Luke 6

6 ¹Sabbaththang akhali, Jishuna luivāk vai; awui sākhangatha̱bingna māmazan mazokkhuilaga, apāng eina neomilaga shaiya. ²Phariseebing kaikhana hānga, "Khisāda nathumna Sabbaththang ain maningla ot chi sākhala?"

³Jishuna athumli ngahānkai, "David eina awui ngasotabing thaikahai tharan ana khi sāhao kaji nathum mapāmalā — ⁴kathada ana ithumwui Avāwui shimli zanglaga, pāngmonbing maningla khipānakha mashaikapai Ngasokhamiwui khamui chi khuida shaihao, kala awui ngasokazatbinglila mihao?" ⁵Chiwui thili ana athumli hānga, "Miwui Naomayarana Sabbathwui Prohona."

⁶Sabbath khangatei akhali, ana synagogueli vāzanga kala tamchithei; apam chili yāpang sheikasha̱a mi akha leisai. ⁷Chithākha ali khayon phenkhavai, ain kathembing eina Phariseebingna Sabbaththang ana kazāt raiminikhala da ali khangatha̱ yangpama.

⁸Kha athumwui kaphaning theilaga, ana pāng sheikasha̱a mili hānga, "Ngakarthuida hili rālu." Chieina ana ngakarthuida apam chili nganinga. ⁹Chieina Jishuna athumli hānga, "Ina nathumli ngahānna: Sabbaththang kaphā ot kasā lah makaphā ot kasā, mirin huikhui lah sāshimān, hi ainlā?" ¹⁰Ana athum saikorali kuimareida yanglaga, mili hānga, "Nawui pāng katingvālu." Ana chithāda sā kahai eina awui pāng chi raihaowa.

¹¹Kha athum malungvāt eina pemlaga, Jishuli khi sāsikhala da athum akha eina akha ngazek ngaroka.

Paokazat Tharāda Khani Kapangkhuiya

¹²Chithang zimikshobing chili Jishuna seihā sākhavai kaphungli vai, kala ngayā katonga ithumwui Avāli seihā sāda pama. ¹³Ngathor shoknanai, ana awui sākhangatha̱bingli hokkhuilaga, athumwui ngachaili tharāda khani kapangkhui, kala athumli paokazat da phokmi: ¹⁴ana Peter da phokmi Simon eina agato Andrew; James eina John; Philip eina Bartholomew; ¹⁵Matthew eina Thomas; Alphaeuswui naomayara James, kala Zealot kaho Simon; ¹⁶Jameswui naomayara Judas, kala raikathā ngasā kahai Judas Iscariot.

Avāwui Pangshapna Mi Kachungkhali Raimi

¹⁷Ana athumli ngasoda katunga kala ashāt akhali nganinga, awui sākhangatha̱bing kachungkhala, kala Judea katonga, Jerusalem, kala Tyre eina Sidonwui shamadrupheiwui eina rākharā mi kachungkhala ngasosai. ¹⁸Athumna ali nganā khavai kala athumwui kazātli raimi khavai rāhaowa; makathar manglāna chotngasakbinglila raimisera. ¹⁹Yarui katongana ali sāza̱khui khavai salui, kaja awui eina pangshap shokta saikorali raimi.

²⁰Awui sākhangatha̱bingli munlak eina yangda ana hānga: "Nathum kachāmabing chi sokhamina, khikhalajila ithumwui Avā wungram chi nathumwuina.

²¹"Nathum rida thaihaobing chi sokhamina, khikhalajila nathumli ningyāng ungngasakra. Nathum rida chapngachābing chi sokhamina, khikhalajila nathum mana̱ra. ²²Miwui Naomayarawui vang eina mibingna nathumli ningkachai tharan, kala athumna nathumli ngatangkhuida mashātta nathumwui ming makaphā da horhai tharan, nathum sokhamina. ²³Chithang zimiksholi ringphālu kala khamathānna ngawoklu, khikhalajila kazingramli nathumwui sāman haklāka; kaja rekakharekbingwui avā ngarāna marānbingli chi tākam eina sāsai.

²⁴Kha kashāngabing nathum kakhanang ngasāranu, khikhalajila nathumna nathumwui ringphā chi samphanghaira. ²⁵Rida ningyāng ungbing nathum kakhanang ngasāranu, khikhalajila nathum thaira. Rida mana̱bing nathum kakhanang ngasāranu, khikhalajila nathum chapngachāda chapra. ²⁶Mi saikorana nathumli kaphā da hāng tharan nathum kakhanang ngasāranu, khikhalajila sovaibingwui avā ngarāna minama marānbingli chi tākam eina sāsai.

Nawui Yangkashebingli Leishilu

²⁷Kha nganākhuibing nathumli ina kahāngna: nathumwui yangkashebingli leishilu, nathumli ningkakachaibingli kaphā ot sālu, ²⁸nathumli khonshibingli somilu, nathumli khalāng ot sābingwui vangla seihā sāmilu. ²⁹Nawui maisor akhali kapheabingli, lākhavākla ngareimilu; nawui kachon khuiabingli, nawui phahonla makhalanmalu. ³⁰Nali kapobing kachiva̱li khamilu, kala nawui eina khuiya kahai chi ungkhui khavai matānmalu. ³¹Mibingna nathumli sāmi khavai nathumna ningngaikha, nathumnala athumli chikathā sālu.

³²Nathumli leikashibingli nathumna leishiakha, khi tongkazā leikhala? Morei kaphungbingnala athumli leikashibingli leishiya. ³³Nathumli kaphā ot sābingli nathumna kaphā ot sāakha, khi tongkazā nathumli leikhala? Morei kaphungbingnala chi tākam eina sāpama. ³⁴Kala run khavai ningsanglak chishutakha, khi tongkazā leikhala? Morei kaphungbingnala aman chi tākam ungkhui khavai morei kaphungbingli chishuta. ³⁵Kha nathumwui yangkashebingli leishilu, kaphā sālu, kala khikha samphanglapai da maningsangla chishutlu; chithākha nathumwui sāman khamataia ngasāra, kala nathum Juikhamataiwui naomayara ngasāra, kaja ana ningkashi makatheibing kala makhayābingli lumashankathana. ³⁶Nathumwui Avā lumashankathana thada, nathumla lumashankatha ngasālu.

Bichar Masaalu

³⁷Bichar masaalu, chithākha nathumli bichar masāmara. Khayon masaalu, chithākha nathumli khayon masāmara. Pheomilu, chithākha nathumli pheomira. ³⁸Khamilu, chithākha nathumli khamira: ngarak kaphā akha peida khanukta pemtinghaida nathumwui makāli heirormira. Kaja nathumna singkhui ngarak chi eina nathumlila ngasakluira."

³⁹Ana athumli chānjam akhala hāngchithei: "Mik khangapeo akhana mik khangapeo akhali ngareithuipaira̱khala? Khanini saikorala chomli mapitāngayaomana? ⁴⁰Sākhangatha̱ khipākhana awui ojāli mareimeimana; kha tongtingda tamchithei kahai a china awui ojāwui thada ngasāra. ⁴¹Khi sāda nachināwui mikli khalei khayim kazang chi na theilaga, na khamorwui mikli khalei thingngumrik kazang chi matheithukhala? ⁴²Namikli thingngumrikha kazang chi matheila, kathada nachināli, 'Ichinā, ina namikli khayim kazang chi kheimiga' da hāngpairakhala? He, phākakhaninga! Rimeikapta na khamorwui mikli khalei thingngumrik kazang chi kheishokhaifalu, chiwui thili nachināwui mikli khalei khayim kazang chi kheishokmi khavai na mathingrik eina theira.

Athei eina Theikhui

⁴³Kaja khamathā thingrong akhana zakkashi athei mamatheipaimana, lah zakkashi thingrong akhana khamathā athei matheiluimana. ⁴⁴Thingrong kachiva̱li awui athei eina theikhuira; ka̱shāt eina khaorāthei kazipkhui khavai matheiluimana, lah kashātrongli drakhāthei maphākhuimana. ⁴⁵Kaphā mina awui ningwui kaphā kazip chi eina kaphā chi shoka; makhayā mina makaphā kazip chi eina makaphā chi shoka; kaja ning pemtinghai chi eina khamorna matuira.

Lunghārtungli Sākā

⁴⁶Khi sāda nathumna ili 'Amei, Amei' da holaga, ina kahāng chi masāthukhala? ⁴⁷Iwuili kharā, iwui tui nganālaga chi kasā mi kachiva̱ chi kachi thada leikhala da ina nathumli chitheira: ⁴⁸Ana shim kasā mi akha kathāna: ana kathuk zangda chuilaga lunghārtungli awui shimphunga sākā. Tara̱ kaphong rā tharan, kongrā china shim chili rātākror, kha chili mangatha̱ ngasakrarthuwa, kaja chi phālak eina sākā kahaina. ⁴⁹Kha iwui tui nganālaga chi masā a china, shimphunga maleila ngaleitungli shim kasā mi akha kathāna. Tara̱ kaphong china chili rātākror, kala chi chichangli kongluihaowa. Shim chiwui kashimān khamataia ngasāhaowa."