Jeremia 8 FHB Father's Heart Bible™

8 ¹“Ihinda rĩu,” ũguo nĩguo Ithe witũ ekuuga, “nĩmakaruta mahĩndĩ ma athamaki a Juda, na ma anene, na ma athĩnjĩri Ngai, na ma anabii, na ma andũ a Jerusalemu, kuuma mbĩrĩrainĩ ciao. ²Nĩmakaaranĩrio mbere ya riũa, na mweri, na mbũtũ ciothe cia igũrũ iria meendire, na magĩcitungatĩra, na magĩcirũmĩrĩra, na magĩciũria ũtaaro, na magĩcihooya; itikoonganĩrĩrio, kana ithikwo, no igaatuĩka thumu igũrũ rĩa thĩ. ³Matigari mothe ma nyũmba ĩno njũru, kũrĩa guothe ndĩmaingatĩte, nĩmagethuurĩra gĩkuũ handũ ha muoyo,” ũguo nĩguo Ithe witũ wa mbũtũ cia igũrũ ekuuga.

Andũ arĩa Matangĩcooka

⁴“Meere atĩrĩ, ‘Ũũ nĩguo Ithe witũ ekuuga: Andũ mangĩgũa, githĩ matiũkĩraga? Mũndũ angĩgarũrũka, githĩ ndacookaga? ⁵Nĩ kĩĩ gĩgũtũma andũ aya, nĩo Jerusalemu, mahĩtũke, magĩcookacookaga na thuutha hĩndĩ ciothe? Nĩmarũmĩtie maheeni; nĩmaregete gũcooka.’ ⁶Nĩthikĩrĩirie wega, no matiaragia ũrĩa kwagĩrĩire. Gũtirĩ mũndũ ũtiganagĩria ũũru wake, akĩũria atĩrĩ, ‘Nĩ atĩa njĩkĩte?’ O mũndũ nĩahanyũkaga njĩra yake mwene, ta mbarathi ĩgũtheeka ĩrorete mbaarainĩ. ⁷O na nyoni ĩrĩa ĩrĩ rĩerainĩ nĩĩũĩ mahinda mayo marĩa maathĩrĩre, nayo ndutura, na nyoni ya rũhuho, na njũũ, nĩimenyagĩrĩra ihinda rĩa gũũka gwacio. No andũ akwa matiũĩ mĩthiĩre ya kĩhooto ya Ithe wao. ⁸Mũngĩhota atĩa kuuga atĩrĩ, ‘Ithuĩ tũrĩ oogĩ, na watho wa Ithe witũ ũrĩ hamwe na ithuĩ,’ o rĩrĩa ma karamu ka maheeni ka aandĩki nĩkahaanĩtie watho ũcio ũtuĩke wa maheeni? ⁹Andũ acio oogĩ nĩmagaconorithio; nĩmakamakio na manyiitwo mũtegoinĩ. Ta rorai, nĩmaregete kiugo gĩakwa, nĩ ũndũ ũcio nĩ ũũgĩ ũrĩkũ ũtigĩte thĩinĩ wao? ¹⁰Nĩ ũndũ ũcio nĩngaheana atumia ao kũrĩ andũ angĩ, na mĩgũnda yao kũrĩ eene angĩ. Amu kuuma ũrĩa mũnini mũno nginya ũrĩa mũnene, o mũndũ nĩ mũkoroku wa uumithio ũtarĩ wa kĩhooto; kuuma kũrĩ anabii nginya athĩnjĩri Ngai, o mũndũ nĩekaga maheeni.’ ¹¹Nĩmohaga kĩronda kĩa mwarĩ wa andũ akwa taarĩ ũndũ wa tũhũ, makiugaga atĩrĩ, ‘Thaayũ, thaayũ,’ o rĩrĩa gũtarĩ thaayũ. ¹²Nĩmaconokire nĩ ũndũ wa maũndũ marĩa marĩ magigi meekire? Aca, matiigana gũconoka o na hanini; o na matiamenyaga gũconoka ũthiũ. Nĩ ũndũ ũcio nĩmakagũanĩra hamwe na arĩa makĩgũa; hĩndĩ ĩrĩa ngaamaherithia, nĩmakagũithio thĩ,’ ũguo nĩguo Ithe witũ ekuuga. ¹³‘Ti-itherũ nĩngamacookanĩrĩria,’ ũguo nĩguo Ithe witũ ekuuga. ‘Gũtikagĩa thabibũ mũthabibũinĩ, o na gũtikagĩa ngũyũ mũkũyũinĩ, namo mathangũ nĩmakooma; kĩrĩa ndaamaheire nĩgĩkeehera.’

¹⁴“Nĩ kĩĩ gĩtũmaga tũikare haha? Cookanĩrĩrai hamwe! Rekei tũũrĩre matũũrainĩ marĩa mairigĩre na hinya, tũthirĩre kuo, amu Ithe witũ nĩatũtuĩrĩire gũthira, na agĩtũhe maaĩ marĩ na thumu tũnyue, tondũ nĩtũmwĩhĩirie.”

¹⁵Tweehokaga thaayũ, no gũtirĩ wega wokire; tũkĩĩrĩgĩrĩra ihinda rĩa kũhonio, no handũ ha ũguo gũkĩgĩa na kĩmako. ¹⁶Mũhũmũ wa mbarathi cia thũ nĩũiguĩtwo kuuma Dani; naguo mũgambo wa kũania kwa mbarathi ciao cia njamba nĩũtũmĩte bũrũri wothe ũinaine. Nĩmokĩte makarĩa bũrũri na indo ciothe iria irĩ kuo, itũũra inene na arĩa othe matũũraga kuo.

¹⁷“Amu ta rorai, nĩndamũtũmĩra nyoka irĩ na thumu gatagatĩinĩ kanyu, nduĩra iria itangĩhota kũrogwo, nacio nĩikamũrũma,” ũguo nĩguo Ithe witũ ekuuga.

Jeremia Akĩrĩrĩra Andũ ake

¹⁸Gĩkeno gĩakwa nĩgĩthirĩte, kĩeha nĩkĩĩhũmbĩte; ngoro yakwa ĩrĩ na mũrimũ thĩinĩ wakwa. ¹⁹Ta thikĩrĩria—kĩrĩro kĩa mwarĩ wa andũ akwa kuuma bũrũri wa kũraya: “Githĩ Ithe witũ ndarĩ Zayuni? Githĩ Mũthamaki wayo ndarĩ thĩinĩ wayo rĩngĩ?” “Nĩ kĩĩ gĩtũmĩte maandakarie na mĩhianano yao ya gwĩcũhio, na mĩhianano ya kũngĩ ĩtarĩ bata? ²⁰Magetha nĩmathirĩte, hĩndĩ ya riũa nĩĩthirĩte, na ithuĩ tũtirĩ twahonokio.” ²¹Nĩ ũndũ wa kĩronda kĩa mwarĩ wa andũ akwa nĩthuthĩtwo; nĩndĩracakaya, na kĩmako nĩkĩĩnyiitĩte. ²²Kaĩ gũtarĩ ndawa kũu Gileadi? Kaĩ gũtarĩ mũgangari kũu? Nĩ kĩĩ gĩgĩtũmĩte kũhonio kwa mwarĩ wa andũ akwa gũtookĩte?