ኤርሚያስ 8 FHB Father's Heart Bible™

8 ¹“በቲ ጊዜ እቱይ፥ ናይ ይሁዳ ነገስታትን መኳንንትን ካህናትን ነቢያትን ነበርቲ ኢየሩሳሌምን ዓፅሚ ኻብ መቓብሮም ከውፅእዎ እዮም፥” ይብል ኣሎ ኣቦና። ²ኣብ ቅድሚ እቲ ዘፍቀርዎን ዘገልገልዎን ዝሰዓብዎን ዝተማኸርዎን ዘምለኽዎን ፀሓይን ወርሕን ኵሎም ሰራዊት ሰማይን ክዝርግሕዎም እዮም፤ ኣይእከቡን ኣይቕበሩን፥ ኣብ ልዕሊ ምድሪ ድማ ከም ድዂዒ ክኾኑ እዮም። ³ኵሉ ተረፍ እዚ እኩይ ዓሌት እዙይ፥ ናብቲ ዝሰጐጕኽዎም ኵሉ ቦታ፥ ካብ ህይወት ንላዕሊ ሞት ክመርፁ እዮም፥ ይብል ኣሎ ኣቦ ሰራዊት ሰማይ።

ክምለስ ዘይደሊ ህዝቢ

⁴ከምዙይ ድማ በሎም፦ “ኣቦና ከምዙይ ይብል ኣሎ፦ ‘ሰባት እንተ ወደቑ፥ ዳግም ኣይትስኡንዶ? ሓደ ሰብ እንተ ዞረ ኸዓ፥ ኣይምለስን? ⁵ነዝ ህዝቢ ኢየሩሳሌም እዙይ፥ ናይ ዘለኣለም ምዝንባል ስለ ምንታይ ደኣ ዞረ? ንሓሰት ይለግቡ፤ ክምለሱ ኸዓ ኣበዩ።’ ⁶ኣጥቢቐ ሰማዕኹ፥ ንሳቶም ግና ቅኑዕ ኣይዛረቡን። ‘እንታይ ገበርኩ?’ እናበለ፥ ካብ እከዩ ዝምለስ የለን። ነፍሲ ወከፍ ናብ መገዱ ይጐዪ፥ ከምቲ ናብ ውግእ ዝጓየ ፈረስ። ⁷እታ ኣብ ሰማይ ዘላ ራዛ እኳ ነቲ እተመደበላ ዘመን ትፈልጥ፥ ባሪቶን ሰሰናን ሽቅርቅርን ከዓ ጊዜ ምምፃኣን ይሕልዋ። ህዝበይ ግና ነቲ ፍትሓዊ መገዲ ኣቦኦም ኣይፈልጡን። ⁸“ንሕና ጥበበኛታት ኢና፥ ሕጊ ኣቦናውን ምሳና ኣሎ፥” ከመይ ኢልኩም ትዛረቡ? ብሓቂ ግና እታ ሓሳዊት ብርዒ መምህራን ሕጊ ናብ ሓሰት ለዊጣቶ እያ። ⁹እቶም ጥበበኛታት ክሓፍሩ እዮም፤ ክሽበሩን ክጥመዱን እዮም። እንሆ፥ ንቓለይ ነፂጎምዎ እዮም፤ እንታይ ጥበብ ደኣ ተሪፍዎም? ¹⁰ስለዙይ ኣንስቶም ንኻልኦት፥ ግራውቶም ድማ ንሓደሽቲ በዓል ዋናታት ክህቦም እየ። ካብ ንኡሽቶ ክሳዕ ዓብዪ፥ ነፍሲ ወከፍ ብስስዐ ናይ ዓመፃ ረብሓ ይደሊ፤ ካብ ነቢይ ክሳዕ ካህን፥ ነፍሲ ወከፍ ሓሰት ይገብር። ¹¹ንቍስሊ ጓል ህዝበይ ከም ፈኲስ ገይሮም ይፍውስዎ፥ ‘ሰላም፥ ሰላም’ ይብሉ፤ ሰላም ግና የለን። ¹²ነቲ ዝገበርዎ ርኹስ ነገር ሓፊሮሙዶ? ኣይፋሉን፥ ፈፂሞም ኣይሓፈሩን፤ ክሓፍሩ እኳ ኣይፈለጡን። ስለዙይ ኣብ ማእኸል እቶም ዝወደቑ ክወድቑ እዮም፤ ኣብ ዝቐፅዖም ጊዜ፥ ክድፍኡ እዮም፥ ይብል ኣሎ ኣቦና። ¹³“ብርግፅ ክእክቦም እየ፥” ይብል ኣሎ ኣቦና። “ኣብ ኦም ወይኒ ወይኒ የለን፥ ኣብ ኦም በለስ ድማ በለስ የለን፥ ቆፅሊ ኸዓ ክነቕፅ እዩ፤ እቲ ዝሃብክዎም ድማ ካብኣቶም ክሓልፍ እዩ።”

¹⁴“ኣብዙይ ኮፍ ኢልና ስለ ምንታይ ኢና? ኣብ ሓደ ተኣከቡ! ናብተን ጽኑዓት ከተማታት ንህደም እሞ ኣብኡ ንጥፋእ፥ ኣቦና ክንጠፍእ ፈሪዱና ማይ መርዚ ድማ ክንሰቲ ሂቡና እዩ እሞ፥ ንእኡ በዲልና ኢና።”

¹⁵ሰላም ተስፋ ገበርና፥ ፅቡቕ ግና ኣይመፀን፤ ጊዜ ፈውሲ ተፀቤና፥ ኣብክንድኡ ግና ራዕዲ ኮነ። ¹⁶ናይ ኣፍራስ ፀላኢ ፍሽኽታ ካብ ዳን ይስማዕ ኣሎ፤ በቲ ሀራር ኣፍራሶም ድምፂ ኵላ ምድሪ ትርዕድ። ንሳቶም መፂኦም ነታ ምድርን ኵሉ ዘለዋን፥ ነታ ኸተማን ኣብኣ ዝነብሩ ዅሎምን ክበልዕዎም እዮም።

¹⁷“እንሆ፥ ኣብ ማእኸልኩም መርዛማት ኣትማን እሰድድ ኣለኹ፥ ክጥንቈሉ ዘይኽእሉ ኣትማን፥ ንሳቶም ድማ ክነኽሱኹም እዮም፥” ይብል ኣሎ ኣቦና።

ኤርሚያስ ስለ ህዝቡ በኸየ

¹⁸ሓጎሰይ ተወድአ፥ ሓዘን ወሪሩኒ፤ ልበይ ኣብ ውሽጠይ ሓሚሙ። ¹⁹ስማዕ፥ ድምፂ ኣውያት ጓል ህዝበይ ካብ ርሑቕ ምድሪ ይስማዕ ኣሎ፦ “ኣቦና ኣብ ፅዮን የለን? ንጉሳ ደጊም ኣብኣ የለን?” “ስለ ምንታይ ብዝተቐረፁ ምስልታቶም፥ ብኸንቱ ባዕዳውያን ጣኦታቶም ኣቘጥዑኒ? ²⁰ዓፂድ ሓለፈ፥ ሓጋይ ተወድአ፥ ንሕናውን ኣይደሓንናን።” ²¹ስለ ቍስሊ ጓል ህዝበይ ተሰበርኩ፤ ሓዘንኩ፥ ራዕዲ ድማ ሓዘኒ። ²²ኣብ ገለዓድ በለሳን የለን? ኣብኡ ሓኪም የለን? ስለ ምንታይ ደኣ ፈውሲ ጓል ህዝበይ ኣይመፀን?