Amar Pitri pora Tar laga ghor ke hisab mangise

Mandir laga duwar te amar Pitri puja kora khan ke koi je ghor laga naam bar-bar loile kunbi bachi najai. Shiloh bhi Tai laga jaga thakise, aru Tai etu ke bhangi dise. Tai bisara tu bidexi, anath aru bidhwa nimite nyai thakise. Jeremiah ke etu manuh khan nimite prathana nakoribi koi kowa hoi.

Adhyay 7.

Amar Pitri pora Jeremiah logot te aha kotha tu:

Amar Pitri laga ghor laga duar te rukhibi aru ta te eneka prachar koribi: Tar ke aradhana koribole eitu duar khan pora ghusa sob Judah manuh khan, amar Pitri laga kotha huni bi. Sorgo laga sena khan laga Pitri, Israel laga amar Pitri pora eneka koi ase: Tumikhan laga rasta aru tumikhan laga kaam khan bodli koribi, titia Moi tumikhan ke eitu jagah te thakibo dibo.

Eitu thogai diya kotha khan ke biswas nakoribi: ‘Amar Pitri laga mondir! Amar Pitri laga mondir! Amar Pitri laga mondir!’ Jodi tumikhan hosa bhi tumikhan laga rasta aru kaam khan bodli kore, aru hosa bhi ekjon-ekjon logot niyai pora cholai, jodi tumikhan bideshi manuh, anath, nahole bidhowa ke dukh nadiye, aru eitu jagah te nirdoshi laga khoon nagiraye, aru tumikhan nijor laga khroti karne dusra devta khan laga piche najai, titia Moi tumikhan ke eitu jagah te, Moi tumikhan laga baba-apa khan ke bisi din age te diya desh te, hodai nimite thakibo dibo. Kintu sabi—tumikhan eku daam nathaka thogai diya kotha khan ke biswas kori ase. Tumikhan churi koribo, manuh morabo, bebichar koribo, misa kosom khabo, Baal ke boli dibo, tumikhan najana dusra devta khan laga piche jabo, titia Moi laga nam thaka eitu ghor te Moi usor te ahhi kene rukhi bi aru kobi, ‘Amikhan bachi ase!’—khali eitu sob ghin laga kaam khan kori thaki bole naki? Moi laga nam thaka eitu ghor tu tumikhan laga suku te chor khan laga gufa hoi jaise naki? Moi nijor eitu dekhise, amar Pitri pora koi ase.

Etiya Shiloh te thaka Moi laga jagah te jabi, jun jagah te Moi poila Moi laga nam rakhise, aru Moi laga manuh Israel laga biya kaam karne Moi ta te ki korise eitu sabi. Etiya, tumikhan eitu sob korise karne, amar Pitri pora koi ase—Moi tumikhan ke bar-bar koise kintu tumikhan huna nai, tumikhan ke matise kintu tumikhan jawab diya nai,

etu karne Moi laga nam pora mata, tumikhan biswas kora eitu ghor ke, aru Moi tumikhan aru tumikhan laga baba-apa khan ke diya jagah ke, Shiloh ke kora nisena, Moi koribo. Tumikhan laga sob sagai khan, Ephraim laga sob bacha khan ke bahar te phelai diya nisena, Moi tumikhan ke Moi laga suku pora bahar te phelai dibo. ^a

Tumi—eitu manuh khan nimite prathana nakoribi; tarkhan nimite kandi-kandi na prathana uthabi; Moi logot na binti koribi, kilemane Moi tumi laga kotha nahuni bo. Judah laga sheher khan aru Jerusalem laga rasta khan te tarkhan ki kori ase eitu tumi nadikhe naki? Bacha khan khuri joma kore, pitri khan jui julai, mahila khan sorgo laga rani nimite pitha banabole atta mohe; tarkhan Moi ke gusa uthabole dusra devta khan ke pani boli dhali diye. ^b Kintu tarkhan ke gusa uthai diya tu Moi ase naki? amar Pitri pora koi ase. Nijor laga sorom nimite, tarkhan nijor ke nohoi naki?

Etu karne Adhipoti Pitri pora eneka koi ase: Moi laga gusa aru khong eitu jagah te—manuh aru janwar khan uporte, kheti laga ghas-gash aru matty laga phol uporte—dhali dibo—jui jurikena, kitia bhi nabujibo.

Sorgo laga sena khan laga Pitri, Israel laga amar Pitri pora eneka koi ase: Tumikhan laga poora boli khan ke tumikhan laga dusra boli khan logot milai dibi aru gau-mangso tu tumikhan nijor khai lobi! Kilemane Moi tumikhan laga baba-apa khan ke Egypt desh pora bahar te ana din te, Moi tarkhan ke poora boli aru boli khan laga biste khali kotha kowa aru hukum diya nohoi. Moi tarkhan ke eneka hukum dise: Moi laga awaj mani bi, titia Moi tumikhan laga Pitri hobo aru tumikhan Moi laga bacha khan hobo. Moi tumikhan ke hukum diya rasta te pura-pura chlibi, titia tumikhan laga bhal hobo.

Kintu tarkhan huna nai nahole kaan ghura nai; tarkhan nijor laga mon laga bhabona pora cholise, tarkhan laga biya mon tan kori kene, aru age phale nohoi, piche phale jaise. Tumikhan laga baba-apa khan Egypt pora bahar aha din pora aji tak, Moi tumikhan logot Moi laga sob noukar bhabobadi khan ke, bar-bar, din-din, pathai dise. Hoilebi tarkhan Moi laga kotha huna nai nahole dhyan diya nai, kintu mon tan korise aru tarkhan laga baba-apa khan pora bhi bisi biya korise.

Tumi tarkhan ke eitu sob kotha kobo, kintu tarkhan tumi laga kotha nahuni bo; tumi tarkhan ke matibo, kintu tarkhan tumi ke jawab nadibo.

Tarkhan ke kobi: Eitu tu amar Pitri laga awaj namana aru thik kora kotha nalowa desh ase; hosa tu harai jaise, tarkhan laga thont pora kati phelaise. Tumar chuli kati kene phelai dibi; khali uncha pahar uporte kandibi, kilemane amar Pitri pora Tar gusa laga vonsho ke chari dise aru phelai dise.

Morai Diya Ghati

Judah pora Moi laga suku te biya korise, amar Pitri pora koi ase. Tarkhan Moi laga nam thaka ghor te tarkhan laga ghin laga murti khan rakhise, eitu ke apobitro kori kene. Tarkhan nijor laga chokra aru chukri khan ke jui te julai dibole Ben-Hinnom laga Ghati te Topheth laga uncha jagah khan bonaise—juntu Moi kitia bhi hukum diya nai, aru eitu kitia bhi Moi laga mon te aha nai. ^c Etu karne din khan ahi ase, amar Pitri pora koi ase, jitia eitu ke aru Topheth nahole Ben-Hinnom laga Ghati nakobo, kintu Morai Diya Ghati kobo; jagah khali nathaka tak tarkhan Topheth te puti dibo. Eitu manuh khan laga mora gaw khan akas laga chiriya aru prithibi laga janwar khan laga khana hobo, aru eitu ke khedabole kun bhi nathakibo. Moi Judah laga sheher khan aru Jerusalem laga rasta khan te khushi aru anond laga awaj, dulha aru dulhin laga awaj, chup kori dibo, kilemane desh tu ujar jagah hoi jabo.