Luka 5 FHB Father's Heart Bible™

5 ¹N'dzidzi unango, mwinji wa anthu mukhantsamira Iye toera kubva fala ya Baba wathu, Yezu akhalimira m'phepete mwa Nyandza ya Genesarete. ^a a v1 Nyandza ya Genesarete ndi dzina inango ya Bara ya Galileya. ²Iye aona mabote mawiri akhadaimira m'phepete mwa nyandza; anyakuphata ntsomba akhadabuluka, mbakacapa makoka awo. ³Yezu apita m'bote ibodzi, ikhali ya Simau, ampemba toera akwewe pang'ono kutali na kunthethe, buluka penepo akhala pantsi mbapfundzisa mwinji wa anthu ali m'bote.

⁴Pidamala Iye kulonga, apanga Simau: “Pita na bote mpaka ku madzi akuzika, mbukhuthula makoka ako toera kuphata ntsomba.”

⁵Simau atawira: “Mbuya, tabasa masiku onsene mbtikhonda kuphata cinthu. Mbwenye thangwi ya fala yanu, ndinakhuthula makoka.” ⁶Pidacita iwo tenepa, aphata ntsomba zizinji kakamwe, mwakuti makoka awo atoma kung'ambika. ⁷Apangiza andzawo akhali m'bote inango toera abwere kudzaaphedza; iwo abwera mbadzaza mabote mawiri onsene, mwakuti atoma kumira. ⁸Pidaona Simau Pedhru pyenepi, agwa pa maondo a Yezu, mbalonga: “Ndisiyeni, Mbuya, thangwi ndine mamuna wa madawo!” ⁹Thangwi iye pabodzi na onsene akhali na iye adzumatirwa kakamwe thangwi ya ntsomba zidaphata iwo,

¹⁰pibodzimbo na Tiyago na Juwau, ana a Zebedewu, andzace a Simau. Yezu apanga Simau: “Leka kugopa; kubulukira cincino unakhala nyakuphata anthu.”

¹¹Na tenepo, akwewera mabote awo kunthethe, asiya pinthu pyonsene, mbantowera Iye.

Mamuna Adacenesewa

¹²Yezu mukhali Iye m'nzinda unango, kwabwera mamuna wakudzala na matanya akuipa kakamwe. Pidaona iye Yezu, agwa namaso pantsi mbaphemba: “Mbuya, mungafuna, munakwanisa kundicenesa.”

¹³Yezu atambalaza djanja yace, amphata, mbalonga: “Ndisafuna. Cenesewa.” Pa n'dzidzi ubodzi-bodzi matanya ambuluka.

¹⁴Yezu antonga toera akhonde kupanga munthu, mbalonga: “Mbwenye ndoko, ukapangize kuna nyantsembe, mbupereka pidatonga Mozeji thangwi ya kucenesewa kwako, ninga umboni kuna anthu.”

¹⁵Mbwenye mphangwa za Iye zathimira kumwazika; mwinji ukulu wa anthu wabungana toera kumbva na kupoleswa matenda awo. ¹⁶Mbwenye Yezu kazinji kene akhabuluka mbaenda ku mbuto zauzolo toera kuphembera.

Mphambvu ya Baba Yakulekerera Madawo

¹⁷Ntsiku inango, mukhapfundzisa Iye, Afarisi na apfundzisi a mwambo akhala pantsi, akhadabwera kubuluka m'midzi yonsene ya Galileya, na kubuluka ku Yudeya na ku Yerusalema. Mphambvu ya Baba wathu ikhalipo toera Iye apolese anthu akuduwala. ¹⁸Penepo pene, amuna abwera anyamula mamuna wakufa manungo pa mphasa, mbasaka kumpweza n'kati na kumugonesa patsogolo pa Yezu. ¹⁹Pidasowa iwo njira yakupita na mwinji toera kumpweza n'kati, akwira padzulu pa nyumba, mbamuselemusa pa mphasa yace kubulukira pa matxetxe, kuenda pakati-nakati, patsogolo pene pa Yezu.

²⁰Pidaona Yezu cikhulupiro cawo, alonga: “Xamwali, madawo ako alekererwa.”

²¹Ananembi na Afarisi atoma kudinga-dinga, mbalonga: “Mbani munthu uyu analonga kuxolotha Mulungu? Mbani anakwanisa kulekerera madawo, kusiyapo Mulungu ekha?”

²²Yezu pidadziwa Iye manyerezero awo, aatawira: “Thangwi yanji musanyerezera m'mitima mwanu? ²³Ndi cipi cakukhonda nensa: kulonga, ‘Madawo ako alekererwa,’ peno kulonga, ‘Lamuka, mbufamba’? ²⁴Mbwenye toera imwe mudziwe kuti Mwana wa Munthu ali na mphambvu pa dziko yapantsi toera kulekerera madawo”—apanga mamuna wakufa manungo—“Ndisakupanga, lamuka, kwata mphasa yako, mbuenda kunyumba kwako.”

²⁵Pa n'dzidzi ubodzi-bodzi alamuka patsogolo pawo, akwata mphasa yace, mbaenda kunyumba kwace mbasimba Baba wathu. ²⁶Onsene adzumatirwa; asimba Baba wathu, mbadzala na kugopa, mbalonga: “Lero taona pinthu pyakudzumisa.”

Yezu Acemera Levi

²⁷Pakumala pyenepi, Yezu abuluka panja mbaona nyakulipisa misonkho, dzina yace Levi, akhala pa mbuto yakulipisira misonkho. Yezu alonga: “Nditowere.”

²⁸Na tenepo, Levi alamuka, asiya pinthu pyonsene, mbantowera Iye. ²⁹Penepo Levi acitira Yezu phwando ikulu panyumba pace, mwinji ukulu wa anyakulipisa misonkho na anango akhala nawo pa meza. ³⁰Mbwenye Afarisi na ananembi awo ang'ung'udza kuna anyakupfundza ace: “Thangwi yanji musadya na kumwa pabodzi na anyakulipisa misonkho na anyakudawa?”

³¹Yezu aatawira: “Anthu akuwanga nkhabe kufuna dotoro, mbwenye ndi anyakuduwala. ³²Ine nee ndabwera toera kucemera anyakulungama tayu, mbwenye anyakudawa toera atcunyuke.”

Mbvundzo Thangwi ya Kujidima

³³Iwo ampanga: “Anyakupfundza a Juwau asajidima kazinji kene mbaphembera, ningambo anyakupfundza a Afarisi, mbwenye anyakupfundza anu asadya na kumwa.”

³⁴Yezu alonga: “Munakwanisa kucitisa axamwali a mankhwali toera ajidime mu n'dzidzi uli mankhwali pabodzi na iwo? ³⁵Mbwenye ntsiku zinabwera zakuti mankhwali anakwatwa kuna iwo, penepo, mu ntsiku zenezo, iwo anajidima.”

³⁶Iye aapanga nsangani pontho: “Nkhabe munthu anang'amba cigamba ca nguwo ipsa toera kusonera pa nguwo yakale. Mungacita tenepo, anang'amba nguwo ipsa, pontho cigamba ca nguwo ipsa nkhabe kulandana na nguwo yakale. ³⁷Nkhabe munthu anathira vinyu ipsa m'matewe akale; mungacita tenepo, vinyu ipsa inapandusa matewe, mbaitika panja, pontho matewe anafudzika. ³⁸Nkhabe, vinyu ipsa isafunika kuthirwa m'matewe apsa. ³⁹Pontho nkhabe munthu, pakumala kumwa vinyu yakale, anafuna ipsa, thangwi iye asalonga, ‘Yakale ndi yadidi.’”