Luku 5

5 ¹Nígbà kan, bí ọ̀pọ̀ ènìyàn ti rọ̀gbà yí i ká láti gbọ́ ọ̀rọ̀ Baba wa, Jesu dúró létí Adágún Genesaretti. ^a a v1 Adágún Genesaretti jẹ́ orúkọ mìíràn fún Òkun Galili. ²Ó rí ọkọ̀ ojú omi méjì tí ó dúró létí adágún náà; àwọn apẹja ti kúrò nínú wọn, wọ́n sì ń fọ àwọn àwọ̀n wọn. ³Ó wọ inú ọ̀kan nínú àwọn ọkọ̀ náà, èyí tí í ṣe ti Simoni, ó sì bẹ̀ ẹ́ pé kí ó tì jáde díẹ̀ kúrò ní etí omi, nígbà náà ó jókòó, ó sì ń kọ́ àwọn ọ̀pọ̀ ènìyàn láti inú ọkọ̀ náà.

⁴Nígbà tí ó dákẹ́ ọ̀rọ̀ sísọ, ó sọ fún Simoni pé, “Tì jáde lọ sí ibi tí omi ti jìn, kí o sì sọ àwọn àwọ̀n rẹ kalẹ̀ fún ìkógbá ẹja.”

⁵Simoni dáhùn pé, “Ọ̀gá, a ti ṣiṣẹ́ ní gbogbo òru, a kò sì mú nǹkan kan. Ṣùgbọ́n nípa ọ̀rọ̀ yín, èmi yóò sọ àwọn àwọ̀n náà kalẹ̀.” ⁶Nígbà tí wọ́n ṣe èyí, wọ́n mú ẹja tó pọ̀ gidigidi tí àwọn àwọ̀n wọn bẹ̀rẹ̀ sí í ya. ⁷Wọ́n ṣe àmì sí àwọn alábàáṣiṣẹ́ wọn tí ó wà nínú ọkọ̀ kejì pé kí wọ́n wá ràn wọ́n lọ́wọ́; wọ́n sì wá, wọ́n kó ẹja kún ọkọ̀ méjèèjì tó bẹ́ẹ̀ tí wọ́n bẹ̀rẹ̀ sí í rì. ⁸Nígbà tí Simoni Peteru rí èyí, ó wólẹ̀ ní eékún Jesu, ó sì wí pé, “Fi mí sílẹ̀, Olúwa, nítorí ẹlẹ́ṣẹ̀ ni mí!” ⁹Nítorí ẹnu ya òun àti gbogbo àwọn tí ó wà pẹ̀lú rẹ̀ nítorí ọ̀pọ̀ ẹja tí wọ́n mú,

¹⁰bẹ́ẹ̀ sì ni Jakọbu àti Johanu, àwọn ọmọ Sebede tí wọ́n sì jẹ́ alábàáṣiṣẹ́ Simoni. Jesu sọ fún Simoni pé, “Má bẹ̀rù; láti ìsinsìnyí lọ, ènìyàn ni ìwọ yóò máa mú.”

¹¹Bẹ́ẹ̀ ni wọ́n wọ́ àwọn ọkọ̀ wọn sókè sí etí omi, wọ́n fi ohun gbogbo sílẹ̀, wọ́n sì tẹ̀lé e.

Ọkùnrin Kan tí A Sọ Di Mímọ́

¹²Nígbà tí Jesu wà ní ọ̀kan nínú àwọn ìlú, ọkùnrin kan tí ẹ̀tẹ̀ búburú ti kún ara rẹ̀ farahàn. Nígbà tí ó rí Jesu, ó dojúbolẹ̀, ó sì bẹ̀bẹ̀ pé, “Olúwa, bí ẹ bá fẹ́, ẹ lè sọ mí di mímọ́.”

¹³Jesu na ọwọ́ rẹ̀, ó fọwọ́ kàn án: “Mo fẹ́. Di mímọ́.” Lẹ́sẹ̀kẹsẹ̀, ẹ̀tẹ̀ náà fi í sílẹ̀.

¹⁴Jesu pa á láṣẹ pé kí ó má sọ fún ẹnikẹ́ni, “ṣùgbọ́n lọ, fi ara rẹ han àlùfáà, kí o sì rú ẹbọ tí Mose pàṣẹ fún ìwẹ̀nùmọ́ rẹ, gẹ́gẹ́ bí ẹ̀rí fún àwọn ènìyàn.”

¹⁵Ṣùgbọ́n ọ̀rọ̀ nípa rẹ̀ túbọ̀ ń tàn kálẹ̀ sí i; ọ̀pọ̀ ìjọ ènìyàn kóra jọ láti gbọ́rọ̀ rẹ̀ àti láti rí ìwòsàn kúrò nínú àìsàn wọn. ¹⁶Ṣùgbọ́n Jesu máa ń yẹra lọ sí àwọn ibi tí ó dá láti gbàdúrà.

Agbára Baba láti Dárí Ẹ̀ṣẹ̀ Jì

¹⁷Ní ọjọ́ kan, bí ó ti ń kọ́ni, àwọn Farisi àti àwọn olùkọ́ òfin jókòó, wọ́n ti wá láti gbogbo abúlé Galili, àti láti Judea àti Jerusalemu. Agbára Baba wa sì wà níbẹ̀ fún un láti mú àwọn aláìsàn láradá. ¹⁸Lẹ́sẹ̀kẹsẹ̀ náà, àwọn ọkùnrin kan wá, wọ́n gbé ọkùnrin arọ kan lórí ẹní, wọ́n ń gbìyànjú láti mú un wọlé àti láti tẹ́ ẹ sílẹ̀ níwájú Jesu. ¹⁹Nígbà tí wọn kò rí ọ̀nà gba àárín ọ̀pọ̀ ènìyàn náà láti mú un wọlé, wọ́n gun orí òrùlé, wọ́n sì sọ ọ́ kalẹ̀ pẹ̀lú ẹní rẹ̀ gba àárín àwọn ìdẹ̀ òrùlé, sí àárín gbùngbùn, ní gbangba níwájú Jesu.

²⁰Nígbà tí Jesu rí ìgbàgbọ́ wọn, ó wí pé, “Ọ̀rẹ́, a ti dárí àwọn ẹ̀ṣẹ̀ rẹ jì ọ́.”

²¹Àwọn akọ̀wé àti àwọn Farisi bẹ̀rẹ̀ sí í jiyàn pé, “Ta ni ọkùnrin yìí tí ń sọ ọ̀rọ̀ òdì sí Ọlọ́run? Ta ni ó lè dárí ẹ̀ṣẹ̀ jì bí kò ṣe Ọlọ́run nìkan?”

²²Nígbà tí Jesu mọ ohun tí wọ́n ń rò, ó dáhùn wọn pé, “Èéṣe tí ẹ̀yin fi ń ronú nínú ọkàn yín? ²³Èwo ló rọrùn jù: láti wí pé, ‘A ti dárí àwọn ẹ̀ṣẹ̀ rẹ jì ọ́,’ tàbí láti wí pé, ‘Dìde, kí o sì rìn’? ²⁴Ṣùgbọ́n kí ẹ̀yin lè mọ̀ pé Ọmọ Ènìyàn ní àṣẹ lórí ilẹ̀ ayé láti dárí ẹ̀ṣẹ̀ jì”—ó sọ fún ọkùnrin arọ náà—“Mo wí fún ọ, dìde, gbé ẹní rẹ, kí o sì lọ sílé.”

²⁵Lẹ́sẹ̀kẹsẹ̀, ó dìde níwájú wọn, ó gbé ẹní rẹ̀, ó sì lọ sílé, ó ń yin Baba wa lógo. ²⁶Ẹnu ya gbogbo wọn; wọ́n yin Baba wa lógo, ẹ̀rù sì kún wọn, wọ́n ń wí pé, “A ti rí ohun àgbàyanu lónìí.”

Jesu Pe Lefi

²⁷Lẹ́yìn èyí, Jesu jáde, ó sì rí agbowó-orí kan tí orúkọ rẹ̀ ń jẹ́ Lefi, tí ó jókòó ní ibi àgọ́ gbígba owó orí. Ó wí pé, “Tẹ̀lé mi.”

²⁸Bẹ́ẹ̀ ni Lefi dìde, ó fi ohun gbogbo sílẹ̀, ó sì tẹ̀lé e. ²⁹Nígbà náà, Lefi ṣe àsè ńlá kan fún Jesu nílé rẹ̀, ọ̀pọ̀ àwọn agbowó-orí àti àwọn mìíràn sì jókòó jẹun pẹ̀lú wọn. ³⁰Ṣùgbọ́n àwọn Farisi àti àwọn akọ̀wé wọn ń kùn sí àwọn ọmọ-ẹ̀hìn rẹ̀ pé, “Èéṣe tí ẹ̀yin fi ń bá àwọn agbowó-orí àti àwọn ẹlẹ́ṣẹ̀ jẹun, tí ẹ sì ń mu?”

³¹Jesu dáhùn wọn pé, “Kì í ṣe àwọn tí ara wọn le ni ó nílò oníṣègùn, bí kò ṣe àwọn aláìsàn. ³²Èmi kò wá láti pe àwọn olódodo, bí kò ṣe àwọn ẹlẹ́ṣẹ̀ sí ìrònúpìwàdà.”

Ìbéèrè Nípa Àwẹ̀

³³Wọ́n wí fún un pé, “Àwọn ọmọ-ẹ̀hìn Johanu máa ń gbààwẹ̀ nígbà gbogbo, wọ́n sì ń gbàdúrà, bákan náà ni àwọn ọmọ-ẹ̀hìn àwọn Farisi, ṣùgbọ́n àwọn tìrẹ ń jẹ, wọ́n sì ń mu.”

³⁴Jesu wí pé, “Ṣé ẹ lè mú kí àwọn ọ̀rẹ́ ọkọ ìyàwó gbààwẹ̀ nígbà tí ó wà pẹ̀lú wọn? ³⁵Ṣùgbọ́n àwọn ọjọ́ yóò dé nígbà tí a ó gba ọkọ ìyàwó náà kúrò lọ́dọ̀ wọn, nígbà náà, ní àwọn ọjọ́ wọ̀nyẹn, wọn yóò gbààwẹ̀.”

³⁶Ó tún pa òwe kan fún wọn pé: “Kò sí ẹni tí ó ya ègé aṣọ kúrò nínú ẹ̀wù tuntun, tí ó sì rán an mọ́ ẹ̀wù àtijọ́. Bí kò bá ṣe bẹ́ẹ̀, yóò ya ẹ̀wù tuntun náà, ègé aṣọ tuntun náà kì yóò sì bá ti ẹ̀wù àtijọ́ mu. ³⁷Kò sí ẹni tí ó fi wáìnì tuntun sínú ìgò awọ àtijọ́; bí kò bá ṣe bẹ́ẹ̀, wáìnì tuntun náà yóò bẹ́ àwọn ìgò awọ náà, yóò sì dànù, àwọn ìgò awọ náà yóò sì bàjẹ́. ³⁸Bẹ́ẹ̀ kọ́, wáìnì tuntun ni a gbọ́dọ̀ fi sínú ìgò awọ tuntun. ³⁹Kò sí ẹni tí yóò fẹ́ ti tuntun lẹ́yìn tí ó bá ti mu wáìnì àtijọ́, nítorí ó wí pé, ‘Èyí àtijọ́ dára.’”