Irmiya 6 FHB Father's Heart Bible™

6 ¹“Ku gudu don ceton rai, ku 'ya'yan Benyamin, ku fita daga Urushalima! Ku busa ƙaho a Tekowa, ku kuma ɗaga tuta a bisa Bet-hakkerem, gama masifa tana gabatowa daga arewa, babbar hallaka. ²Diyar Sihiyona mai kyau da laushi—zan hallaka ta. ³Makiyaya da garkunansu za su zo su yaƙe ta; za su kafa tentunansu kewaye da ita, kowa yana kiwo a rabonsa.”

⁴Ku shirya yaƙi da ita! Ku zo, mu kai hari da tsakar rana! Amma kaitonmu, gama rana tana faɗuwa inuwowin yamma kuma suna ƙaruwa da tsawo. ⁵Ku zo, mu kai hari da dare mu rushe kagarorinta!

⁶Gama Uban rundunonin Sama ya ce, Ku sare itatuwanta ku kuma gina tudu don ƙawanyar Urushalima. Dole a hukunta birnin nan; babu kome a cikinta sai danniya. ⁷“Kamar yadda rijiya take kiyaye ruwanta sabo, haka take kiyaye muguntarta sabuwa. Ana jin ƙarar rikici da hallaka a cikinta; cuta da raunuka kullum suna a gabana. ⁸Ki yi gargaɗi, ya Urushalima, in ba haka ba zan juya baya gare ki da ƙyama in mai da ke kango, ƙasar da ba mai zama a cikinta.”

⁹Uban rundunonin Sama ya ce, Za su kala raguwar Isra'ila sarai kamar kurangar inabi wadda ake kala. Ka sāke zura hannunka a kan rassan, kamar mai tattara 'ya'yan inabi.

¹⁰“Wa zan yi masa magana in gargaɗe shi, da zai saurara? Kunnuwansu a rufe suke, saboda haka ba sa iya ji. Maganar Ubanmu abar ƙyama ce a gare su; ba su jin daɗinta.

¹¹Amma na cika da fushin Ubanmu; na gaji da riƙe shi a ciki. A zuba shi a kan yara a kan tituna, da a kan samari da suka taru; za a kama mai gida da matarsa duka, da tsoho da wanda ya tsufa ƙwarai.” ¹²Za a mai da gidajensu ga waɗansu, gonakinsu da matansu tare, gama zan miƙa hannuna gāba da mazaunan ƙasar, in ji Ubanmu. ¹³Gama daga mafi ƙanƙanta har zuwa mafi girma, duk suna kwaɗayin ribar zalunci; daga annabi har zuwa firist, duk suna aikata ha'inci. ¹⁴Suna yi wa raunin mutanena magani kamar ba shi da tsanani. Suna cewa, ‘Salama, salama,’ alhali kuwa babu salama. ¹⁵Suka ji kunyar aikinsu na banƙyama? A'a, ba su ji kunya ko kaɗan ba; ba su ma san yadda za su ji kunya ba. Saboda haka za su fāɗi tare da waɗanda suka fāɗi; za a kakkaɓe su sa'ad da na hukunta su, in ji Ubanmu.

¹⁶Ga abin da Ubanmu ya ce, Ku tsaya a mararraba ku duba; ku nemi hanyoyin dā, inda hanya mai kyau take, ku bi ta, za ku kuwa sami hutawa ga rayukanku. Amma suka ce, ‘Ba za mu bi ta ba.’ ¹⁷Na naɗa muku masu gadi na ce, ‘Ku saurari ƙarar ƙaho!’ Amma suka ce, ‘Ba za mu saurara ba.’ ¹⁸“Saboda haka ku ji, ya ku al'ummai; ku lura, ya ku shaidu, da abin da zai same su. ¹⁹Ki saurara, ya ke duniya: ina kawo masifa a kan mutanen nan, 'ya'yan dabarunsu, domin ba su saurari maganata ba kuma sun ƙi koyarwata. ²⁰Ina ruwana da turaren Sheba ko kayan ƙanshi mai zaƙi daga ƙasa mai nisa? Hadayunku na ƙonawa ba abin karɓa ba ne; hadayunku ba sa faranta mini rai.”

²¹Saboda haka ga abin da Ubanmu ya ce, Zan sa abubuwan tuntuɓe a gaban mutanen nan. Iyaye da 'ya'ya duka za su yi tuntuɓe a kansu; maƙwabta da abokai za su hallaka.

²²Ga abin da Ubanmu ya ce, Duba, ga rundunar soja tana zuwa daga ƙasar arewa; babbar al'umma tana tashi daga iyakar duniya. ²³Sun riƙe baka da māshi; su mugaye ne ba sa nuna jinƙai. Ƙararsu tana ruri kamar teku yayinda suke hawan dawakai, a shirye cikin tsarin yaƙi gāba da ke, ya Diyar Sihiyona.

²⁴Mun ji labari a kansu, hannuwanmu kuwa suka yi laushi. Baƙin ciki ya kama mu, zafi kamar na mace mai naƙuda. ²⁵Kada ku fita zuwa gonaki ko ku yi tafiya a kan hanyoyi, gama abokin gāba yana da takobi, razana kuma tana ko'ina. ²⁶Ya Diyar mutanena, ki sa tufafin makoki ki birkiɗa a cikin toka; ki yi makoki da kuka mai zafi kamar don makaɗaicin ɗa, gama farat ɗaya mai hallakarwa zai auko mana.

²⁷“Na mai da kai mai gwajin ƙarafa a cikin mutanena, domin ka lura ka kuma gwada hanyoyinsu. ²⁸Dukansu 'yan tawaye ne masu taurin kai, suna yawo suna baza ƙarairayi. Tagulla ne da baƙin ƙarfe; dukansu suna aikata ɓarna. ²⁹Zugazugi suna hura wuta da ƙarfi don su ƙone darma da wuta, amma tacewar banza ce; ba a cire mugaye ba. ³⁰Ana ce da su azurfa wadda aka ƙi, domin Ubanmu ya ƙi su.”