Jeremiah 10

10 ¹Israelwui shim, ithumwui Avāna nathumli hāngkahai tui chi nganālu.

²Ithumwui Avāna hithāda hānga: Yurbingwui apongli matamkhuialu, lah yurbingna chili ngacheelala kazingramli khalei khudambingli mangacheealu.

³Kaja mibingwui khangachā chi aremana: kachikathā akhana ngahongwui eina thing katat, kala them kathema chi aramtang eina sākhui. ⁴Lupā eina sinā eina chi mathā ngasak; yāmkār eina yotpi eina mangatha̱ khavai shaoshana. ⁵Karoptheiwui luiramli haikahai zak thāda, athumwui meoma̱ mamatuimana; athumli phungra, kaja athumna mazatpaimana. Athumli mangacheealu, kaja athumna zakkashi masārarmana, kala kaphā sākhavai pangshapla athumli maleimana.

⁶Ithumwui Avā, na kathā khipākha maleimana; na reikhamataina, kala nawui ming pangshapli reikhamataina. ⁷Yurbingwui Awunga, nali khipāna mangacheerakhala? Hi nawui vangna, kaja yurbingwui thangkhamei mi saikorawui alungli kala athumwui wungram saikorali na kathā khipākha maleimana. ⁸Athum saikora mangma̱ eina mangkhama̱na; athumwui tamchithei chi aremawui meoma̱wui eina rā—thing shapa. ⁹Shaokakhui lupā Tarshishwui eina, kala sinā Uphazwui eina khuirā; chi them kathembing kala sinā kasābingna sākahaina; athumwui kashankachon khamayinga kala hungrisina; chi saikora them kathem pāngwui otna. ¹⁰Kha ithumwui Avā chi akachanga akhana; a kharinga Avā kala katang makhavai Awungana. Awui malungkhavāta okathui khanuka, kala yurbingna awui malung thuikhavāt maokthuirarmana.

¹¹Athumli hithāda hānglu: "Kazing eina ngalei masāwui varebing chi ngaleiwui eina kala kazingwui azingwui eina shimānserhaora." ¹²A awui pangshap eina ngalei sākahaina, awui thangkhamei eina okathui sakāmi, kala awui theishingkakhui eina kazingram hārshoka. ¹³Ana matuikashok tharan kazingramli tara̱ chi ngarungninghai; okathui akatangwui eina ana leijui chi ngapānkā ngasaka. Kazing rokhavai ana rikhān ngashei ngasaka, kala masi chi awui sikhurwui eina ana phanngasaka. ¹⁴Mi kachiva̱ chi mangkhama̱mānga, kala thangkhamei maleimana; awui meoma̱bingna sinā kasaa ali maishi ngasaka, kaja awui meoma̱ chi makhamashungna, kala khaksui chi athumwui alungli maleimana. ¹⁵Athum chi makankhanāna, thānkhangui otsakna; athumli tandi khami atamli shimānserra. ¹⁶Jacobwui yar chi hibing kathā maningmana, kaja a ot saikora sākhuikahaina, kala Israel chi awui shimluiwui shangna; saikorawui Avā chi awui mingna. ^a a v16 "Jacobwui yar" hi Vareli mingzai kahai ming akhana, a awui mibingwui akachanga lan kala shimlui china da khangarinna.

Rārāki Raithā

¹⁷O kuinamli khalei kapam, ngalei chiwui eina nawui sārom kazipserlu.

¹⁸Kaja ithumwui Avāna hithāda hānga: Yanglu, hithā ngalei chili kapambingli ina hurlaga khuishokhaira, kala ina athumwuitungli sipkasā khuirāda, chieina athumna chi theira.

¹⁹Iwui khamāwui vang kakhanang iwui ngasāranu! Iwui sākaza̱ chi marlaka. Kha ina hānga, "Kachangkhat eina hi iwui kazātna, kala ina chi phungki kajina." ²⁰Iwui kachonshim sāshimānhaira, kala iwui khara̱ saikora sāshathaira. Iwui naongarāna ili horhailaga maleisā; iwui kachonshim latluida sākā khavai kala iwui chonrān sākā khavai khipākha maleisā. ²¹Kaja yaokahomabing mangkhama̱ ngasāhaira, kala athumna ithumwui Avāli maphāmana; chiwui vang athum mataikasang masamphangmana, kala athumwui yaoshang saikora chaiyānghaira. ²²Nganālu! Judahwui keinung ramcho ngasak khavai, ramfa yaokhavaipam sākhavai, atungshongwui ngaleiwui eina pao akha, kahaka ngaunlop akha rārāli. ²³O ithumwui Avā, ina thei: miwui apong chi awui khalattawui maningmana; phei kazata mi akhanala awui pheikār khalatta ngarān masāmana.

Jeremiahna Lukhamashan Khavai Seihā Kasā

²⁴O ithumwui Avā, nawui malungvāt eina maningla mashun eina ili hāngmachinlu; maningkha nana ili khikha maningla sāngasakra. ²⁵Nali makathei miyurbingwuitungli kala namingli makhangakao mibingwuitungli nawui malungkhavāt heirorlu; kaja athumna Jacobli shaihaira; ali shaida kānserhaira, kala awui seihomphung sākathānmihaira.