህ በሴይር ምድር ባላቸው ነገድ መሠረት የኦሪያውያን አለቆች ናቸው።

ከእስራኤል ነገሥታት በፊት የነገሡ ነገሥታት

³¹በእስራኤላውያን ላይ ማንም ንጉሥ ከመንገሡ በፊት በኤዶም ምድር የነገሡ ነገሥታት እነዚህ ናቸው፤ ³²የቢዖር ልጅ ቤላ በኤዶም ነገሠ፤ የከተማውም ስም ዲንሐባ ነበረ። ³³ቤላ በሞተ ጊዜ የባሶራው የዛራ ልጅ ዮባብ በእርሱ ቦታ ነገሠ። ³⁴ዮባብ በሞተ ጊዜ ከቴማናውያን ምድር የመጣው ሔሳም በእርሱ ቦታ ነገሠ። ³⁵ሔሳም ሞተ፤ በሞዓብ ምድር ምድያምን ድል ያደረገው የበዳድ ልጅ ሐዳድ በእርሱ ቦታ ነገሠ፤ የከተማውም ስም ዓዊት ተባለ። ³⁶ሐዳድ በሞተ ጊዜ የማስሬቃው ሳምላ በእርሱ ቦታ ነገሠ። ³⁷ሳምላ በሞተ ጊዜ በኤፍራጥስ አጠገብ ካለችው ከሬሆቦት የመጣው ሳኦል በእርሱ ቦታ ነገሠ። ³⁸ሳኦል በሞተ ጊዜ የዐክቦር ልጅ በኣልሐናን በእርሱ ቦታ ነገሠ። ³⁹የዐክቦር ልጅ በኣልሐናን በሞተ ጊዜ ሐዳር በእርሱ ቦታ ነገሠ፤ የከተማው ስም ፋዑ ነበረ፤ የሚስቱም ስም የሜዛሃብ ልጅ የሆነችው የማጥሬድ ልጅ ሜጤቤል ነበረ።

⁴⁰በነገዳቸው፣ በቦታቸውና በስማቸው መሠረት የዔሳው አለቆች እነዚህ ናቸው፤ አለቃ ተምናዕ፣ አለቃ ዐልዋ፣ አለቃ ይቴት፣ ⁴¹አለቃ አህሊባማ፣ አለቃ ኤላ፣ አለቃ ፊኖን፣ ⁴²አለቃ ቄኔዝ፣ አለቃ ቴማን፣ አለቃ ሚብሳር፣ ⁴³አለቃ መግዲኤልና አለቃ ዒራም። በያዙት ምድር በሰፈሩበት ስፍራ መሠረት የኤዶም አለቆች እነዚህ ናቸው። ዔሳው የኤዶማውያን አባት ነበረ።