Jeremiah 6

6 ¹"Kalāmashi khavai yāmlu, O Benjaminnaobing, Jerusalemwui eina shoklu! Tekoali talla̱ khonglu, kala Beth-haccheremli philān khāngkālu, kaja atungshongwui eina kalākashi, hakkhamahā sākashimān rāra. ²Leishi kala khamathava̱ Zionwui naongalava̱ chili ina sāshimānra. ³Yaokahomabing kala athumwui yao ngarā ali rāra; athumna ali kuimareida kachonshim sākāra, mi kachiva̱na khalattawui yar phāshaira."

⁴Ali rai sākālu! Rālu, ngashunung atamli ngararsa! Kha kakhanang ithumwui ngasāranu, kaja zimiksho vānhaowa kala ngazin khaya̱ longkatāhaira. ⁵Rālu, ngayā atamli ngararsa, kala awui raipanbing sāshimānra!

⁶Kaja saikorawui Avāna hānga: Awui thingrongbing shātkhuilu kala Jerusalemli kuimareida rampho sākālu. Keinung hi tandi mi khavaina; awui alungli rekakharek maningla khangatei maleimana. ⁷"Ra̱khong akhana atara̱ mathing sāchingkahai thāda, ana awui makaphā chi mathing sāchinga. Khangama̱ kala sākashimān awui alungli shāhaira; kazāt kala khamā atam kachida iwui mangāli lei. ⁸"Jerusalem, hāngmathin khuisanglu, maningakha ina nawui eina ningkachaida thuira, kala nali ramcho, mi khipākha mapampam ngalei akha sāmira."

⁹Saikorawui Avāna hānga: Drakhārong mātham phā thorlak eina, athumna Israelwui shākkahai chi mātham phaira. Drakhāthei phākakhui mi kathāda, napāng aphāngbingtungli latluida ngareirālu.

¹⁰"Athumna nganā khavai, ina khipāli hāngda hāngmathin mirakhala? Athumwui khanā shunghaira, chiwui vang eina athumna mashāmana. Ithumwui Avāwui tui chi athumli makaphā otna; athumna chili ningyāng maungmana.

¹¹Kha ina ithumwui Avāwui malungkhavāt eina pemda lei; chi horlungmi khavai ina ngachāng chatphalunghaira. Chānreili khalei naobingtungli kala ngarumda khalei yaronnaobingtungli chi shokhorlu; gahara eina preiva̱ khanini, kasarnaobing kala khararnaobing khuithuihaora." ¹²Athumwui shim, luibing kala preiva̱ ngarā zangda khangateibingli horsanghaora, kaja ngaleili kapambingtungli ina ipāng katingvāra, da ithumwui Avāna hānga. ¹³Kaja teokhamei eina hakkhamei eina tangda, saikora sāshāt eina katong samkaphangna; marān eina pāngmon eina tangda, saikorana mikhanam ot sai. ¹⁴Athumna marlak makhalei thāda iwui mibingwui khamā chi raimi. Chingri makhalei tharan, 'Chingrihailu, chingrihailu,' da hānga. ¹⁵Athumna ningkakachai acham sā tharan khayakla? Mha, athumna khikhala makhayakmana; mai hungra̱ khavaila matheimana. Chiwui vang eina konglui kahai mibingwui ngachaili athumla kongluira; ina athumli tandi khami tharan athum kongluihaora, da ithumwui Avāna hānga.

¹⁶Kaja ithumwui Avāna hānga: Shongpākli nganingda yanglu; khamathā apong kachili leikhala da shongfa kachamabing phālu, kala chili zatlu, kala nathumwui manglāli ngasāmkhui samphangra. Kha athumna hānga, 'Ithumna chili mazatmara.' ¹⁷Ina nathumtungli khamayonabing shinngasaklaga hānga, 'Talla̱khon nganālu!' Kha athumna hānga, 'Ithumna manganāmara.' ¹⁸Chiwui vang eina, O yurbing, nganālu; O shākhibing, athumli khi shoknikhala kaji ning ngasharlu. ¹⁹Nganālu, O okathui: Ina mi hiwuitungli kalākashi, athum khalattawui khangarānwui athei, shok ngasakra, kaja athumna iwui tui manganāmana kala iwui ain chi khalanhaira. ²⁰Shebawui eina rā nganamkaphā kala ram katāva̱wui eina rā kashima ja̱hei china ili khi darkar sākhala? Nathumwui rikkatā kachigatbing khamayā maleimana; nathumwui pha̱kaphayābing china ili ningyāng maung ngasakmana."

²¹Chiwui vang eina ithumwui Avāna hi kahāngna: Ina mi hi khalattawui mangāli sākakhayāng thāra. Ava̱ eina avā, naomayarabing ngarumda chiwuitungli kongluira; khongnaibing kala ngasotnaobing shimānra."

²²Ithumwui Avāna hi kahāngna: Yanglu, atungshong ram eina raimi akha kharāhaira; okathui aret eina miyur kahakva akha thuinganinga. ²³Athumna malā kala kazei singtita; athum sāshilaka kala lumashan khavai maleimana. O Zionwui naongalāva̱, athumna sigui tongda nawuitungli raisāri shaksākhuida rārā tharan, athumwui akhon tara̱ thāda khanganga.

²⁴Ithumna athumwui pao chi shāhaira, kala ithumwui pāng mathukthu. Sha̱nao akhana naokhara̱wui kachot thāda, kachotna ithumli yuihaira. ²⁵Luili mavālu kala shongfali mazatalu, kaja yangkashewui raighai lei, kala kuimareida khangachee lei. ²⁶Iwui mibingwui naongalāva̱, sifawui kachon sanglu kala hotlāli ngaleolu; naomayara mānga akhawui vang thāda malungringda chapngachālu, kaja kashuirak eina sākakathāna ithumwuitungli rāra.

²⁷"Ina nali iwui mibingwui ngachaili marisā tamyanga mi sākahaina, chieina nana athumwui apong chi yangkhuida chāng tamyangra. ²⁸Athum saikora wuklung marara khalāng ot kasābing, kuiung-kuivāda kaphor tui matuiya. Athum pithrai kala marina; athum saikorana khamakhao otsak sai. ²⁹Mei eina marisā makaphā chi chuikhavai, mei phukhong panglāk eina phua, kha khalanga chi aremana; makaphā-makhayābing chi mahorhaimana. ³⁰Athumli khalan kahai lupāsā da hora, kaja ithumwui Avāna athumli khalanhaira."