Luke 5

5 ¹Akhatharan, mi kachungkhana ithumwui Avāwui Tui shākhavai ali puiruikhama tharan, Jishuna Gennesaret ngayipheili nganinga. ^a a v1 Gennesaret ngayi hi Galilee shamadruwui aming khangatei akhana. ²Ana ngayipheili nganingda khalei marikhong khani thei; khai kaphābing china marikhong chi nothāhailaga athumwui khailan pheoda leisai. ³Marikhong khani chiwui ngachaili Simonwui marikhong chili kātonglaga ana ali ngayipheiwui eina kasha̱kha katingvai khavai poi, chieina pamzanglaga marikhong chiwui eina yarui chili tamchithei.

⁴Ana khamatui ngasām kahai tharan, ana Simonli hānga, "Kathuka tara̱li katingvālu kala phākhavai nawui khailan horsanglu."

⁵Simonna ngahānkai, "Amei, ithumna khavāknao katonga ot sāhaira kha khikha mashāthuwa. Kha nawui tuina, ina khailan horsangra." ⁶Chithāda sālaga athumna khai kachungkha phāhaoda athumwui khailan sāshatphokuwa. ⁷Athumna khangatei marikhong chiwui ngasotnaobingli rāngachon khavai pāng eina khokhui; chieina anina rāda marikhong khani chi pemngasakhaoda ngaphuphokuwa. ⁸Chi kathei tharan, Simon Peterna Jishuwui khuksao ngakhumshāmzangda hānga, "Amei, iwui eina zatthuihaolu, kaja I morei kaphunga mi akhana!" ⁹Kaja athumna phākakhui khai chiwui vang eina ana kala awui ngasotnao saikora matakhakhaowa,

¹⁰chikathā Simonwui ngasotnao, Zebedeewui naomayara James eina Johnla matakhakhaowa. Jishuna Simonli hānga, "Mangacheealu; arui eina tangda nana mi phāra."

¹¹Chieina athumna marikhong chi ngayipheili ngakhunshokta saikora nothāhailaga ali shurthuwa.

Mi akhali Tharngasaka

¹²Jishuna keinung akhali leilakha, phasā katonga phārrei kazāt eina pemkahai mi akha rāhaowa. Jishuli kathei tharan, ana mai mashunzangda poi, "Amei, nana mayāngaiakha, nana ili tharngasakshapra."

¹³Jishuna apāng katingshokta ali sāza̱da hānga, "Ina mayāhaira. Kathara ngasālu." Ngalāngda phārrei kazāt chi awui eina raihaowa.

¹⁴Jishuna ali khipalikhala mahānglakalu da ningmi, "kha vālaga, mibingwui vang shākhi khavai, pāngmonli nakhalatta chitheilu kala nawui tharmiwui vang Mosesna kaso kahai chi chigatlu."

¹⁵Kha awui pao chi lāngmeida ngayaovai; mi kachungkhana ali shākhavai kala athumwui kazāt eina raimi khavai rākazipa. ¹⁶Kha Jishuna ra̱ra̱ ngachakyāng kahai apambingli zatthui seihā sāpama.

Avāwui Khayonkhamāng Kapheowui Pangshap

¹⁷Zimiksho akhala ana tamchithei mamānlakha, Galileewui kha̱ katonga eina, kala Judea eina Jerusalemwui eina kharā Phariseebing eina ain kathembing pama. Kala ithumwui Avāwui pangshap chi kakazānaobingli raimi khavai ali ngasosai. ¹⁸Chitharan mi kaikhana sheikasha̱ mi akha pet eina phonda ngava̱rai, kala ali azangkhuida Jishuwui mangāli phon khavai hotnai. ¹⁹Mi chungnāhaiwui vang ali azangkhavai shongfa masamphangthuda, athumna shimtungli kālaga, akhur chiwui eina ali awui pet eina phonda alungthungli Jishuwui mangāli chihotai.

²⁰Jishuna athumwui shitkasang chi theilaga hānga, "Ngasotnao, nawui morei pheomihaira."

²¹Ain kathembing eina Phariseebingna rangaphata hānga, "Vareli kachipat katuipā hipā chi khipākhala? Vare maningla morei pheomishapa khipā leikhala?"

²²Athumwui khamachuk chi theihaoda Jishuna athumli ngahānkai, "Khisāda nathumwui ningli machukphāphākhala? ²³'Nawui morei pheomihaira' da kahāng kaji eina 'Ngakarthuida zatulu' da kahāng, khipā chi paimeikhala? ²⁴Kha okathuili miwui Naomayarana morei pheomikashapwui sāshap pangshap lei kaji nathumna theikhui khavaina"—ana sheikasha̱pali hānga—"Ina nali hāngna, ngakarthuilu, nawui pet khuiphungda shimli ungulu."

²⁵Chieina ngalāngda ana athumwui mangāli nganinglaga, awui pet khuiphungda, ithumwui Avāli masochikatta shimli unghaowa. ²⁶Athum katonga kashok eina matakhakhaowa; kala ngachee eina pemtinghaoda ithumwui Avāli masochikatta hānga, "Aja zimiksho ithumna matakhak kahai ot theihaira."

Jishuna Levili Hokhui

²⁷Chiwui thili, Jishuna shokta, khāshinā khaloka Levi kaho mi akha khāshinā khalokpamli pamkasa chi thei. Ana ali hānga, "Ithi shurlu."

²⁸Chieina Levina ngakarthuida, khalei saikora hortāhailaga, athi shurthuwa. ²⁹Chieina Levina awui shimli Jishuwui vang zātkhān tarākha akha sāda, khāshinā khaloka kachungkha eina khangateibing chila athumli ngasoda phazāruma. ³⁰Kha Phariseebing eina athumwui ain kathembingna awui sākhangatha̱bingli kapumkaseoda hānga, "Khi sāda nathum khāshinā khalokabing eina morei kaphungbingli phāshak phazākhala?"

³¹Jishuna athumli hānga, "Kakazā makhalei mibingna khanong mahomana, kha kakazā leibingna kahona. ³²Ina khamashungbingli hokhuikida kharā maningla, kha morei kaphungbingli ningngateida hokhuikida kharāna."

Khumkapamwui Pongli Khangahān Akha

³³Athumna ali hānga, "Johnwui sākhangatha̱bingna ra̱ra̱ khumlaga seihā sāpama, Phariseebingwui sākhangatha̱bingla chithada sāpama, kha nawuina phāshak phazāpama."

³⁴Jishuna hānga, "Khām kahaia athumli ngasopamda leilakha, nathumna khām kahaiawui khamashitabingli khum khavai sāshaprala? ³⁵Kha shakazā mayara chili athumwui eina khuikathui atam rārāsāra, kala chitharan athum khumnaora."

³⁶Ana athumli chānjam akhala hāngchithei: "Khipānakha kadhara kachonwui eina chonsā akha kākkhuilaga kachama kachonli mataksangmana. Chi maningakha, ana kadhar chi kākshokhaoda, kala kadhara chonsā chi kachamawui mathāmara. ³⁷Kala khipānakha kachama sāhuikhao chili drakhāra̱ kadhar mathaisangmana; thaisangakha drakhāra̱ kadhar china khao chi ngawokkhaida, heitha̱serhaoda, kala sāhuikhao chi shimānhaora. ³⁸Kha, drakhāra̱ kadhar chi kadhara sāhuikhao chili thaisangphalungra. ³⁹Kala khipānakha kachama drakhāra̱ mangkahailaga kadhara drakhāra̱ chi mangaimara; kaja ana hānga, 'Kachama chi phālaka.'"