Pashuli Wubeta Mbikudi
Nganga Nzambi Pashuli kisi beta Yelemiya amana kisi mukotisa mu phophu mu phipha dyosu. Buna kakatulwa, Yelemiya kisi mutela khumbu Bweya mu Mbangu Zoosu, hanga kisi baluka kwena Tata wandi: wángiluta mu ngolu, amana ndinga yina yisi zola mina yisi lema mu mifufwa myama. Kisi yimbila lukumu, hanga kisi singa kilumbu kya lubutuku lwandi meni.
Tata wetu kisi zonza mu mavese 4–6
20 1Pashuli, mwana wa Imeli, nganga Nzambi yi mbuta wa batsinzidi ba mu nzu ya Tata wetu, wáwa Yelemiya wákala kubikula thinu yina. 2Pashuli wábeta Yelemiya mbikudi amana wámukotisa mu phophu ku mwelu wa ku zilu wa Benzyame, mu nzu ya Tata wetu. 3Kilumbu kyalanda, Pashuli wákatula Yelemiya mu phophu. Yelemiya wuzimbudi: «Tata wetu kakúheka ngeyi khumbu Pashuli ku, kaasi Magoli-Misabibi—Bweya mu Mbangu Zoosu.» a a v3 Magoli-Misabibi disongidila «bweya mu mbangu zoosu». Khumbu ya pha yina yisi songila bweya buna masolo ma Pashuli yandi-meni makamúnatila.
4Tata wetu wuzimbudi bwabu: «Yikúkhitula ngeyi bweya kwena ngeyi-meni yi kwena bakundi baku. Bakábwa ku mbedi ya phoku ya bambeni ba bawu ku thwala ya mesu maku. Yikhana Yuta dyosu ku moku ma kyamvu kya Babiloni; yandi kakábanata ku kinzenza ku Babiloni amana kakábabeta ni mbedi ya phoku. 5Yikhana kimvwama kya mbanza yayi, bima byandi, yi bima bya thalu, yi kuvwa kwa bakyamvu ba Yuta, ku moku ma bambeni ba bawu, bana bakábabotula, bakábabonga, amana bakábanata ku Babiloni. 6Ngeyi, Pashuli, yi batu boosu ba mu nzu yaku lukákwenda mu kinzenza, lukátula ku Babiloni, amana lukáfwa yi lukázikwa kuna—ngeyi yi bakundi baku boosu bana wábikudila mambu ma luvunu.»
Yelemiya Wubokila Tata Wandi
7Ngeyi wángihuna, meni, a Tata wama, amana yáhunakana; wángiluta mu ngolu amana wánunga. Yákituka kima kya kusekila mu lumbu dyosu; batu boosu bisi ngiseka. 8Kosu tangwa yisi zonza, yisi kalunga, yisi boka: «Mvwalangani yi kuzangana!» Mukuma ndinga ya Tata wetu yángunatina kuseka yi kulewuka mu lumbu dyosu. 9Kaasi yuka ni yizonza: «Yikásamuna ku yandi, holo yikázonza dyaka ku mu khumbu yandi,» buna kwena mu mbundu yama kima kifwanani yi mbawu yibati lema, kina kikangama mu mifufwa myama. Yilembukini mu kusimba kyawu mu kati, amana khálendaku. 10Mukuma yisi wa balawu bisi zonza mu kitsweki: «Bweya mu mbangu zoosu! Mufundenu! Tumufunda!» Bakundi bama boosu bana yisi sila mbundu bisi tadila kubwa kwama: «Mbanzi kakáhunakana, buna tukámununga ha yandi, tukámufutila mambu mandi.» 11Kaasi Tata wetu kenina yi meni, kafwánana yi munwani wa ngolu wa bweya; buna bana bisi ngiyanga bakábwa amana bakánunga ku. Bakáfwa tsoni ngolu, mukuma bánunga ku; mafu ma bawu ma mvula yi mvula makázimbukwa ku kyamakulu. 12A Tata, Mukwa basuta ba zilu, ngeyi wuna wisi tonta basungama amana wisi mona mbundu yi ngangu, bika yimona mukanu waku ha bawu, mukuma yáyekula diambu dyama kwena ngeyi. 13Luyimbila kwena Tata wetu! Lukembisa Tata wetu! Mukuma wáhulula moya wa mutsukami mu moku ma batu bambi. 14Bika kilumbu kina yábutukila kikala kya kusinga! Kilumbu kina mama wángibuta kikalaku kya kusakumuna ku. 15Bika yakala dina dyánatina tata wama musamu: «Mwana wa yakala wábutuka kwena ngeyi!» kikala kya kusinga—dyámuheka kyesi kya lawu. 16Bika yakala dina kakala fwanana yi mbanza zina Tata wetu kábwisa konda kyadi. Bika kawa kiwolu mu nsuka, yi kindanda kya mvita mu tangwa dya tsinzi, 17mukuma kángihonda ku mu vumu, hanga mama wadi kakala zyamu dyama, vumu dyandi kikala fulu kyama kya luvundulu kyamakulu. 18Kikuma kya biki yálubuka mu vumu mu kumona phasi yi kiwayi, amana mu kumanisa bilumbu byama mu tsoni?
