Mi eng' bukuit

Jeremiah 8 FHB Father's Heart Bible™

Kiistoi 15% eng' kiy ne iale korook →
Bukuit

Koweek che Kigomoong'u eng' Kereeriisyek

Butei piik ak koweegyigei; but pichu ago ma koweek. Ngen taretigap kipsengwet saitanywa kosiir ye ngen Judah ortinwegap Kwandanyi. Jeremiah, ne mionei eng' rirutyet, teebe kole mi anan mwaanik eng' Gilead—ago ma kowolji soobani.

Ng'alaali Kwandanyo eng' mustarisyek 1–14, 17

Sura 8.

“Eng' peetuunooto,” mwaei Kwandanyo kole, “komoong'u koweegap laitorinigap Judah, ak kiptainik, ak tisiik, ak maotik, ak piigap Jerusalem eng' kereeriisyekwak. Kiyadu icheek eng' taitap asiista, ak arawet, ak lugoosyek tugul che po kipsengwet che ki chame, ak che ki boisyechi, ak che ki sup, ak che ki ng'alaalji, ak che ki saaei—ma kiyumi, ma kitup, koek suumeek eng' ng'wony. Che ng'etu tugul che po ooreet ni ne ya, ole tugul ole ki aoone icheek, kilewen meet kosiir sabeet,” mwaei Kwanda ne po lugoosyegap kipsengwet kole.

Piik che Maweegei Let

“Leenji icheek, ‘Mwaei Kwandanyo kole: Ngot kobut piik, tos mang'eetyi? Ngot koweigei chii, tos maweekyigei let? Amu nee anyun si koweigei pichu, Jerusalem, eng' weekset ne koigeny? Kinamegei ak lembenateet; keesyoi koweekyigei let.’ Kagas anee komyee, ago momwaei ne iman. Mami chii ne weigei kong'etee yaityennyi, koleen, ‘Nee ne kayai?’ Kolabat chii tugul ooreennyi ineegei, ko uu paraisiit ne chutei lugeet. Agot kong'onyot ne mi kipsengwet nai kaosyekyik che ki king'at, ak cheptuget, ak taretyet, ak kong'oot oriibe saitap bwoonetennywa. Ago manai piikyuk ortinwegap imanda che po Kwandanywa. Omwae ano, ‘Ki echeek ng'omik, ak mi ng'atuutyetap Kwandanyo kobootech,’ ago eng' iman, kowal kalam ne lembech ne po siriik koek lembenateet? Kililan ng'omik; kitoptobenso ak kinam. Ogeer, kagipagaakta ng'olyoonnyu, kou nee anyun ng'omnateet ne ng'etu eng' icheek? Nooto si akoochi kwonyiikwak alak, ak mbareenikwak che leel laitorinik. Amu kobooch ne ming'in agoi ne oo, kasei chii tugul tuguugap asoya; kobooch maotyondet agoi tisiindet, yaei chii tugul lembenateet.’ Kiyaei kaguotenet ne po tiipkap piikyuk ko uu kiy ne tutigin, koleen, ‘Kalya, kalya,’ ago mami kalya. Tos kolilaan agobo tuguuk che yaacheen che ki yai? Acha, ma kolilaan agot kitigin; ma kinai agot koliliitu. Nooto si kobut icheek kwenutap che kagobut; ye ayaei icheek, kiterteer,” mwaei Kwandanyo kole. “Ayumjin icheek iman,” mwaei Kwandanyo kole. “Mami logoegap sabibuk eng' keetitap sabibuk, mami mogoonik eng' mogoywet, ak koresyo panyeek; tuguuk che ki agoochi icheek kobeeti eng' icheek.”

“Amu nee si kitebee yu? Oyumjigei! Kemwei nganasook che ririmotiin, kebek olooto, amu kagoitech Kwandanyo kebek, ak kagoochech peek che ng'woneen kee, amu kiyaun tengek eng' ineendet.”

Kimang'u kalya, ago mami ne myee ne kobwa; kimang'u saitap chametapkei, ago mi arageneet. Kigasei kutitap paraisisyegap puunik kobun Dan; eng' kutitap ng'ureetap paraisisyekwak che oen, kopotani emet komugul. Konyoonu ak koam emet ak tugul che mi ineendet, nganaseet ak tugul che menyei olooto.

“Amu ogeer, ayookyini erenook che ng'woneen kwenung'wong', erenook che maimuuch kecharunee, ak kosusok,” mwaei Kwandanyo kole.

Riirchin Jeremiah Piikyik

Kabet boiboiyennyu, kagonyoor ng'wanindo anee; komyan muguleldanyu eng' iinnyu. Kas, kutitap cheptap piikyuk kobun emet ne loo: “Tos ma mi Kwandanyo eng' Zion? Tos ma mi laitoryanyi eng' ineendet kogeny?” “Amu nee si katacho eng' angeet eng' itoonwekwak che ki kiwai, eng' kanamonikwak che po lembech che po emoten alak? Kagosiir kesisyet, kagobata kemeut, ago ma kisarwech.” Amu kaguotenet ne po cheptap piikyuk ko kang'emak anee; aaragen, ak kanam arageneet anee. Tos ma mi mwanik che kinyaise eng' Gilead? Tos ma mi chiito ne nyaei olooto? Amu nee anyun si ma konyo chametapkei ne po cheptap piikyuk?