An Fitar da Ƙasusuwa daga Kaburbura

Mutane sukan faɗi su kuma tashi; wannan jama'a ta faɗi ta zauna a ƙasa. Tsuntsayen da suke ƙaura sun fi sanin lokacinsu fiye da yadda Yahuza ta san hanyoyin Ubanta. Irmiya, cike da baƙin ciki, ya tambaya ko babu magani a Gileyad — babin kuwa bai amsa masa ba.

Babi na 8.

“A lokacin nan,’ in ji Ubanmu, ‘za su fitar da ƙasusuwan sarakunan Yahuda, da na shugabanni, da na firistoci, da na annabawa, da na mutanen Urushalima daga kaburburansu. Za a shimfiɗa su a gaban rana, da wata, da dukan rundunar sama waɗanda suka ƙaunace su, suka bauta musu, suka bi su, suka nemi shawararsu, suka kuma yi musu sujada—ba a tattara su ba, ba a binne su ba, za su zama taki a bisa ƙasa. Dukan raguwar wannan mugun iyali, duk inda na kore su, za su gwammace mutuwa fiye da rai,’ in ji Uba na rundunonin sama.

Mutanen da Ba Za Su Komo Ba

“Ka faɗa musu, ‘Ga abin da Ubanmu ya ce, In mutane suka faɗi, ba sa sāke tashi ne? In wani ya juya baya, ba ya komowa ne? Don me fa wannan jama'a, Urushalima, suka juya baya a cikin ridda marar ƙarewa? Suna riƙe da ruɗu; sun ƙi su komo.’ Na saurara da kyau, amma ba sa faɗar abin da yake daidai. Babu wanda yake juyowa daga muguntarsa, yana cewa, ‘Me na yi?’ Kowa yana bin tafarkinsa, kamar dokin da yake sheƙa zuwa yaƙi. Har ma shamuwa a sararin sama ta san lokutan da aka ƙayyade mata, kurciya, da alallaka, da gauraka kuma suna kiyaye lokacin zuwansu. Amma mutanena ba su san hanyoyin adalci na Ubansu ba. Yaya za ku ce, ‘Mu masu hikima ne, shari'ar Ubanmu kuma tana tare da mu,’ alhali kuwa alƙalamin ƙaryar marubuta ya mai da ita ƙarya? Masu hikima za su sha kunya; za su firgita, a kuma kama su a tarko. Ga shi, sun ƙi maganata, to wace hikima ce ta ragu a cikinsu? Saboda haka zan ba da matansu ga waɗansu, da gonakinsu ga sababbin masu mallaka. Gama daga ƙarami zuwa babba, kowa yana kwaɗayin ribar zalunci; daga annabi zuwa firist, kowa yana aikata ruɗu.’ Suna yin maganin raunin 'yar mutanena kamar ba abin kome ba ne, suna cewa, ‘Salama, salama,’ alhali kuwa babu salama. Sun ji kunya saboda abubuwan banƙyama da suka yi? A'a, ba su ji wata kunya ba ko kaɗan; balle ma su san yadda za su kunyata. Saboda haka za su faɗi tare da waɗanda suka faɗi; sa'ad da na hukunta su, za a kā da su,’ in ji Ubanmu. ‘Hakika zan tattara su,’ in ji Ubanmu. ‘Ba za a sami inabi a kuringar inabi ba, ba ɓaure a itacen ɓaure, ganyaye kuma za su yanƙwane; abin da na ba su zai shuɗe daga gare su.’

“Don me muke zaune a nan? Ku tattaru! Bari mu gudu zuwa birane masu katanga mu hallaka a can, gama Ubanmu ya ƙaddara mana hallaka, ya kuma ba mu ruwa mai dafi mu sha, domin mun yi masa zunubi.”

Mun sa zuciya ga salama, amma babu wani alheri da ya zo; mun sa rai ga lokacin warkarwa, amma a maimako ga razana. Hanshin dawakan abokan gaba ana jinsa daga Dan; da jin ƙarar haniniyar ingarmansu dukan ƙasar ta yi rawar jiki. Sun zo suka cinye ƙasar da duk abin da yake cikinta, birnin da dukan mazaunanta.

“Gama ga shi, ina aiko muku da macizai masu dafi a cikinku, gamsheƙa waɗanda ba a iya tsarma su, za su kuma sare ku,” in ji Ubanmu.

Irmiya Ya Yi Kuka domin Mutanensa

Farin cikina ya ƙare, baƙin ciki ya rinjaye ni; zuciyata ta karai a cikina. Ku saurara—ga kukan 'yar mutanena daga ƙasa mai nisa, “Ashe, Ubanmu ba ya cikin Sihiyona ne? Ashe, Sarkinta ba ya cikinta kuma?” “Me ya sa suka tsokane ni in yi fushi da sassaƙaƙƙun gumakansu, da gumakan baƙi marasa amfani? Girbi ya wuce, rani kuma ya ƙare, ba a kuwa cece mu ba.” Saboda raunin 'yar mutanena na ragargaje; ina makoki, razana kuma ta kama ni. Ashe, babu man magani a Gileyad? Ashe, babu likita a can? Don me fa warkarwar 'yar mutanena ba ta zo ba?