Haokaphok 36

36 ¹Hi Esauwui (chi Edomna) naotunbingna. ²Esauna apreiva̱ ngarā Canaan sha̱naowui eina khui: Hitpa Elonwui naongalāva̱ Adah, eina Hivpa Zibeonwui naongalāva̱ Anahwui naongalāva̱ Oholibamah, ³kala Ishmaelwui naongalāva̱, Nebaiothwui azarva̱ Basemath. ⁴Adahna Esauli Eliphaz pharāmi, kala Basemathna Reuelli pharai, ⁵Oholibamahna Jeush, Jalam, kala Corah athumli pharai; athum hi Canaan ngaleili Esauli kapharā anaomayarabingna. ⁶Esauna apreiva̱ ngarā, anaomayara ngarā, anaongalāva̱ ngarā, ashi shimkhur saikora, awui sha̱kei, awui animang saikora, kala Canaanli samkaphang lan saikora khuiphungda, agato Jacobwui eina ngateida ngalei akhali vāhaowa. ⁷Aniwui samkaphang lan chungnāhaida ani ngasoda mapampaithuwa; ani kapam ngalei chi aniwui sha̱keiwui vang ani khani mashapthuwa. ⁸Chieina Esauna Seir kaphungramli pamhaowa. (Esau chi Edomna.).

⁹Hi Seir kaphungramli khalei Edomnaobingwui avāva̱ Esauwui naotunbing chi hina. ¹⁰Hi Esauwui naomayarabingwui amingbing chi hina: Esauwui preiva̱ Adahwui naomayara Eliphaz; Esauwui preiva̱ Basemathwui naomayara Reuel. ¹¹Eliphazwui naomayarabing: Teman, Omar, Zepho, Gatam, kala Kenazna. ¹²Esauwui naomayara Eliphazwui ashāmva̱ Timnana ali Amalek pharāmi. Hibing hi Esauwui preiva̱ Adahwui naomayarabingna. ¹³Hibing hi Reuelwui naomayarabingna: Nahath, Zerah, Shammah, Mizzah. Hibing hi Esauwui preiva̱ Basemathwui naomayarabingna. ¹⁴Hibing hi Zibeonwui naongalāva̱ Anahwui naongalāva̱, Esauwui preiva̱ Oholibamahwui naomayarabingna: ana Esauli Jeush, Jalam, kala Corah pharai.

¹⁵Hibing hi Esauwui naomayarabingwui wungnaobingna. Esauwui naochizai Eliphazwui naomayarabing: wungnao Teman, wungnao Omar, wungnao Zepho, wungnao Kenaz. ¹⁶wungnao Corah, wungnao Gatam, wungnao Amalek; hibing hi Edom ngaleili khalei Eliphazwui wungnaobingna; hibing hi Adahwui naomayarabingna. ¹⁷Hibing hi Esauwui naomayara Reuelwui naomayarabingna: wungnao Nahath, wungnao Zerah, wungnao Shammah, wungnao Mizzah. Hibing hi Edom ngaleili khalei Reuelwui wungnaobingna. Hibing hi Esauwui preiva̱ Basemathwui naomayarabingna. ¹⁸Esau preiva̱ Oholibamahwui naomayarabing: Jeush, Jalam kala Corah. Hibing hi Anahwui naongalāva̱ Esau preiva̱ Oholibamahwui khareibingna. ¹⁹Hibing hi Esau (chiya, Edom) wui naomayarabingna; hibing hi athumwui khareibingna.

²⁰Ngalei chili kapama Horipa Seirwui naobing chi hibingna: Lotan, Shobal, Zibeon, Anah, ²¹Dishon, Ezer kala Dishan; hibing hi Edom ngaleili khalei Seirwui naomayara, Hornaobingwui khareibingna. ²²Lotanwui naomayarabing: Hori eina Hemam; kala Lotanwui azarva̱ Timnana. ²³Hibing hi Shobalwui naomayarabingna: Alvan, Manahath, Ebal, Shepho kala Onam. ²⁴Hibing hi Zibeonwui naobingna: Aiah eina Anah. Hi Anah hi avāva̱ Zibeonwui gadhā hompamlakha lamhāngli ura̱ leirang tukkhuiya kahaina. ²⁵Hibing hi Anahwui naongarāna: Dishon, kala Anahwui naongalāva̱ Oholibamahna. ²⁶Hibing hi Dishonwui naobingna: Hemdan, Eshban, Ithran kala Kheran. ²⁷Hibing hi Ezerwui naomayarabingna: Bilhan, Zaavan kala Akan. ²⁸Hibing hi Dishanwui naomayarabingna: Uz eina Aran. ²⁹Hibing hi Hornaobingwui khareibingna: Lotan, Shobal, Zibeon, Anah, ³⁰Dishon, Ezer kala Dishan; hibing hi Seir ngaleili shimkhur-shimkhurwui athishurda Hornaobingwui khareibingna.

Israelwui Awungabingwui Achālak Munga Awungabing

³¹Israelwuitungli awunga khipānakha mamungranglakha Edom ngaleili mungkasā awungabing chi hibingna: ³²Beorwui nao Belana Edomli munga, kala awui keinungwui ming Dinhabah hoi. ³³Bela thikahai eina, Bozrahwui eina khalei Zerahwui nao Jobabna awui mahut thuishina. ³⁴Jobab thikahai eina, Teman ngaleiwui Hushamna awui mahut thuishina. ³⁵Husham thikahai eina, Bedadwui nao Hadadna awui mahutli wung thuishina; ana Moab ngaleili Midiannaobing khayuisai. Awui keinungwui aming chi Avith hoi. ³⁶Hadad thikahai eina, Masrekahwui khalei Samlahna awui mahut thuishina. ³⁷Samlah thikahai eina, Euphrateswui atungshong khalei Rehobothwui khalei Shaulna awui mahut thuishina. ³⁸Shaul thikahai eina, Achborwui nao Baal-hananna awui mahut thuishina. ³⁹Achborwui nao Baal-hanan thikahai eina, Hadarna awui mahut thuishina; kala awui keinungwui aming Pau hoi, kala awui preiva̱wui aming chi Mezahabwui naongalāva̱ Matredwui naongalāva̱ Mehetabelna.

⁴⁰Hibing hi athumwui shimkhur, apam kala aming athishurda Esauwui wungnaobingna: wungnao Timna, wungnao Alvah, wungnao Jetheth, ⁴¹wungnao Oholibamah, wungnao Elah, wungnao Pinon, ⁴²wungnao Kenaz, wungnao Teman, wungnao Mibzar, ⁴³wungnao Magtiel, kala wungnao Iram. Athum hi athumwui pamkhavai athishurda, athumna kapai ngaleili Edomwui wungnaobingna. Esau chi Edomnaobingwui avāva̱na.