Jeremiah 8

8 ¹"Chi atam chili,' da ithumwui Avāna hānga, 'Judahwui awungabing, wungnaobing, pāngmonbing, marānbing, kala Jerusalemwui mibingwui ara̱ chi athumwui chikhurwui eina khuishokra. ²Athumna leishi, sheba sā, shurthuwa, ngasan, kala khoruma zimik, kachāng, kala kazingramwui ashangva̱ saikorawui mangāli phayaira; makazipkhuimara, machifamara, ngaleiwui hār thāda sāhaora. ³Makaphā shimkhur hiwui shākkahai saikorana, ina athumli kashamvā apam kachiva̱li, kharing mahutli thi khuihaora,' da saikorawui Avāna hānga.

Latung Marāngai Mibing

⁴"Athumli hānglu, 'Ithumwui Avāna hithāda hānga: Mibingna konglui tharan, mangakarthukmarala? Kachikathāna ngareithui tharan, malatungluimara? ⁵Khisāda Jerusalemwui mibing hina katang mavaila ngalanchingda ngalanhaokhala? Athumna mikhanamli shurchinga; latung khavai marāngaimana.' ⁶Ina nāshungmida shāmi, kha athumna khamashung chi matuimana. Khipākha 'Ina khi sāhaokhala?' da hānglaga amakaphā eina mangareithuimana. Kachiva̱na raili muivai sigui thāda akhalattawui apongli yongzata. ⁷Kazingramli khalei varok china tangdala awui kapangsang atam chi thei, kala nāsha̱, yāngyao, kala vārok china athumwui rā atam chi mayona. Kha iwui mibingna athumwui Avāwui khamashung apong chi matheimana. ⁸Kathada nathumna 'Ithum thangkhameia, kala ithumwui Avāwui ain ithumli ngaso lei' da hāngpaira? Kachangkhatta ain kathembingwui kakapik kolomna chi kakapik sāmihaira. ⁹Thangkhameibing khayak samphangra; athum khakshingda manra. Yanglu, athumna iwui tui khalanhaira, chieina athumli khi thangkhamei tairakhala? ¹⁰Chiwui vang ina athumwui preiva̱ ngarāli kateibingli, kala athumwui lui chi khangatei akhavābingli mira. Kaja kateo eina kharei tang mi saikora, makhangarong katong samphanglui vang kākharāma; marān eina pāngmon tang, mi saikorana kakapik ot sai.' ¹¹Athumna iwui mibingwui naongalāva̱wui khamā pailatsor eina raimida, chingri makhalei tharan, 'Chingri, chingri' da hānga. ¹²Ningkakachai ot kasā chiwui vang athumna khayak sāla? Maningmana; athumli khayakwui ning khiotkha maleimara; kathāda mai hungra̱ khavai dala matheimana. Chiwui vang eina kongluikasangbingwui alungli athum kongluisangra; ina athumli sākhui atamli, athum shingasakra,' da ithumwui Avāna hānga. ¹³'Ina athumli kachangkhatta kazipra,' da ithumwui Avāna hānga. 'Drakhārongli drakhāthei maleimara, khaorārongli khaorāthei maleimara, kala thingnā ngahuira; ina athumli mikahai chi athumwui eina kānthui.'

¹⁴"Khisāda ithum hili pamrakhala? Ngazipta! Raipan sākahai keinungbingli yāmvālaga apam chili shimānra, kaja ithumwui Avāna ithumli shimān khavai retkahai, kala ithumli kathiriwui tara̱ mimanghaira, khikhalajila ithumna awuitungli morei sāhaira."

¹⁵Ithumna chingri chihāna, kha kaphā akhala marāmana; kharaiwui atam chihāna, kha khangachee rai. ¹⁶Yangkashewui siguibingwui kakhahek chi Dan eina shāhaira; athumwui sigui avābingwui ngasha̱ kakhong shālaga ngalei saikora nganuka. Athum rālaga ngalei kala chiwui alungli khalei ot saikora, keinung kala chili leikasa saikora tukshaira.

¹⁷"Kaja yanglu, ina nathumwui alungli meiwon phara̱ chihora, khipākha manui theira maningsi phara̱bing, kala athumna nathumli mara̱ra," da ithumwui Avāna hānga.

Jeremiahna awui mibingwui vang chapngachā

¹⁸Iwui khamathān shimānhaira, kakhanangna ili pemhaira; ining iwuklungli kazāhaira. ¹⁹Nganālu, ngalei katāva̱wui eina iwui mibingwui naongalāva̱wui ringkhangā akhon: "Ithumwui Avā Zionli maleila? Awui Awunga alungli maleiluila?" "Khisāda athumna athumwui rukkakhui meoma̱bing kala makānkhanā khangatei meoma̱bing eina ili malungvātngasakhaokhala? ²⁰Mahā kānhaira, lumkachāng peihaira, kha ithum mahuikhuimara." ²¹Iwui mibingwui naongalāva̱wui khamāwui vang I akha̱ sāhaira; I sifara, kala khangachee khangachāna ili yuihaira. ²²Gileadli teikhavai ari maleila? Chili raimi kahai mi maleila? Chithākha khisāda iwui mibingwui naongalāva̱wui kharai marāhaokhala?