Ithumwui Avāna Ngasankhui Khavai Mamayāhaira
Israelwui khararnaobingna ngahān khavai rāpama, kha ithumwui Avāna athumli mangahānpai ngasakmana; chiwui mayāngli athumwui khararwui ot ngahānmi: Egyptli, ramkazatali kala ngaleili athumna ali mangānami. Akha akha tharan ana awui mingwui vang khikha makathāna. Ana athumli ngasunkhuilaga mangā eina mangā bichar sāra.
20 1Kashine kum, kachang kaphangāwui katharāthang, Israelwui khararnao kaikha ithumwui Avāli ngasan khavai rai, kala iwui ngalemli rāpama.
2Chiwui thili ithumwui Avāwui tui china ili rāhānga:
3Miwui naomayara, Israelwui khararnaobingli hānglu: Proho Avāna hithāda hānga: Nathum ili ngahānkhui khavai rahairala? Kachangkhat eina ina kahāngna, ina nathumli ili ngahānkhui ngasakmara, da Proho Avāna hānga.
4Nana athumli bichar sārakhala? Miwui naomayara, nana athumli bichar sārakhala? Chithākha athumwui avā ngarāna sākahai ningkakachai ot chi phongmiserlu, 5kala athumli hānglu: Proho Avāna hithāda hānga: Ina Israelli kapangkhuithang, Jacobwui shimkhurwui ara̱-azāli pāng khāngkāda ngashit sai, Egyptli athumli ina khalatta chitheimida. Pāng khāngkāda ina athumli hānga, 'I nathumwui Avāna.' 6Chithang ina athumli Egyptwui eina, athumwui vang ina akhayangkahai, seina̱ eina khuira̱ khalonga, ngalei saikorawui mathāmeikap kaji ngalei chili thānshok khavai ngashit sai.
7Ina athumli hānga, 'Nathum mi kachiva̱, nathumwui mikna yangkhavai mayangkhangai meoma̱ chi horshoklu; Egyptwui meoma̱bing eina nathum khalatta masākhamāng malu. I nathumwui Avāna.'
8Kha athumna ili thuingarara, kala manganāsangmana; khipānakha athumwui mikna yangkhavai ningkakachai ot chi mahorshokmana, kala Egyptwui meoma̱bing akhala mahaimana. Chiwui vang eina, ina Egyptli athumwuitungli iwui malungkhavāt tāda iwui malung kasā chi kuphaora da hānga. 9Kha iwui mingwui vang eina ina arui sai, athumna leikahai miyurbingwui, athumli Egyptwui eina thānshoklaga ina khalatta chitheimikahai miyurbing chiwui miktāli iwui ming makhao khangasak khavai maleimara.
10Chithāda ina athumli Egyptwui eina thānshoklaga lamhāngli khuirai. 11Ina athumli iwui shiyan mi, kala athumli iwui ain theingasak; khipānakha chi mayona a china chieina ringra. 12Chihoda ina athumli iwui sabbathbing mi, ini angachaili machut akha sāda, chi eina athumna I athumwui Avā, athumli kathar sākahaina da theira.
13Kha Israelwui shimkhurna lamhāngli ili thuingarara. Athumna iwui shiyan athishurda zat khavai mamayāmana, kala iwui ain khalanhaira, chi mayona a china chieina ringlala, kala iwui sabbathbing thora makhao ngasakhaira. Chiwui vang eina lamhāngli, ina athumli sākazam khavai iwui malungkhavāt athumwuitungli tāra da hānga. 14Kha iwui mingwui vang eina ina arui sai, athumli ina thānshok theikahai miyurbingwui miktāli iwui ming makhao khangasak khavai maleimara. 15Chihoda lamhāngli ina pāng khāngkai, seina̱ eina khuira̱ khalonga, ngalei saikorawui sophayolak kaji, athumli mikahai ngalei chili mathānrā khavai ngashit sai, 16kaja athumna iwui ain khalanhaira, iwui shiyan matheimithuwa, kala iwui sabbathbing makhao ngasakhaira, athumwui ning athumwui meoma̱li phaninga. 17Chithālala ina athumli lumashanmi, kala lamhāngli athumli mashimānchao ngasakmana. 18Lamhāngli ina athumwui naongarāli hānga: Nathumwui avāva̱ ngarāwui shiyan-chikanli mashuralu, athumwui ainbing mamayonalu, lah athumwui meoma̱bing eina nakhalatta makathara masaalu. 19"I nathumwui Avāna; iwui shiyan-chikanli shurlu kala iwui ain mayon khavai ningngasharlu. 20Iwui sabbathbing tharda mayonlu; chi iya kala nathumwui ngachaili machut akha ngasāra, chieina nathumna I nathumwui Avāna da theira."
21Kha naongarābingna ili thuingarara. Athumna iwui shiyan-chikanli mashurmana lah iwui ain mamayonmana, mi akhana chi mayonda ringra, kala iwui sabbathbing makhao ngasaka. Chiwui vang, lamhāngli ina athumwuitungli iwui malungkhavāt heirorda iwui sāshāt kuphaora da hānga. 22Kha ina ipāng khuithui imingwui vang eina ot sai, chieina ina athumli thānshok kahai chi theikahai yurbingwui mangāli chi makhao mangasakmara khavaina. 23Ipāng panglaka lamhāngli ina athumli, yurbingwui ngachaili kashamvāser kala ngalei apam kachiva̱li chaivāhaora da khangashit sai, 24khikhalajila athumna iwui ain mamayonmana, iwui shiyan-chikanli khalanhaira, iwui sabbathbing makhao ngasaka, kala athumwui mikna athumwui avāva̱ ngarāwui meoma̱bingli ngahānngailaka. 25Chiwui vang ina athumli kaphā maningla shiyan-chikan, kala chi eina athum kharing masamphangmara ain mi; a a v25 Hi ithumwui Avāna makaphā ningkhami mi da kahāng maningmana. Awui kaphā ain khalanlaga, mibing china athum khalattana kateo kahai sākazamwui otsak chili horsangmi—athumwui meoma̱ sheba chi kathiwui shongfali zatnāranu da sāngasak kahaina. 26Ina athumli athumwui lemmet eina makathara sāngasak, naochizai kachiva̱li pha̱phayāda, athumli horra eina pemngasaka khavai, chieina athumna I athumwui Avāna da theikhuira.
27Chiwui vang, O miwui naomayara, Israelnaobingli hānglu: Proho Avāna hithāda hānga: Hilila navā ngarāna, ili malaikhangai malaida, ili chipata: 28Ipāng panglaka athumli mira da khangashit sākahai ngaleili ina athumli thānzangki kahaiwui thili, athumna khamateka kaphung katung kala thing khaya̱na kachiva̱ theida, apam chili athumwui kachigat pha̱phayai, ili malung thuingasakwui lemmet chigata, athumwui ningyāng ungngasak nganamkaphā riktai, kala athumwui phazā kachigat heirormi. 29Chieina ina athumli ngahāna: Nathumna vāchingki kajujuipam hi khina? (Aja eina tangda Bamah da hokahaina.). b b v29 Bamah ming hi mikumowui "kajujuipam" da kakhalatna. Ngahān chi awui akhonli samngasoda—"nathumna vāchingki kajujuipam hi khina?"—kala aming chi pamsanghaowa.
30Chiwui vang Israelnaobingli hānglu: Proho Avāna hithāda hānga: Nathumna navā ngarā thāda nakhalatta makathara sāda athumwui ningkakachai meoma̱bingli ngahānngailaka? 31Nathumna kachigat chigatta nathumwui naongarāli mei ngachaili akāngasak tharan, ara eina tangda nathumwui meoma̱ saikora eina nakhalatta makathara sāchinga. O Israel shimkhur, nathumna ili ngasanphalungrala? I ringdalei, da Proho Avāna hānga, nathumna ili mangasanmara.
32Nathumna hānga, 'Ithum yurbing thāda, ngalei akhapāwui mibing thāda, thing kala lunggui sheba sāsa.' Kha nathumwui ningli chungkasang kahai chi katang makhavai mashokmara.
33I ringda lei kaji khamashung thāda, da Proho Avāna hānga, kapanga pāng eina, pāngthei katingda, kala heirormi kahai malungkhavāt eina ina nathumwuitungli mungra. 34"Kapanga pāng eina, pāngthei katingda, kala heirormi kahai malungkhavāt eina, ina nathumli yurbingwui eina thānshokra, kala nathum chaiyāngvā kahai ngalei kachiva̱wui eina nathumli kazipkhuira. 35Ina nathumli miyurbingwui lamhāngli khuivāra, kala chili nathumli mashā eina mashā bichar sāra." 36Egyptwui lamhāngli nathumwui avāva̱ ngarāli ina bichar sai thāda, chithāda ina nathumli bichar sāra, da Proho Avāna hānga. 37"Ina nathumli iwui lijei azingli ngaruivā ngasoda shānkhuira, kala tuingashitwui leichingli nathumli khuivāra. c c v37 Yaokahomabingna yao chi akha-akha lijei kalangva̱ azingli ngaruivā ngasakda, athumwui yaobingli shānda yanga. Ithumwui Avāna ana khalattali awui yaobing shānkhame yaokahoma thāda chitheiya. 38Ili ngakaikashi kala khalāng ot kasā ngarā chi ina nathumwui ngachaili tharngasakra. Athum kapama ngaleiwui eina ina athumli thānshokra, kha athum Israelwui ngaleili mazangpaimara. Chieina nathumna I nathumwui Avāna da theira."
39Kala nathum, O Israelnaobing, Proho Avāna hithāda hānga: Thuiulu, nathum kachiva̱na, nathumwui meoma̱li khorumlu! Kha naoda nathumna reikhamatai ili nganāra, kala nathumwui lemmet kala meoma̱ eina iwui kathara ming chi masākhamāngluimara. 40Kaja iwui kathara kaphungli, Israelwui kajuiya kaphungli, da Proho Avāna hānga, chili ngaleili Israelnaobing saikorana ili otram ngatha̱ra, kala chili ina athumli khuisangra. Chili ina nathumwui kachigat, nathumwui mathāmeikap kaji lemmet, kala nathumwui kathara pha̱kaphayā saikora ningchāngra. 41"Ina nathumli yurbingwui eina thānshok tharan, kala nathumli chaiyāngvā kahai ngaleibingwui eina kazipkhui tharan, nganamkaphā thao thāda khuisangra; kala nathumwui vang eina yurbingwui mikyanli iwui tharkhamatheng chi khuisangra. 42Ina nathumli Israelwui ngaleili, ipāng langsoi nathumwui avāva̱ ngarāli mira da ngashit kahai ngalei chili, khuivā tharan, nathumna I nathumwui Avāna da theira. 43Chili nathumna nathumwui acham-aram, kala nathum khalatta sākhamāng kahai otsak saikora phaningungra, kala nathumna sākahai makaphā saikorawui vang nathum khalatta ningkachaira. 44Ina iwui mingwui vang eina nathumli sāpapama tharan, nathumwui makaphā shongfa kala khangama̱ otsakwui athishurda maningla, nathumna I nathumwui Avāna da theira, O Israelnaobing, da Proho Avāna hānga."
Azingshongli Makhamayā Mei
45Ithumwui Avāwui tui china ili rāhānga:
46Miwui naomayara, azingshong ngareivāda chili makhamayā pao hāshoklu, kala azingshongwui ngahongli makhamayā tui marānlu. 47Azingshong ngahongli hānglu: Ithumwui Avāwui tui nganālu. Proho Avāna hithāda hānga: Yanglu, ina nawui alungli mei sa̱tāra, china thingrong saikora, khamatek kala thengkahai ngarumda, shaira. Chiwui kachuia mei chi khipānakha masāshimitrarmara; azingshongwui eina atungshong peida khalei mashā saikora chuingasaka. 48Mi saikorana I, nathumwui Avāna, chi sa̱tāra da theira; chi masāshimitrarmara.
49Chieina ina hānga, "Ah, Proho Avā! Athumna iwui pongli hānga, 'Ana chānjam eina tang matuira maningmala?'"
