Maɓuɓɓugar Hawaye

Irmiya yana fata da a ce zai iya yin kuka ba tsayawa, ko kuwa ya tafi gaba ɗaya, domin maƙwabta da 'yan'uwa sun mai da ƙarya sana'a. Ubanmu ya ce za a kwashe ƙasar a warwatsa ta. Abu ɗaya da ya cancanci fahariya shi ne sanin sa — ƙauna marar canjawa, shari'a, adalci, abin da yake jin daɗinsa da gaske.

Babi na 9.

Kash, da a ce kaina maɓuɓɓugar ruwa ne, idanuna kuma maɓuɓɓugar hawaye, domin in yi kuka dare da rana saboda waɗanda aka kashe na 'yar mutanena! Kash, da a ce ina da masauki na matafiyi a cikin jeji, domin in bar mutanena in rabu da su! Gama dukansu mazinata ne, ƙungiyar mayaudara.

Suna lanƙwasa harshensu kamar baka; ƙarya, ba aminci ba, ta yi ƙarfi a ƙasar. Suna tafiya daga mugunta zuwa mugunta, ba su kuwa san ni ba, in ji Ubanmu.

Kowa yă yi hankali da maƙwabcinsa, kada kuma yă amince da wani ɗan'uwa; gama kowane ɗan'uwa mai ruɗi ne, kowane maƙwabci kuma yana zagawa yana yaɗa ƙarairayi.

Kowa yana ruɗin maƙwabcinsa, babu mai faɗar gaskiya; sun hori harsunansu su faɗi ƙarya, suna gajiyar da kansu da aikata mugunta. Kana zama a tsakiyar ruɗi; ta wurin ruɗinsu sun ƙi su san ni, in ji Ubanmu.

Saboda haka ga abin da Uba na rundunonin sama yake cewa: Ga shi zan tace su in gwada su, gama yaya kuma zan yi, saboda 'yar mutanena? Harshensu kibiya ce mai kisa; yana faɗar ruɗi. Da bakinsa kowa yakan yi wa maƙwabcinsa maganar salama, amma a zuciyarsa yana masa kwanton ɓauna. Ba zan hukunta su saboda waɗannan abubuwa ba? in ji Ubanmu. Ba zan yi sakayya a kan irin wannan al'umma ba? “Zan yi kuka da makoki domin duwatsu, in ɗaga murya da makoki domin wuraren kiwo na jeji, gama an mayar da su kango har babu mai ratsawa, ba a kuma jin kukan shanu. Daga tsuntsayen sama har zuwa dabbobi, duka sun gudu sun tafi. Zan mayar da Urushalima tsibin kango, mafakar diloli; zan kuma mayar da biranen Yahuda kufai, marar mazauni.”

Wane ne mai hikima da zai gane wannan? Ga wa bakin Ubanmu ya yi magana, don yă bayyana dalilin da ya sa aka hallaka ƙasar, ta ƙone kamar jeji, har babu mai ratsa ta?

Ubanmu kuwa ya ce, Domin sun yashe koyarwata, wadda na ba su, ba su kuwa yi biyayya ga muryata ba, ba su kuma yi tafiya bisa gare ta ba, sai dai da taurin kai suka bi gatan zukatansu, suka bi gumakan Ba'al, yadda iyayensu suka koya musu. Saboda haka ga abin da Uba na rundunonin sama, Ubanmu na Isra'ila, yake cewa: Zan ciyar da mutanen nan da abinci mai ɗaci, in kuma ba su ruwa mai dafi su sha. Zan warwatsa su a cikin al'ummai waɗanda su da iyayensu ba su taɓa sani ba, zan kuma aika takobi a bayansu har in hallaka su.

Ga abin da Uba na rundunonin sama yake cewa: Ku lura! Ku kira mata gwanaye a kuka; ku aika a kira masu ƙwarewa a makoki. Bari su yi hanzari su ɗaga kukan makoki a kanmu, domin idanunmu su zubar da hawaye, fatan idanunmu kuma su zuba da ruwa.

Gama ƙarar makoki ana ji daga Sihiyona: Kash, an hallaka mu! Mun sha kunya ƙwarai, domin mun bar ƙasar, domin sun rushe gidajenmu. Yanzu ku ji maganar Ubanmu, ku mata; bari kunnuwanku su karɓi maganar bakinsa. Ku koya wa 'ya'yanku mata kuka, kowace kuma tă koya wa maƙwabciyarta makoki. Gama mutuwa ta hau ta tagoginmu; ta shiga fadodinmu, tana yanke yara daga tituna, samari kuma daga dandali.

Ka faɗa: Ga abin da Ubanmu ya furta: Gawawwakin mutane za su fāɗi kamar taki a saura, kamar dammunan hatsi da aka bari a bayan mai girbi, babu mai tarawa.

Ga abin da Ubanmu yake cewa: Kada mai hikima yă yi fariya da hikimarsa, kada mai ƙarfi yă yi fariya da ƙarfinsa, kada mai arziki yă yi fariya da arzikinsa; sai dai mai yin fariya yă yi fariya da wannan: cewa ya gane ya kuma san ni—cewa ni ne Ubanku, wanda yake aikata madawwamiyar ƙauna, da shari'a, da adalci a duniya; gama a cikin waɗannan abubuwa nake jin daɗi, in ji Ubanmu.

Ga shi, kwanaki suna zuwa, in ji Ubanmu, sa'ad da zan hukunta dukan waɗanda aka yi musu kaciya a jiki kaɗai. Masar, Yahuda, Edom, 'ya'yan Ammon, Mowab, da dukan waɗanda suke aske gefen kansu suke kuma zama a hamada. Gama dukan waɗannan al'ummai marasa kaciya ne, dukan gidan Isra'ila kuma masu taurin zuciya ne.