ዒላ ንብዓት

ኤርሚያስ ኣቋሪፁ ኽበኪ፥ ወይ ፈፂሙ ኽኸይድ ይምነ፥ ጐረባብትን ኣሕዋትን ምሕሳው ልሚዶምዎ እዮም እሞ። ኣቦና እታ ሃገር ክትባድምን ክትብተንን ከም ዝኾነት ይዛረብ። እቲ ዝምካሕ ዘብል ሓደ ነገር፥ ንእኡ ምፍላጥ እዩ—እሙን ፍቕሪ፥ ፍትሒ፥ ፅድቂ፥ እቲ ብሓቂ ባህ ዝብሎ።

ምዕራፍ 9።

ርእሰይ ዓይኒ ማይ፥ ኣዒንተይ ከዓ ዒላ ንብዓት እንተ ዝኾና ነይረ! ምእንቲ ቅቱላት ጓል ህዝበይ ለይትን መዓልትን ምበኸኹ ነይረ። ኣብ በረኻ ናይ ኣጋይሽ መሕደሪ እንተ ዝህልወኒ ነይሩ፥ ንህዝበይ ሓዲገ ካባታቶም ምኸድኩ ነይረ! ኵሎም ኣመንዝራታት፥ ጉጅለ ኸዳዓት እዮም እሞ።

ልሳኖም ከም ቀስቲ ይገትሩ፤ ኣብታ ምድሪ ዝበርትዐ ሓሰት እምበር እሙንነት ኣይኮነን። ካብ ክፉእ ናብ ክፉእ ይኸዱ፥ ንኣይ ከዓ ኣይፈልጡን እዮም፥ ይብል ኣቦና።

ነፍሲ ወከፍ ካብ ብፃዩ ይጠንቀቕ፥ ኣብ ዝኾነ ሓው ከዓ ኣይተኣማመን፤ ነፍሲ ወከፍ ሓው ኣታላሊ፥ ነፍሲ ወከፍ ብፃይ ከዓ እናሓመየ ይኸይድ እዩ እሞ።

ነፍሲ ወከፍ ንብፃዩ የታልል፥ ሓቂ ዝዛረብ ከዓ የለን፤ ልሳኖም ሓሶት ክዛረብ ኣላመዱ፥ ክፉእ እናገበሩ ድማ ደኸሙ። ኣብ ማእኸል ተንኰል ትነብር ኣለኻ፤ ብተንኰሎም ንኣይ ክፈልጡ ኣበዩ፥ ይብል ኣቦና።

ስለዙይ ኣቦ ሰራዊት ሰማይ ከምዙይ ይብል ኣሎ፦ እንሆ ኣነ ከፅርዮምን ክፍትኖምን እየ፤ ብዘይካዙይ ደኣ ምእንቲ ጓል ህዝበይ እንታይ ክገብር እኽእል? ልሳኖም ቀታሊ ፍላፃ እዩ፤ ተንኰል ይዛረብ። ነፍሲ ወከፍ ብኣፉ ንብፃዩ ሰላም ይዛረቦ፥ ብልቡ ግና ይድብዮ። ስለ ነገራት እዚኣትዶ ኣይቐፅዖምን? ይብል ኣቦና። ኣብ ከምዙይ ዝበለ ህዝቢዶ ኣይበቀልን? “ምእንቲ እቶም ኣኽራን ክበኪ ዋይ ዋይታ ኸዓ ክብል እየ፥ ምእንቲ ሰውሒ በረኻ ድማ መልቀስ ከልዕል እየ፤ ባዲሞም እዮም እሞ ሓላፊ የለን፥ ድምፂ ከፍቲ ኸዓ ኣይስማዕን። ካብ ኣዕዋፍ ሰማይ ክሳዕ ኣራዊት፥ ኵሎም ሃዲሞም ከዱ። ንኢየሩሳሌም ኵምሪ ዑና፥ መዕቘቢ ወኻሩ ክገብራ እየ፤ ንከተማታት ይሁዳ ኸዓ ሰብ ዘይነብረለን ዝባደማ ክገብር እየ።”

እዙይ ከስተውዕል ዝኽእል ጥበበኛ መን እዩ? እታ ምድሪ ስለምንታይ ከም ዝጠፍአት፥ ከም በረኻ ተቓፂላ ሓላፊ ዘይብላ ኸም ዝኾነት ክገልፅ፥ ኣፍ ኣቦና ንመን ተዛሪብዎ?

ኣቦና ኸዓ ከምዙይ ይብል ኣሎ፦ ነቲ ዝሃብክዎም ሕገይ ስለ ዝሓደግዎ፥ ድምፀይ ስለ ዘይሰምዑ፥ ብእኡውን ስለ ዘይተመላለሱ፥ ድሕሪ ልቦም ብትሪ ተኸቲሎም ደኣ ከምቲ ኣቦታቶም ዝመሃርዎም ደድሕሪ በዓሊም ከዱ እምበር። ስለዙይ ኣቦ ሰራዊት ሰማይ፥ ኣቦ እስራኤል ከምዙይ ይብል ኣሎ፦ ነዝ ህዝቢ እዙይ መሪር መግቢ ከብልዖም፥ ማይ መርዚ ኸዓ ከስትዮም እየ። ኣብ ማእኸል እቶም ንሳቶምን ኣቦታቶምን ዘይፈለጥዎም ህዝብታት ፋሕ ከብሎም እየ፤ ክሳዕ ዘጥፍኦም ድማ ደድሕሪኦም ሰይፊ ክሰድድ እየ።

ኣቦ ሰራዊት ሰማይ ከምዙይ ይብል ኣሎ፦ ኣስተውዕሉ! ነተን ኣብ ብኽያት ዝለመዳ ኣንስቲ ፀውዑ፤ ነተን ኣብ መልቀስ ዝተለማመዳ ኸዓ ለኣኹለን። ይቀላጠፋ እሞ ዋይ ዋይታ የልዕላልና፥ ኣዒንትና ንብዓት ምእንቲ ኽውሕዛ፥ ሽፋሽፍትና ድማ ማይ ምእንቲ ኸንጠብጥብ።

ካብ ፅዮን ድምፂ ዋይ ዋይታ ይስማዕ ኣሎ እሞ፦ ከመይ ጠፋእና! ነታ ምድሪ ሓዲግና ኢና እሞ የመና ሓፊርና፤ ንማሕደርና ኣፍሪሶም እዮም እሞ። ኣትን ኣንስቲ፥ ሕዚ ቃል ኣቦና ስምዓ፤ ኣእዛንክን ከዓ ቃል ኣፉ ይቀበላ። ነኣዋልድክን ዋይ ዋይታ መሃራ፥ ነፍሲ ወከፍ ድማ ንብፃያ መልቀስ መሃር። ሞት ብመሳዅትና ደዪቡ፥ ናብ ኣዳራሻትና ኣትዩ፥ ንቘልዑ ካብ መንገዲ፥ ንመንእሰያት ከዓ ካብ ኣደባባያት ይቘርፅ ኣሎ።

ተዛረብ፦ ኣቦና ከምዙይ ይብል ኣሎ፦ ሬሳታት ሰባት ከም ድዂዒ ኣብ ገፅ መሮር ክወድቕ እዩ፤ ከም ድሕሪ ዓፃዳይ ዝተረፈ ዕትሪ እኽሊ፥ ዝእክቦም ከዓ ዘይብሉ።

ኣቦና ከምዙይ ይብል ኣሎ፦ እቲ ጠቢብ ብጥበቡ ኣይመካሕ፤ እቲ ሓያል ብሓይሉ ኣይመካሕ፤ እቲ ሃብታም ብሃብቱ ኣይመካሕ፤ እቲ ዝምካሕ ግና በዙይ ይመካሕ፦ ንኣይ ከም ዝርዳእን ዝፈልጠንን፥ ኣነ ኸዓ ኣብ ምድሪ ብምሕረትን ብፍርድን ብፅድቅን ዝገብር ኣቦኻ ምዃነይ፤ በዞም ነገራት እዚኣቶም ባህ ይብለኒ እዩ እሞ፥ ይብል ኣቦና።

እንሆ፥ መዓልቲታት ይመፅእ ኣሎ፥ ይብል ኣቦና፤ ነቶም በስጋ ጥራሕ ዝተገረዙ ዅሎም ክቐፅዖም እየ። ግብፂ፥ ይሁዳ፥ ኤዶም፥ ደቂ ኣሞን፥ ሞኣብ፥ ኵሎም እቶም ወሰን ፀጕሮም ዝላፅዩ ኣብ በረኻ ዝነብሩን፤ እዞም ኵሎም ህዝብታት ዘይግሩዛት እዮም እሞ፤ ኵላ ቤት እስራኤል ድማ ልባ ዝተረረ እዩ።