Mi eng' bukuit
Bukuit

Jeso, Kiptaiyatap Sabato

Ki kwong'u siruutik ak Pharisaik amu kabargei aeng' che po Sabato. Kingo kagosaa Kwandanyi betiit komugul, ki lewen Jeso taman ak aeng', yeityo koneetis eng' komaswek che tiriich: kaberureet agobo poor ak che tinyei robeet, pwo agobo che ng'eny ak che leelosyei piik, chametap puunik, ak kateunet kole chii ne kas ago ma yai ma teech soseet.

Sura 6.

Eng' peetuutap Sabato, ki wendi Jeso kobunei mbareenigap nganuuk; ki til kasubikyik metowegap nganuuk, ak kotanan eunekwak, ak koam. Ki le alak eng' Pharisaik, “Amu nee si oyaei kii ne ma po ng'atuutik eng' Sabato?”

Ki wolji icheek Jeso, “Tos ma kaosiis ne ki yai Daudi, ye kingo amei rubeet ineendet ak piik che ki mi kobooto ineendet, ye kingo chut koitap Kwandanyo, ak konam magatyat ne kigeyogu eng' tai, ak koam, ak kogoochi piik che ki mi kobooto ineendet, ne ma po ng'atuutik koam age tugul kobatee tisiik kityo?” Yeityo koleenji icheek, “Ko Kiptaiyatap Sabato Weeriitap chii.”

Eng' Sabato age ko ki wo sinagogit oriit ak koneetis; ki mi yooto chii ne ki tinyei euut ne po tai ne kigochuul. Ki riibei ineendet miising' siruutik ak Pharisaik si kogeer ngot kosoop chii eng' Sabato, si konyooru kiy ne po konde eng' ineendet.

Ago kingo nai ineendet kabwaatutikwak, koleenji chiito ne ki tinyei euut ne kigochuul, “Ng'eet ak itonon yu.” Ki ng'eet anyun ak kotonon yooto. Yeityo koleenji icheek Jeso, “Ateebin okweek: tos po ng'atuutik eng' Sabato keyai ne myee anan keyai ne ya, kesar saboondap chii anan keristai?” Kingo keer icheek tugul kobunei komoswek tugul, koleenji chiito, “Chuul eung'ung'.” Ki yai anyun, ak kagomyeeit eunnyi.

Ago kingo nyiit nereegek, kong'alaaljigei icheegei ne machei koyachi Jeso.

Kilewen Kasubik Taman ak Aeng'

Eng' peetuusyechooto ko ki wo Jeso tulweet koba kosaaei, ak kobata kemout komugul eng' saaetap Kwandanyo. Ye kingo karon, ki kuur kasubikyik ak kolewen taman ak aeng' eng' icheek, ak koguure icheek kainetap kiyooktoi: Simion, ne ki guure Petero, ak ng'eetap kamet Andrea; Jakobo ak Johana; Philipu ak Bartolomayo; Matayo ak Thomas; Jakobo weeriitap Alphayo, ak Simion ne ki guure kanaanindet; Judas weeriitap Jakobo, ak Judas Iskaryot, ne ki ek ne king'wektoi.

Kimnateetap Kwandanyo Kosoop Tuiyosyek

Ki wo ng'wony kobooto icheek ak kotonon komoswek ne litit, kobooto tuiyetap kasubikyik ne oo ak chaang'indap piik che ki punu Judea komugul, Jerusalem, ak ngeguutap Turo ak Sidon. Ki pwoonei kogasei ineendet ak kesoop eng' myanwogiguwak; ak kagomyeeit kora icheek che ki iwechei tamirmirik che murwonen. Ki machei tuiyet tugul kosut ineendet, amu ki mang'une kimnateet eng' ineendet, ak kosoop piik tugul.

Kingo too koonyek koba kasubikyik, koleenji: “Poiboen okweek che oik pooryeet, amu ko po okweek laitornatetap Kwandanyo.

“Poiboen okweek che oamei rubeet rani, amu tuun kioboeng'u. Poiboen okweek che oriirye rani, amu tuun okororyei. Poiboen okweek ye wechok piik, ak ye kiistook ak koikwek ak koeesye kainekwok ko uu ne ya, amu Weeriitap chii. Oboiboigei eng' peetuunooto ak otorombeni eng' boiboiyet, amu oo konyeekwok eng' kipsengwet; amu ki yaachi kwandap pichooto che kowechei kora maotik.

Ago nyolilwok okweek che oik mogoreek, amu kaonyooru kaigaennyok eng' tai. Nyolilwok okweek che opiyong'otiin rani, amu tuun oamei rubeet. Nyolilwok okweek che okororyei rani, amu tuun oriibyei ak oriir. Nyolilwok okweek ye kong'alaalwok komyee piik tugul, amu ki yaachi kwandap pichooto maotik che lewottoot.

Ocham Puuniguk

Ago amwaiwok okweek che ogase: ochame puuniguk, oyachi che wechok ne myee, oberuur che chuubkook, osaayechi che yaachinok. Age tugul ne rabaachin cheeng'ung' age, iweeksei kora ne age; age tugul ne iboolin kotonyeng'ung', manyany sumotiiyong'ung'. Igoochi age tugul ne soomin, ak manyany tuguuk che kagechorun. Iyachi piik alak ko uu ye imache koyaiywok.

Ye icham che chamin—nee myeeindo ne mi eng' nooto? Chamei agot kiptengekyot che chamei icheek. Ngot oyachi ne myee che yaiywok ne myee, nee myeeindo ne mi eng' okweek? Yaei agot kiptengekyot ko uu nooto. Ak ngot osoomchini piik amu omache koweekyok, nee myeeindo ne mi eng' nooto? Soomchinei agot kiptengekyot kiptengekyot si koweekyin iman katyagennyi. Ago ochame puuniguk, oyae ne myee, ak osoomchini amu ma omache koweekyok; tuun oo konyeekwok, ak oegu lagogap Kamuktaindet ne Toroor miising', amu kindoe ineendet che ma kong'oi ak che yaach. Orireegei, ko uu ye rireegei Kwandang'wong'.

Mogirwookyi Piik

Mogirwookyi piik, ak ma kirwookyin. Mogikyini ne ya, ak ma kigikyin ne ya. Onyochini kaat, ak kinyochinwok kaat. Ogoite, ak kigoochinwok: indoetap karnet ne myee—ne kigon ng'uny, ne kiisete, ne ng'irtagei—kinapchi kaating'wong'. Amu indoetap karnet ne oindoe ko kiindochini kogeny.”

Ki mwachi icheek kora paran: “Tos muuchi chii ne koryot kondochi chii ne koryot? Tos ma obut tugul aeng' keriinget oriit? Ma siirei chii ne kineeti kaneetindennyi; age tugul ne kagokineet komugul koek ko uu kaneetindennyi. Amu nee si igeer kurgeet ne mi konyegap tupcheng'ung', ago ma igeer keetit ne oo ne mi koonyeeng'ung' inyee? Amuuchi ano ileenji tupcheng'ung', ‘Tupcho, chamwo anam kurgeet ne mi koonyeeng'ung',’ ye ma igeer inyee keetit ne mi koonyeeng'ung' inyee? Sulootindet! Nem tai keetit ne mi koonyeeng'ung' inyee, yeityo igeer komyee si inem kurgeet ne mi konyegap tupcheng'ung'.

Kenai eng' Logoeng'ung'

Amu ma mi keetit ne myee ne ruei logoek che yaach, ago ma ruei kogeny keetit ne ya logoek che myach. Kenai keetit age tugul eng' logoennyi ineegei; ma kiyum logoegap mogoonik eng' katook, ago ma kiyum sabibuk eng' keetit ne ming'in ne po katook. Mang'unei chiito ne myee ne myee eng' kabuusetap muguleldanyi ne myee; ak mang'unei chiito ne ya ne ya eng' kabuusennyi ne ya; amu ng'alaali kutit eng' ne ng'irtagei eng' muguleldanyi.

Teech eng' Koito

Amu nee si oguur anee, ‘Kiptaiyat, Kiptaiyat,’ ak ma oyae tuguuk che amwae? Age tugul ne nyoonu ole ami, ak kogas ng'aleekyuk, ak koyai, aboorwok ne kergei ineendet: Kergei chiito ne teechei koot, ne ki bal komi koming'in ak koinde tebennyi eng' koito. Ye kinyoonu aiyweet, kowiir aineet koonooto, ago ma kimuuch koaragen, amu ki kiteech komyee. Ago age tugul ne kas ng'aleekyuk ak ma koyai, kergei chiito ne ki teech koot eng' ng'wony, ne ma tinyei teben. Kowiir aiyweet, ak koluul sait, ak ki oo ng'emisyetap koonooto.”