Jeremiah 7

7 ¹Ithumwui Avāwui eina Jeremiahli rāhāngkahai tui chi:

²Ithumwui Avāwui shimwui ngaveili nganingda apam chili phongshoklu: Ali khorum khavai ngavei hi eina vāzanga Judah saikora, ithumwui Avāwui tui nganālu. ³Saikorawui Avā, Israelwui Avāna hithāda hānga: Nathumwui apong kala nathumwui otsak ngacheilu, chithākha ina apam hili nathumli pam ngasakra.

⁴Kakapik tui hibingli mashitsangalu: 'Ithumwui Avāwui khorumshimna! Ithumwui Avāwui khorumshimna! Ithumwui Avāwui khorumshimna!' ⁵Nathumna kachangkhat eina nathumwui apong kala otsak ngacheida, kala kachangkhat eina akha eina akhali mashun eina sāda, ⁶kha̱mi, marānao, lah ra̱meinaoli marekharek masāda, kala apam hili khayon makhalei miwui ashee matā ngasakda, kala nathum nakhalatta ka̱lāshi khavai khangatei varebingli mashurzatda, ⁷chithākha apam hili, achālakhawui eina nathumwui avāngarāli ina mikahai ngalei chili, katang makhavai nathumli pam ngasakra. ⁸Kha yanglu, nathumna khipānakha aman maleiwui kakapik tui hibingli shitsanga. ⁹Nathumna leeda, shaothatta, phophāda, nguida khangashit sāda, Baalli kachigat sāda, kala nathumna matheimi kahai khangatei varebingli shurzatda, ¹⁰chithākha iwui ming eina hokahai shim hili iwui mangāli rāda nganinglaga, 'Ithuma khamayonhaira!' da hānglaga, ningkakachai ot saikora hi sāchinghaorala? ¹¹Iwui ming eina hokahai shim hi nathumwui mikyanli khangaponabingwui akhur ngasāhairala? I khalattana chi theihaira, da ithumwui Avāna hānga.

¹²Ara, rida iwui ming ina chipamkahai, Shilohli leikahai iwui apam chili vālu; kala iwui mibing Israelwui makaphā vang eina chili ina kayākha sākahai chi yanglu. ¹³Ara, nathumna ot saikora hi sākahai vang eina, da ithumwui Avāna hānga, ina nathumli hāng ngasakchinglala nathumna manganāsangmana, nathumli hohaira kha nathum mangahānkāmana,

¹⁴chiwui vang eina, nathumna shitsangkahai, iwui ming eina hokahai shim chili, kala nathumli kala nathumwui avāngarāli ina mikahai apam chili, Shilohli ina sākahai thāda ina sāra. ¹⁵Nathumwui theisābing saikora, Ephraimwui naomayarabing saikora ina horshokkahai thāda, iwui mangāli eina ina nathumli horshokra. ^a a v15 Ephraim hi Israelwui atungshong wungramli hokhavai aming khamathā akhana, chi Assyriana BC 722 tam khaleoda kha̱ram ngaleishong thānvai kahaina.

¹⁶Na, mibing hiwui vang seihā masālu; athumwui vang khavao lah seihā kasā majuilu; ili mapoalu, kaja ina nathumli manganāmara. ¹⁷Judahwui keinungbingli kala Jerusalemwui chānreili athumna kayākha sākahai chi nathumna matheimalā? ¹⁸Naoshinaobingna thing kazipa, avāngarāna mei sharkāhai, sha̱naobingna kazingramwui awungva̱wui vang khamui sākhavai khawok naia; kala ili malungvāt ngasak khavai athumna vare kateibingli manglak kachigat heisangda chigata. ^b b v18 Kazingramwui awungva̱ chi khare atamwui makhayā yurbingna sheba sai makathar vareva̱ akhana; shimlung kachiva̱na ithumwui Avāli sheba masāda, ali athumwui shimlungli otram ngatha̱ya. ¹⁹Kha athumna ili malungvāt ngasaklā? da ithumwui Avāna hānga. Athum khalattawui maikashiwui vang, athum khalatta maningmalā?

²⁰Chiwui vang eina Reikhamatai Avāna hithāda hānga: iwui malungvāt kala malung kasā apam hiwuitungli, mi kala sātungli, luiyamwui atheirong kala ngaleiwui atheitungli heisangra, kala chuichingra, kala mangalan ngasakmara.

²¹Saikorawui Avā, Israelwui ithumwui Avāna hithāda hānga: Nathumwui rikkatā kachigat chi nathumwui pha̱kaphayā kateibingtungli mataisanglu, kala asā chi nathum khalattana shailu! ²²Kaja nathumwui avā ngarāli Egyptwui ngaleiwui eina khuirā kahai atamli, rikkatā kachigat kala pha̱kaphayāwui vang eina ina athumli kahāng māng eina matuimana, ningkhami māngla masaimana. ²³Hi ina athumli hāngmi: Iwui akhon nganālu, chithākha ina nathumwui Avā ngasāra, kala nathum iwui naongarā ngasāra. Ina nathumli hāngmi shongfa kachida okthuichinglu, chithākha nathumwui vang phālakhaira.

²⁴Kha athumna manganāmana, manganātitkhuimana; athum khalattawui khangarān shurda zata, athumwui makaphā ning ngakaishitingting kahaida, khanukshong ngara̱thui, mangāli mavaimana. ²⁵Nathumwui avā ngarāna Egyptwui eina rā kahai atamwui eina thuida aja peida, ina nathumli iwui rao marānbing saikora latluida latluida, thangkha kachida chihovā kahaina. ²⁶Chithālala athumna ili manganāmana, manganātitkhuimana, kha ngakaishitingting kahaida athumwui avā ngarāli zakshimeikharda sai.

²⁷Nana tui hi saikora athumli hāngra, kha athumna nali manganāmara; nana athumli ngakaora, kha athumna nali mangahānkāmara.

²⁸Athumli hānglu: Hi ithumwui Avāwui akhon manganā kahai, kala hāngkhamachin makhuisang kahai yurna; khamashung shimānhaira, athumwui morchaiwui eina katathaira. ²⁹Nawui sam katattāda horhaolu; kaphungton kajuipamli chaplu, kaja ithumwui Avāna awui malungkhavātwui thot chi khalanda horhaira.

Shaokathatwui tampāk

³⁰Judahna iwui miktāli makaphā ot sai, da ithumwui Avāna hānga. Athumna iming zanga shimli athumwui ningkakachai meoma̱bing pama, chi sākhamāng ngasaka. ³¹Athumwui naomayara kala ngalāva̱bingli mei eina riktā khavai, athumna Hinnomwui naomayarawui tampākli Tophethwui kameopambing kāsai; chi ina khipālikha mangamimana, kala iwui ningli mazangngaimana. ^c c v31 Topheth chi Jerusalemwui katāli khalei Hinnomwui naomayarawui tampākli khalei apam akhana, chili naongarābingli pha̱kaphayāda taithat sai; atamwui athishurda tampāk hina 'Gehenna' da tui phokngasaka. ³²Chiwui vang eina, yanglu, atam rārāli, da ithumwui Avāna hānga, apam hi Topheth maningakha Hinnomwui naomayarawui tampāk da maholuimara, kha Shaokathatwui tampāk hora; kala chifapam maleiluira peida athumna Tophethli chifara. ³³Mi hiwui kathingun china khamasaili yongkazata vānaobingwui kala ngaleili khalei sāyurbingwui kashakazā ngasāra; kala athumli yāmkhame mi akhala maleimara. ³⁴Kala ina Judah keinungbingli kala Jerusalemwui chānreili ringkaphā kala mathānthupwui akhon, mākakhāma kala mākham kahaiva̱wui akhon chi ngasām ngasakhaora, kaja ngalei china ngachakyang kahai ngasāra.