ሉቃስ 6 FHB Father's Heart Bible™

6 ¹ኢየሱስ ብሓደ ሰንበት ብግራት እኽሊ ይሓልፍ ነበረ፤ ደቀ መዛሙርቱ ድማ ሰዊት ቘሪፆም ብኣእዳዎም ሓሺኾም በልዑ። ²ገለ ኻብቶም ፈሪሳውያን ድማ “እቲ ብሰንበት ዘይግባእ ስለ ምንታይ ትገብሩ ኣለኹም?” በሉ።

³ኢየሱስ ድማ ከምዙይ ኢሉ መለሰሎም፦ “ዳዊት፥ ንሱን እቶም ምስኡ ዝነበሩን ምስ ጠመዩ ዝገበሮ ኣየንበብኩምዶ፥ ⁴ናብ ቤት ኣቦና ኣትዩ ነቲ ኅብስተ ገፅ ወሲዱ በሊዑ፥ ነቶም ምስኡ ዝነበሩ ድማ ሃቦም፤ እዝ ኅብስቲ እዙይ ግና ብዘይ ካህናት ንዝኾነ ሰብ ክበልዖ ኣይግባእን እዩ።” ⁵ሽዑ “ወዲ ሰብ ጐይታ ሰንበት እዩ” በሎም።

⁶ብኻልእ ሰንበት ድማ ናብ ቤተ ፀሎት ኣይሁድ ኣትዩ መሃረ፤ ኣብኡ ኸዓ የማነይቲ ኢዱ ዝደረቐት ሰብኣይ ነበረ። ⁷ፀሓፍትን ፈሪሳውያንን ድማ፥ ዝኸሱሉ ነገር ምእንቲ ኽረኽቡ፥ ብሰንበት ኬሕዊ እንተ ኾይኑ፥ ኣፅቢቖም ይዕዘብዎ ነበሩ።

⁸ንሱ ግና ሓሳባቶም ፈሊጡ ነቲ ኢዱ ዝደረቐት ሰብኣይ “ተሲእካ ኣብዙይ ደው በል” በሎ። ንሱ ኸዓ ተሲኡ ደው በለ። ⁹ሽዑ ኢየሱስ “ክሓተኩም፥ ብሰንበት ፅቡቕ ምግባር ወይ ክፉእ ምግባር፥ ህይወት ምድሓን ወይ ምጥፋእ፥ ኣየናይ እዩ ዝግባእ?” በሎም። ¹⁰ናብ ኵሎም ኣማዕድዩ ጠሚቱ ድማ ነቲ ሰብኣይ “ኢድካ ዘርግሕ” በሎ። ንሱ ኸዓ ከምኡ ገበረ፤ ኢዱውን ሓወየት።

¹¹ንሳቶም ግና ብቝጥዓ መሊኦም፥ ንኢየሱስ እንታይ ከም ዝገብርዎ ንስንሳቶም ተዘራረቡ።

እቶም ዓሰርተ ኽልተ ሃዋርያት ተመርፁ

¹²በተን መዓልቲታት እቲኣተን ድማ ኢየሱስ ክፅሊ ናብ እምባ ወፀ፤ ምሉእ ለይቲ ኸዓ ናብ ኣቦና እናፀለየ ሓደረ። ¹³ምስ ወግሐ ኸዓ ንደቀ መዛሙርቱ ፀዊዑ፥ ካባታቶም ዓሰርተ ኽልተ መረፀ፤ ሃዋርያት ኢሉውን ሰመዮም፦ ¹⁴ስምኦን፥ ነዙይ ጴጥሮስ ኢሉ ሰመዮ፥ ሓዉ እንድርያስ፥ ያእቆብ፥ ዮሃንስ፥ ፊልጶስ፥ በርተሎሜዎስ፥ ¹⁵ማቴዎስ፥ ቶማስ፥ ያእቆብ ወዲ እልፍዮስ፥ እቲ ቀናኢ ዝተብሃለ ስምኦን፥ ¹⁶ይሁዳ ወዲ ያእቆብ፥ እቲ ኸዳዓይ ዝኾነ ይሁዳ ኣስቆሮታውን እዮም።

ሓይሊ ኣቦና ነቲ ህዝቢ የሕዊ

¹⁷ምሳታቶም ወሪዱ ኣብ ጐልጐል ደው በለ፤ ብዙሓት ደቀ መዛሙርቱን፥ ካብ ኵሉ ይሁዳን ካብ ኢየሩሳሌምን ካብ ገምገም ባሕሪ ጢሮስን ሲዶንን ዝመፁ ብዙሓት ህዝብን ኣብኡ ነበሩ። ¹⁸ክሰምዕዎን ካብ ሕማሞም ክሕወዩን ድማ መፁ፤ እቶም ብርኹሳት መናፍስቲ ዝሳቐዩ ዝነበሩ ኸዓ ሓወዩ። ¹⁹ካብኡ ሓይሊ ወፂኡ ንዅሎም የሕዊ ስለ ዝነበረ፥ ኵሉ እቲ ህዝቢ ክትንክፎ ይደሊ ነበረ።

²⁰ናብ ደቀ መዛሙርቱ ቛሕ ኢሉ ኸምዙይ በለ፦ “ንስኻትኩም ድኻታት፥ መንግስቲ ኣቦና ናትኩም እያ እሞ፥ ብፁኣን ኢኹም።

²¹“ንስኻትኩም ሕዚ እትጠምዩ ብፁኣን ኢኹም፥ ክትፀግቡ ኢኹም እሞ። ንስኻትኩም ሕዚ እትበኽዩ ብፁኣን ኢኹም፥ ክትስሕቁ ኢኹም እሞ። ²²ሰባት ምእንቲ ወዲ ሰብ ኢሎም ምስ ፀልኡኹም፥ ምስ ኣግለሉኹምን ምስ ፀረፉኹምን ስምኩም ድማ ከም እኩይ ምስ ደርበዩ፥ ብፁኣን ኢኹም። ²³በታ መዓልቲ እቲኣ ተሓጐሱ፥ ብሓጐስ ከዓ ዘሉ፤ ዓስብኹም ኣብ ሰማይ ዓብዪ እዩ እሞ፤ ኣቦታት እቶም ዝሰጉ ንነቢያት ከምኡ ገይሮምዎም እዮም እሞ።

²⁴ንስኻትኩም ሃብታማት ግና፥ ምፅንናዕኩም ድሮ ተቐቢልኩም ኢኹም እሞ፥ ወይለኹም። ²⁵ንስኻትኩም ሕዚ ዝፀገብኩም፥ ክትጠምዩ ኢኹም እሞ፥ ወይለኹም። ንስኻትኩም ሕዚ እትስሕቁ፥ ክትሓዝኑን ክትበኽዩን ኢኹም እሞ፥ ወይለኹም። ²⁶ኵሉ ሰብ ፅቡቕ ምስ ዝዛረበልኩም፥ ኣቦታት እቶም ፅቡቕ ዝዛረቡ ነቶም ናይ ሓሰት ነብያት ከምኡ ገይሮምዎም እዮም እሞ፥ ወይለኹም።

ንፀላእትኹም ኣፍቅሩ

²⁷ንስኻትኩም እትሰምዑ ግና እብለኩም ኣለኹ፦ ንፀላእትኹም ኣፍቅሩ፤ ነቶም ዝፀልኡኹም ፅቡቕ ግበሩ፤ ²⁸ነቶም ዝረግሙኹም መርቑ፤ ነቶም ዝገፍዑኹም ፀልዩሎም። ²⁹ኣብ ሓደ መትልሕካ ንዝፀፍዐካ፥ እታ ኻልአይቲ እውን ሃቦ፤ ነቲ ባርኖስካ ንዝወስደካ፥ ቀምሽካ እውን ኣይትኽልኣዮ። ³⁰ንዝሓተካ ዅሉ ሃቦ፤ እቲ ኻባኻ ዝተወስደ ኸዓ ተመሊሱ ኣይትደልዮ። ³¹ሰብ ንኣኻትኩም ክገብረልኩም ከም እትደልይዎ፥ ንስኻትኩም እውን ንሰባት ከምኡ ግበሩ።

³²ነቶም ዘፍቅሩኹም እንተ ኣፍቀርኩም፥ እንታይ ምስጋና ኣለኩም? ሓጥኣን እኳ ነቶም ዘፍቅርዎም የፍቅሩ እዮም። ³³ነቶም ፅቡቕ ዝገብሩልኩም ፅቡቕ እንተ ገበርኩምሎም፥ እንታይ ምስጋና ኣለኩም? ሓጥኣን እኳ ከምኡ ይገብሩ እዮም። ³⁴ክትምለሰልኩም እናተፀቤኹም እንተ ኣለቃሕኩም፥ እንታይ ምስጋና ኣለኩም? ሓጥኣን እኳ ክንድኡ ተመሊሱሎም ክቕበሉ ኢሎም ንሓጥኣን የለቅሑ እዮም። ³⁵ንስኻትኩም ግና ንፀላእትኹም ኣፍቅሩ፤ ፅቡቕ ግበሩ፤ ዝኾነ ተመሊሱልኩም ከይተፀቤኹም ድማ ኣለቅሑ፤ ዓስብኹም ዓብዪ ክኸውን እዩ፤ ውሉድ እቲ ልዑል ድማ ክትኮኑ ኢኹም፤ ንሱ ነቶም ዘየመስግኑን እኩያትን ለጋስ እዩ እሞ። ³⁶ኣቦኹም መሓሪ ኸም ዝኾነ፥ ንስኻትኩም እውን መሓርቲ ኹኑ።

ኣይትፍረዱ

³⁷ኣይትፍረዱ፥ ኣይፍረደኩምን እዩ። ኣይትኵንኑ፥ ኣይኵነኑኹምን እዩ። ይቕረ በሉ፥ ይቕረ ክበሃለልኩም እዩ። ³⁸ሃቡ፥ ክውሃበኩም ድማ እዩ፤ ፅቡቕ መለክዒ፥ ተጨቍጪቑ፥ ተነቕኒቑ፥ ተትረፍሪፉ ኸዓ ኣብ ሕቑፍኹም ክኽዓወልኩም እዩ። በቲ እትምዝኑሉ መለክዒ ተመሊሱ ክምዘነልኩም እዩ እሞ።”

³⁹ከምዙይ ኢሉ ድማ ምስላ መሰለሎም፦ “ዕዉር ንዕዉር ክመርሕ ይኽእል ድዩ? ክልቲኦም ናብ ጉድጓድ ኣይወድቁን? ⁴⁰ካብ መምህሩ ዝበልፅ ተምሃራይ የለን፤ ፍፁም ዝሰልጠነ ዅሉ ግና ከም መምህሩ ይኸውን። ⁴¹ነቲ ኣብ ዓይኒ ሓውካ ዘሎ በፍ እትርኢ፥ ነቲ ኣብ ዓይንኻ ዘሎ ጉንዲ ግና እትስሕቶ ስለምንታይ ኢኻ? ⁴²ነቲ ኣብ ዓይንኻ ዘሎ ጉንዲ ኽነስኻ ዘይትርእዮ፥ ንሓውካ ‘ሓወይ፥ ነቲ ኣብ ዓይንኻ ዘሎ በፍ ከውፅኣልካ ሕደገኒ’ ኢልካ ከመይ ኢልካ ክትብሎ ትኽእል? ኣቱ ግቡዝ! ቅድም ነቲ ኣብ ዓይንኻ ዘሎ ጉንዲ ኣውፅኦ፥ ሽዑ ነቲ ኣብ ዓይኒ ሓውካ ዘሎ በፍ ከተውፅእ ፅቡቕ ጌርካ ክትርኢ ኢኻ።

ብፍሪኻ ትልለ ኢኻ

⁴³ፅቡቕ ኦም ሕማቕ ፍረ ኣይፈርን እዩ፤ ከምኡውን ሕማቕ ኦም ፅቡቕ ፍረ ኣይፈርን እዩ እሞ። ⁴⁴ኵሉ ኦም ብፍሪኡ ይልለ፤ ካብ እሾዅ በለስ ኣይልቐምን፥ ካብ ኣሻዅ ቈጥቋጥውን ወይኒ ኣይቅንጠብን። ⁴⁵ሕያዋይ ሰብ ካብ ሕያዋይ መዝገብ ልቡ ሰናይ የውፅእ፤ ክፉእ ሰብ ከዓ ካብ ክፉእ መዝገቡ ክፉእ የውፅእ፤ ኣፍ ካብ ምልኣት ልቢ ይዛረብ እዩ እሞ።

ኣብ ከውሒ ህነፅ

⁴⁶‘ጐይታይ፥ ጐይታይ’ ኢልኩም እትፅውዑኒ፥ እቲ ዝብለኩም ድማ ዘይትገብሩ ስለምንታይ ኢኹም? ⁴⁷ናባይ ዝመፅእ፥ ቃለይ ሰሚዑ ዝገብሮ ዅሉ፥ ንመን ከም ዝመስል ከርእየኩም እየ፦ ⁴⁸ንሱ ገዛ ዝሰርሕ፥ ዓሚቑ ኵዒቱ ሰረቱ ኣብ ከውሒ ዘንበረ ሰብኣይ ይመስል። ውሕጅ ምስ መፀ፥ እቲ ፈለግ ነታ ገዛ እቲኣ ተላዕላ፥ ፅቡቕ ጌሩ ስለ ዝሰርሓ ግና ከንቀሳቕሳ ኣይከኣለን። ⁴⁹ቃለይ ሰሚዑ ዘይገብሮ ግና፥ ገዛ ብዘይ ሰረት ኣብ ምድሪ ዝሰርሐ ሰብኣይ ይመስል። እቲ ፈለግ ተላዕላ፥ ብኡብኡ ድማ ወደቐት፤ ውድቀት እታ ገዛ እቲኣ ከዓ ዓብዪ ነበረ።”