Jeremiah 6

6 ¹“Ẹ sá sálọ sí ibi ààbò, ẹ̀yin ọmọ Benjamini, kúrò ní Jerusalemu! Ẹ fọn ìpè ní Tekoa, kí ẹ sì gbé àmì ìkìlọ̀ sókè lórí Beti-Hakeremu, nítorí àjálù ń yọjú láti àríwá wá, ìparun ńlá. ²Arẹwà àti ẹlẹgẹ́ ni ọmọbìnrin Sioni—èmi yóò pa á run. ³Àwọn olùṣọ́ àgùntàn àti agbo wọn yóò wá dojú ìjà kọ ọ; wọn yóò pa àgọ́ wọn yí i ká, olúkúlùkù yóò máa jẹ́ oko tirẹ̀.”

⁴Ẹ múra ogun sí i! Ẹ wá, ẹ jẹ́ kí a kọlù ú ní ọ̀sán gangan! Ṣùgbọ́n ègbé ni fún wa, nítorí ọjọ́ ti ń rọlẹ̀, àwọn òjìji alẹ́ sì ń gùn sí i. ⁵Ẹ wá, ẹ jẹ́ kí a kọlù ú ní òru, kí a sì pa àwọn ilé olódi rẹ̀ run!

⁶Nítorí Baba àwọn ọmọ ogun ọ̀run wí pé: Ẹ gé àwọn igi rẹ̀ lulẹ̀, kí ẹ sì mọ ebè ìsàgatì sí Jerusalemu. A gbọdọ̀ fìyà jẹ ìlú yìí; kò sí ohun kankan bí kò ṣe ìnilára nínú rẹ̀. ⁷“Bí kànga ti ń mú omi rẹ̀ ṣàn tuntun, bẹ́ẹ̀ ni ó ń mú ìwà ìkà rẹ̀ ṣàn tuntun. Ìwà ipá àti ìparun ń dún jáde nínú rẹ̀; àìsàn àti ọgbẹ́ wà níwájú mi nígbà gbogbo. ⁸Gba ìkìlọ̀, ìwọ Jerusalemu, àìbẹ́ẹ̀ èmi yóò fi ìríra yípadà kúrò lọ́dọ̀ rẹ, kí n sì sọ ọ di ahoro, ilẹ̀ tí kò sí ẹni tí ń gbé inú rẹ̀.”

⁹Baba àwọn ọmọ ogun ọ̀run wí pé: Wọn yóò pèṣẹ́ àwọn ìyókù Israẹli pátápátá bí a ti ń pèṣẹ́ àjàrà. Tún ọwọ́ rẹ nà sórí àwọn ẹ̀ka náà lẹ́ẹ̀kan sí i, bí ẹni tí ń kó àjàrà jọ.

¹⁰“Àwọn wo ni èmi lè bá sọ̀rọ̀ tí n ó sì kìlọ̀ fún, tí wọn yóò sì fetísílẹ̀? Etí wọn ti dí, wọn kò sì lè gbọ́. Ọ̀rọ̀ Baba wa jẹ́ ohun ìkórìíra sí wọn; wọn kò ní inú dídùn sí i.

¹¹Ṣùgbọ́n èmi kún fún ìbínú Baba wa; ó sì ti rẹ̀ mí láti kó o mọ́ra. Tú u jáde sórí àwọn ọmọdé tí ń bẹ ní ìgboro, sórí àwọn ọ̀dọ́kùnrin tí wọ́n péjọ pọ̀; a ó kó ọkọ àti aya lọ, àti àgbà àti arúgbó gbá-ngba.” ¹²A ó fi ilé wọn lé àwọn ẹlòmíràn lọ́wọ́, àti oko wọn àti aya wọn pẹ̀lú, nítorí èmi yóò na ọwọ́ mi sí àwọn tí ń gbé ní ilẹ̀ náà, ni Baba wa wí. ¹³Nítorí láti ẹni kékeré títí dé ẹni ńlá, gbogbo wọn ni ó ṣe ojúkòkòrò fún èrè àìtọ́; láti ọ̀dọ̀ wòlíì títí dé àlùfáà, gbogbo wọn ni ó ń hùwà ẹ̀tàn. ¹⁴Wọ́n ń wo ọgbẹ́ àwọn ènìyàn mi bí ẹni pé kò ṣe pàtàkì. ‘Àlàáfíà, àlàáfíà,’ ni wọ́n wí, nígbà tí kò sí àlàáfíà. ¹⁵Ojú ti wọ́n nítorí ìwà ìríra wọn bí? Rárá, ojú kò ti wọ́n rárá; wọn kò tilẹ̀ mọ bí a ti ń tijú. Nítorí náà wọn yóò ṣubú pẹ̀lú àwọn tí ó ṣubú; a ó rẹ̀ wọ́n sílẹ̀ nígbà tí mo bá fìyà jẹ wọ́n, ni Baba wa wí.

¹⁶Báyìí ni Baba wa wí: Ẹ dúró ní ìkóríta, kí ẹ sì wò; ẹ béèrè fún àwọn ipa ọ̀nà ìgbàanì, ibi tí ọ̀nà rere wà, kí ẹ sì rìn nínú rẹ̀, ẹ ó sì rí ìsinmi fún ọkàn yín. Ṣùgbọ́n wọ́n wí pé, ‘Àwa kì yóò rìn nínú rẹ̀.’ ¹⁷Mo yan àwọn olùṣọ́ sórí yín, mo sì wí pé, ‘Ẹ fetí sí ìró ìpè!’ Ṣùgbọ́n wọ́n wí pé, ‘Àwa kì yóò fetísílẹ̀.’ ¹⁸“Nítorí náà ẹ gbọ́, ẹ̀yin orílẹ̀-èdè; ẹ kíyè sí, ẹ̀yin ẹlẹ́rìí, ohun tí yóò ṣẹlẹ̀ sí wọn. ¹⁹Gbọ́, ìwọ ayé: Èmi ń mú àjálù wá sórí àwọn ènìyàn yìí, èso ìmọ̀ràn ara wọn, nítorí wọn kò fetí sí ọ̀rọ̀ mi, wọ́n sì ti kọ ẹ̀kọ́ mi sílẹ̀. ²⁰Kí ni èmi bìkítà nípa tùràrí láti Ṣẹba tàbí ọ̀pá dídùn láti ilẹ̀ jíjìn? Àwọn ẹbọ sísun yín kò ṣe ìtẹ́wọ́gbà; àwọn ìrúbọ yín kò sì wù mí.”

²¹Nítorí náà báyìí ni Baba wa wí: Èmi yóò fi ohun ìkọ̀sẹ̀ sí iwájú àwọn ènìyàn yìí. Àwọn òbí àti ọmọ pẹ̀lú yóò kọsẹ̀ lórí wọn; aládùúgbò àti ọ̀rẹ́ yóò ṣègbé.

²²Báyìí ni Baba wa wí: Wò ó, ọ̀wọ́ ogun kan ń bọ̀ láti ilẹ̀ àríwá; orílẹ̀-èdè ńlá kan ń ru sókè láti òpin ayé. ²³Wọ́n di ọrun àti ọ̀kọ̀ mú; wọ́n jẹ́ ìkà, wọn kò sì ṣàánú. Ìró wọn ń hó bí Òkun bí wọ́n ti ń gun ẹṣin, tí wọ́n tò ní ìlà ogun sí ọ, ìwọ ọmọbìnrin Sioni.

²⁴Àwa ti gbọ́ ìròyìn nípa wọn, ọwọ́ wa sì ti rọ. Ìrora ti dì wá mú, ìrora bí i ti obìnrin tí ń rọbí. ²⁵Má ṣe jáde lọ sí oko tàbí rìn ní ojú ọ̀nà, nítorí idà wà lọ́wọ́ ọ̀tá, ẹ̀rù sì wà ní gbogbo ìhà. ²⁶Ọmọbìnrin àwọn ènìyàn mi, wọ aṣọ ọ̀fọ̀, kí o sì yí nínú eérú; ṣọ̀fọ̀ pẹ̀lú ẹkún kíkorò bí ẹni pé fún ọmọkùnrin kan ṣoṣo, nítorí lójijì ni apanirun yóò dé bá wa.

²⁷“Mo ti fi ọ́ ṣe olùdánwò irin láàrin àwọn ènìyàn mi, kí ìwọ lè kíyè sí, kí o sì dán ọ̀nà wọn wò. ²⁸Gbogbo wọn ni ọ̀tẹ̀ olórí kunkun, tí ń rìn kiri láti tan ọ̀rọ̀ ẹ̀gàn ká. Wọ́n jẹ́ idẹ àti irin; gbogbo wọn ni ó ń hùwà ìbàjẹ́. ²⁹Ẹ̀rọ afẹ́fẹ́ ń fẹ́ gidigidi láti fi iná jó òjé run, ṣùgbọ́n ìwẹ̀nùmọ́ náà jẹ́ asán; a kò yọ àwọn ìkà kúrò. ³⁰A ń pè wọ́n ní fàdákà tí a kọ̀sílẹ̀, nítorí Baba wa ti kọ̀ wọ́n sílẹ̀.”