ሉቃስ 5

5 ¹አንድ ጊዜ ሕዝቡ የአባታችንን ቃል ለመስማት እየተጋፉ ሲከቡት፣ ኢየሱስ በጌንሳሬጥ ሐይቅ ዳር ቆሞ ነበር። ^a a v1 የጌንሳሬጥ ሐይቅ የገሊላ ባሕር ሌላ ስም ነው። ²ሁለት ጀልባዎች በሐይቁ ዳር ቆመው አየ፤ ዓሣ አጥማጆቹ ትተዋቸው መረባቸውን ያጥቡ ነበር። ³ከጀልባዎቹ ወደ አንዱ፣ ወደ ስምዖን ጀልባ ገብቶ፣ ከዳር ጥቂት ራቅ እንዲያደርግለት ለመነው፤ ከዚያም ተቀምጦ ሕዝቡን ከጀልባው ላይ አስተማረ።

⁴መናገር ባቆመ ጊዜ ስምዖንን፣ “ወደ ጥልቁ ውሃ ግፋ፤ ለማጥመድም መረባችሁን ጣሉ” አለው።

⁵ስምዖንም መልሶ፣ “ጌታ ሆይ፣ ሌሊቱን ሙሉ ስንደክም አድረን ምንም አላጠመድንም፤ ነገር ግን በቃልህ መረቡን እጥላለሁ” አለ። ⁶ይህን ባደረጉ ጊዜ፣ መረባቸው መቀደድ እስኪጀምር ድረስ እጅግ ብዙ ዓሣ ያዙ። ⁷በሌላው ጀልባ ያሉትን ጓደኞቻቸውን መጥተው እንዲረዷቸው በምልክት ጠሩ፤ እነርሱም መጥተው ሁለቱን ጀልባዎች እስኪሰጥሙ ድረስ ሞሉአቸው። ⁸ስምዖን ጴጥሮስ ይህን ባየ ጊዜ፣ በኢየሱስ ጕልበት ላይ ተደፍቶ፣ “ጌታ ሆይ፣ እኔ ኀጢአተኛ ሰው ነኝና ከእኔ ራቅ!” አለ። ⁹ባጠመዱት የዓሣ ብዛት እርሱንና ከእርሱ ጋር የነበሩትን ሁሉ መደነቅ ይዟቸው ነበርና፤

¹⁰እንዲሁም የዘብዴዎስ ልጆችና የስምዖን ጓደኞች የነበሩት ያዕቆብና ዮሐንስ ተደነቁ። ኢየሱስም ስምዖንን፣ “አትፍራ፤ ከእንግዲህ ሰዎችን ታጠምዳለህ” አለው።

¹¹እነርሱም ጀልባዎቻቸውን ወደ ዳር አውጥተው፣ ሁሉን ትተው ተከተሉት።

ነጻ የወጣ ሰው

¹²ኢየሱስ በአንዱ ከተማ ሳለ፣ ሰውነቱ ሁሉ በከባድ የቆዳ በሽታ የተሞላ አንድ ሰው ተገኘ። ኢየሱስን ባየ ጊዜ በግንባሩ ተደፍቶ፣ “ጌታ ሆይ፣ ብትፈቅድ ልታነጻኝ ትችላለህ” ብሎ ለመነው።

¹³ኢየሱስም እጁን ዘርግቶ ዳሰሰውና፣ “እፈቅዳለሁ፤ ንጻ” አለው። ወዲያውም የቆዳ በሽታው ለቀቀው።

¹⁴ኢየሱስም ለማንም እንዳይናገር አዘዘው፤ “ነገር ግን ሂድና ራስህን ለካህኑ አሳይ፤ ለሰዎችም ምስክር እንዲሆን ስለ መንጻትህ ሙሴ ያዘዘውን አቅርብ” አለው።

¹⁵ነገር ግን ስለ እርሱ የሚወራው ወሬ ይበልጥ ተስፋፋ፤ ብዙ ሕዝብም ሊሰሙትና ከበሽታቸው ሊፈወሱ ይሰበሰቡ ነበር። ¹⁶ኢየሱስ ግን ብዙ ጊዜ ወደ ምድረ በዳ ፈቀቅ ብሎ ይጸልይ ነበር።

የአብ ይቅር የማለት ኀይል

¹⁷አንድ ቀን ሲያስተምር፣ ከገሊላ መንደሮች ሁሉ፣ ከይሁዳና ከኢየሩሳሌም የመጡ ፈሪሳውያንና የሕግ መምህራን ተቀምጠው ነበር። የአባታችንም ኀይል በሽተኞችን ለመፈወስ በእርሱ ዘንድ ነበር። ¹⁸በዚያን ጊዜ አንዳንድ ሰዎች ሽባ የሆነውን ሰው በአልጋ ተሸክመው መጡ፤ አስገብተውም በኢየሱስ ፊት ሊያኖሩት ሞከሩ። ¹⁹ከሕዝቡ ብዛት የተነሣ የሚያስገቡበትን መንገድ ባጡ ጊዜ፣ ወደ ጣሪያው ወጥተው በጡብ መካከል ከአልጋው ጋር ዝቅ አድርገው ልክ በኢየሱስ ፊት በመካከሉ አወረዱት።

²⁰ኢየሱስም እምነታቸውን ባየ ጊዜ፣ “ወዳጄ ሆይ፣ ኀጢአትህ ተሰርዮልሃል” አለ።

²¹ጻፎችና ፈሪሳውያንም፣ “እግዚአብሔርን የሚሳደብ ይህ ሰው ማን ነው? ከእግዚአብሔር ብቻ በቀር ኀጢአትን ይቅር ሊል የሚችል ማን ነው?” እያሉ መከራከር ጀመሩ።

²²ኢየሱስም ሐሳባቸውን ዐውቆ መልሶ፣ “ለምን በልባችሁ ታስባላችሁ? ²³‘ኀጢአትህ ተሰርዮልሃል’ ማለት ወይስ ‘ተነሥተህ ሂድ’ ማለት፣ ከሁለቱ የትኛው ይቀላል? ²⁴ነገር ግን የሰው ልጅ በምድር ላይ ኀጢአትን ይቅር ለማለት ሥልጣን እንዳለው እንድታውቁ”—ሽባውን ሰው እንዲህ አለው—“እልሃለሁ፣ ተነሥተህ አልጋህን ተሸክመህ ወደ ቤትህ ሂድ።”

²⁵ወዲያውም በፊታቸው ተነሥቶ፣ የተኛበትን አልጋ ተሸክሞ፣ አባታችንን እያከበረ ወደ ቤቱ ሄደ። ²⁶ሁሉንም መደነቅ ያዛቸው፤ በፍርሃትም ተሞልተው አባታችንን አከበሩ፤ “ዛሬ ድንቅ ነገር አየን” አሉ።

ኢየሱስ ሌዊን ጠራ

²⁷ከዚህ በኋላ ኢየሱስ ወጥቶ፣ ሌዊ የተባለ አንድ ቀራጭ በቀረጥ መሰብሰቢያ ተቀምጦ አየና፣ “ተከተለኝ” አለው።

²⁸ሌዊም ተነሥቶ ሁሉን ትቶ ተከተለው። ²⁹ከዚያም ሌዊ በቤቱ ለኢየሱስ ታላቅ ግብዣ አደረገ፤ ብዙ ቀራጮችና ሌሎች ሰዎችም ከእነርሱ ጋር በማዕድ ተቀመጡ። ³⁰ፈሪሳውያንና ጻፎቻቸው ግን ደቀ መዛሙርቱን፣ “ከቀራጮችና ከኀጢአተኞች ጋር ለምን ትበላላችሁ ትጠጣላችሁ?” እያሉ አጕረመረሙ።

³¹ኢየሱስም መልሶ፣ “ሐኪም የሚያስፈልጋቸው በሽተኞች እንጂ ጤነኞች አይደሉም። ³²ጻድቃንን ሳይሆን ኀጢአተኞችን ወደ ንስሓ ልጠራ መጣሁ” አለ።

ስለ ጾም የቀረበ ጥያቄ

³³እነርሱም፣ “የዮሐንስ ደቀ መዛሙርት ብዙ ጊዜ ይጾማሉ፣ ይጸልያሉም፤ እንዲሁም የፈሪሳውያን ደቀ መዛሙርት፤ ያንተ ግን ይበላሉ ይጠጣሉ” አሉት።

³⁴ኢየሱስም፣ “ሙሽራው ከእነርሱ ጋር ሳለ የሙሽራውን ሚዜዎች ልታስጾሟቸው ትችላላችሁን? ³⁵ነገር ግን ሙሽራው ከእነርሱ የሚወሰድበት ቀን ይመጣል፤ በዚያን ጊዜ፣ በዚያ ወራት ይጾማሉ” አለ።

³⁶ደግሞም ምሳሌ ነገራቸው፤ “ማንም ከአዲስ ልብስ እራፊ ቀዶ በአሮጌ ልብስ ላይ አይሰፋም። ያለዚያ አዲሱን ይቀደዋል፤ ከአዲሱም የተቀደደው እራፊ ከአሮጌው ጋር አይስማማም። ³⁷አዲስ የወይን ጠጅ ማንም በአሮጌ አቁማዳ አያስገባም፤ ያለዚያ አዲሱ የወይን ጠጅ አቁማዳውን ያፈነዳል፤ ይፈሳል፤ አቁማዳውም ይበላሻል። ³⁸ነገር ግን አዲስ የወይን ጠጅ በአዲስ አቁማዳ ሊፈስ ይገባል። ³⁹አሮጌ የወይን ጠጅ የጠጣም ማንም ‘አሮጌው ይሻላል’ ስለሚል አዲሱን አይፈልግም” አለ።