Jeremiah 9

9 ¹Iyavo, iwui kui hi tara̱wui ura̱ ngasāhaora kaje, kala imik hi chāra̱wui ura̱ ngasāhaora kaje, chithākha iwui mibingwui naongalāva̱wui kathibingwui vang zimik ngayā ina chapsasui kaje! ²Iyavo, lamhāngli kharam kazatbingwui shimzunpam akha ina samphangsi kaje, chithākha iwui mibingli horhailaga athumwui eina zatthui kaje! Kaja athum saikora phokaphābing china, ning makatonga mibingwui ngarum akhana.

³Athumna athumwui male chi malā thāda hun; ngaleili ning katong maningla mikhanamna pangmeikharhaira. Makaphāwui eina makaphāli athumna zata, kala ili matheimana da ithumwui Avāna hānga.

⁴Mi saikorana awui khongnainaoli ngasharranu, kala achinā khipākhali mashitsangalu; kaja achinā kachiva̱ kakapika mayarana, kala khongnainao kachiva̱na makaphā tui matuizata.

⁵Mi kachiva̱na awui khongnainaoli kapik, kala mi akhala khamashung tui matuimana; kakapik tui matui khavai athumna athumwui male tamchitheihaira, khayon sākasā athum khalatta thāhairara. ⁶Na kakapikwui ngachaili zata; athumwui kapik chiwui vang athumna ili theikhavai marāngaimana, da ithumwui Avāna hānga.

⁷Chiwui vang saikorawui Avāna hithāda hānga: Yanglu, ina athumli heikhuira kala tamyangra; kaja iwui mibingwui naongalāva̱wui vang ina khi sārakhala? ⁸Athumwui male chi kathiwui malāthingna; chi mikhanam tui matui. Mi kachiva̱na awui khamor eina awui khongnainaoli chingri tui hānga, kha awui wuklungli ana ali rimpama. ⁹Ot hibingwui vang ina athumli tandi mamimarala? da ithumwui Avāna hānga. Hikathā yur akhali ina athut makhuimarala? ¹⁰"Ina kaphungbingwui vang chapra sifara, kala lamhāngwui seihomphungwui vang chapngachā sāra, kaja ramcho ngasāhaira, chieina mi akhala makānvāhaimana, kala yaowui kakhong chi mashāmana. Khamasaiwui vānaobingwui eina thuida sāyurbing eina tangda, saikora yāmda zatserhaira. ¹¹Ina Jerusalem chi ja̱tā kahai ramcho, ramfawui pikhavai ngasakra; kala Judahwui keinungbing chi kapama mi makhalei ramcho ngasakra."

¹²Hi machukkhui khavai khipāna thangmei kaje? Ngalei chi khisāda ramcho ngasāhaira, lamhāng thāda leirangda chili mi akhala makānvāhaimana kaji meichithei khavai, ithumwui Avāwui khamorna khipāli hāngkhala?

¹³Kala ithumwui Avāna hānga: Khikhalajila ina athumli mikahai iwui ain chi athumna horhaida, kala iwui kahāng manganāmana, lah chiwui azingli ma̱zata, ¹⁴kha athumwui avā ngarāna athumli tamchithei thāda, athum khalattawui ningli ngakaishitingtingda kazatlaga Baalbingwui thi shurvai. ¹⁵Chiwui vang saikorawui Avā, Israelwui ithumwui Avāna hithāda hānga: Hi mibingli thingkhā akha ina chishaira, kala athumli kathiri mangkhavai kasanga tara̱ mira. ¹⁶Athum kala athumwui avā ngarāna matheikasa yurbingwui ngachaili ina athumli chaiyāngmihaora, kala ina athumli sāshimānser kahai eina tangda athumwui thili raighai chihovāra.

¹⁷Saikorawui Avāna hithāda hānga: Machukkhuilu! Chapngachā them kahai sha̱naobing chi holu; sifa laa them kahaibing chi hokharālu. ¹⁸Athumna kathāka ithumwuitungli chapngachāranu, chieina ithumwui mik eina chāra̱ kala mikphung eina tara̱ longtāranu.

¹⁹Kaja kachapkhon akha Zionwui eina shāhaira: Ithum kathāda shimān ngasakhaokhala! Ithum khayaklakhaira, kaja ithumna ngalei horhaira, khikhalajila athumna ithumwui pamkhavai shaokhaimiserhaowa. ²⁰Ara, ithumwui Avāwui tui nganālu, O sha̱naobing; nathumwui khanāna awui khamorwui tui samphangranu. Nathumwui naongalāva̱bingli chapngachā tamchitheilu, kala mi kachiva̱na akhalattawui khongnainaoli chapchāt tamchitheilu. ²¹Kaja kathina ithumwui charfa eina kaizanghaira; chi ithumwui dolanli zanghaira, chānreiwui eina naoshinaobing kala leihngapha̱wui eina yaronnaobing katathaira.

²²Hānglu: ithumwui Avāna hithāda hānga: Mibingwui angun chi luili khalei hār thāda pitāra, kahātabingwui khanukli nothāhaida māvam thāda, chi kazipkhui khavai khipākha maleimana.

²³Ithumwui Avāna hithāda hānga: Thangkhamana awui thangmeiwui vang malangsoaranu, kapangana awui yāngwui vang malangsoaranu, kashāngana awui lanwui vang malangsoaranu; ²⁴Kha lāngsokhangai china hiwui vang lāngsoranu: chiya, ana theishingda ili theikhui; chiya, I nathumwui Avā chihaina, a china okathuili lukhamashan, mashun, kala khamashung khangarong eina sai; kaja hi thingkhali ina ringphāra, da ithumwui Avāna hānga.

²⁵Yanglu, phasāli mānga ahui rimkashokbing saikorali ina tandi khami atam chi rārāli, da ithumwui Avāna hānga. ²⁶Egypt, Judah, Edom, Ammonwui naomayarabing, Moab, kala athumwui sam kachichapa kala siwukli leikasābing saikora. Kaja hi yurbing saikora ahui marimkashoka, kala Israel shimkhur saikora ning khamakangbingna.