ኢየሱስ ነቶም ቀዳሞት ደቀ መዛሙርቱ ፀወዐ

ጴጥሮስ ለይቲ ምሉእ ገለ እኳ ኸይሓዘ ዓሳ ገፈፈ፤ ብቓል ኢየሱስ ግና ኣዝዩ ብዙሕ ስለ ዝሓዘ፥ ካብኡ ኽርሕቕ ለመኖ። ሕማም ቈርበት ዝነበሮ ሰብ ተተንከየ። መፃጕዕ ሰብኣይ ድማ ብናሕሲ ወሪዱ፥ ብሓይሊ ኣቦና ይቕረ ተብሃለሉ፥ እዙይ ከዓ ንፀሓፍቲ ኣቘጥዖም። ሌዊ ኸዓ መቐበሊ ቐረፁ ሓዲጉ ተኸተሎ።

ምዕራፍ 5።

ሓደ መዓልቲ፥ እቶም ህዝቢ ቃል ኣቦና ክሰምዑ ናብኡ እናተጋፍዑ እንተለዉ፥ ኢየሱስ ኣብ ጥቓ ቀላይ ጌንሳሬጥ ደው ኢሉ ነበረ። ^a ኣብ ጥቓ እቲ ቀላይ ደው ኢለን ዝነበራ ኽልተ ጃላቡ ረአየ፤ እቶም ኣስገርቲ ዓሳ ኸዓ ኻብተን ወፂኦም መርበቦም ይሓፅቡ ነበሩ። ናብ ሓንቲ ኻብተን ጃላቡ፥ ናይ ስምኦን፥ ኣትዩ ኸዓ፥ ካብ ገምገም ቅሩብ ከርሕቕ ለመኖ፤ ተቐሚጡ ድማ ነቶም ህዝቢ ካብታ ጃልባ መሃሮም።

ዘረባኡ ምስ ወድአ ድማ ፥ ንስምኦን “ናብ ዓሚቝ ማይ ደፍእ፥ ንምግፋፍ ድማ መርበብካ ኣውርድ” በሎ።

ስምኦን ድማ “ጐይታይ፥ ለይቲ ምሉእ ፀኒሕና ገለ እኳ ኣይሓዝናን፤ ብቓልካ ግና መርበብ ከውርድ እየ” ኢሉ መለሰ። ከምኡ ምስ ገበሩ ድማ ፥ ብዙሕ ዓሳ ስለ ዝሓዙ፥ መርበቦም ክቕደድ ጀመረ። ነቶም ኣብታ ኻልአይቲ ጃልባ ዝነበሩ ብፆቶም ክመፁ እሞ ክሕግዝዎም ጠቐሱሎም፤ መፂኦም ድማ ክልቲአን ጃላቡ ክሳዕ ዝጥሕላ ኣመልአወን። እዙይ ምስ ረአየ፥ ስምኦን ጴጥሮስ ኣብ ኣብራኽ ኢየሱስ ተደፊኡ “ኦ ጐይታ፥ ኣነ ሓጥእ ሰብ እየ እሞ ካባይ ርሓቕ!” በለ። ንእኡን ንዅሎም እቶም ምስኡ ዝነበሩን፥ በቲ ዝገፈፍዎ ዓሳ ምግራም ሒዝዎም ነበረ እሞ፤

ከምኡ ድማ እቶም ምስ ስምኦን ብፆት ዝነበሩ፥ ደቂ ዘብዴዎስ ያእቆብን ዮሃንስን ተገረሙ። ኢየሱስ ድማ ንስምኦን “ኣይትፍራሕ፤ ካብ ሕዚ ጀሚርካ ንሰብ ክትገፍፍ ኢኻ” በሎ።

ጃላቡኦም ናብ ገምገም ኣደዪቦም ድማ ፥ ኵሉ ነገር ሓዲጎም ተኸተልዎ።

ዝነፅሀ ሰብኣይ

ኢየሱስ ኣብ ሓንቲ ኻብተን ኸተማታት እንተሎ፥ ሕሱም ሕማም ቈርበት ዝመልኦ ሰብኣይ መፀ። ንኢየሱስ ምስ ረአየ ድማ ፥ ብገፁ ተደፊኡ “ጐይታ፥ ፍቓድካ እንተ ደኣ ኾይኑስ ክተንፅሀኒ ትኽእል ኢኻ” ኢሉ ለመኖ።

ኢየሱስ ኢዱ ዘርጊሑ ተንከዮ፥ “ፍቓደይ እዩ፤ ንፃህ” ከዓ በሎ። ሽዑ ንሽዑ ድማ እቲ ሕማም ቈርበት ካብኡ ለቐቖ።

ኢየሱስ ድማ ንዋላ ሓደ ኸይነግር ኣዘዞ፥ “ኪድ ደኣ፥ ንርእስኻ ነቲ ኻህን ኣርኣዮ፥ ንምንፃህካ ድማ ከምቲ ሙሴ ዝኣዘዞ ኣቕርብ፥ ንሰብ ምስክር ክኾኖም” በሎ።

እቲ ብዛዕባኡ ዝወፀ ወረ ግና መሊሱ ተዘርግሐ፤ ብዙሓት ህዝቢ ኸዓ ክሰምዕዎን ካብ ሕማም ክሕወዩን ተኣከቡ። ኢየሱስ ግና መብዛሕቲኡ ጊዜ ናብ ፅምዊ ቦታታት ኣግሊሱ ይፅሊ ነበረ።

ሓይሊ ኣቦ ሓጢኣት ንምሕዳግ

ሓደ መዓልቲ ኸዓ ክምህር እንተሎ፥ ካብ ኵሉ ዓድታት ገሊላ፥ ካብ ይሁዳን ካብ ኢየሩሳሌምን ዝመፁ ፈሪሳውያንን መምህራን ሕግን ተቐሚጦም ነበሩ። ንሕሙማት ንምሕዋይ ድማ ፥ ሓይሊ ኣቦና ኣብኡ ነበረ። እንሆ ኸዓ ፥ ገለ ሰባት ሓደ መፃጕዕ ሰብኣይ ኣብ ዓራት ፅዒኖም መፁ፤ ኣእትዮም ድማ ኣብ ቅድሚ ኢየሱስ ከንብርዎ ይደልዩ ነበሩ። ብሰንኪ እቲ ህዝቢ ኣእትዮም ዘእትውሉ መገዲ ምስ ሰኣኑ፥ ናብ ናሕሲ ደዪቦም፥ ብመንጎ ጡብ ናሕሲ ምስ ዓራቱ ናብ ማእኸል፥ ኣብ ቅድሚ ኢየሱስ ኣውረድዎ።

ኢየሱስ እምነቶም ምስ ረአየ፥ “ኣታ ዓርከይ፥ ሓጢኣትካ ተሓዲጉልካ እዩ” በሎ።

እቶም ፀሓፍትን ፈሪሳውያንን ድማ “እዝ ንእግዚኣብሄር ዝፅርፍ መን እዩ? ብዘይ እግዚኣብሄር በይኑ ሓጢኣት ክሓድግ ዝኽእል መን እዩ?” እናበሉ ክካትዑ ጀመሩ።

ኢየሱስ ድማ ሓሳባቶም ፈሊጡ “ስለ ምንታይ ብልብኹም ትሓስቡ ኣለኹም?” ኢሉ መለሰሎም። “ሓጢኣትካ ተሓዲጉልካ እዩ” ምባል፥ ወይ “ተስእ ኪድ” ምባል፥ ኣየናይ ይቐልል? “ወዲ ሰብ ግና ኣብ ምድሪ ሓጢኣት ናይ ምሕዳግ ስልጣን ከም ዘለዎ ምእንቲ ኽትፈልጡ” በለ፥ ነቲ መፃጕዕ ሰብኣይ ከዓ “እብለካ ኣለኹ፥ ተስእ፥ ዓራትካ ኣልዒልካ ናብ ገዛኻ ኺድ” በሎ።

ሽዑ ንሽዑ ድማ ኣብ ቅድሚኦም ተሲኡ፥ ዝድቅሰሉ ዝነበረ ዓራቱ ኣልዒሉ፥ ንኣቦና እናኽበረ ናብ ገዛኡ ከደ። ንዅሎም ድማ ምግራም ሓዞም፤ ፍርሓት መሊእዎም ከዓ “ሎሚ ዜደንቕ ነገር ርኢና ኢና” እናበሉ ፥ ንኣቦና ኣኽበሩ።

ኢየሱስ ንሌዊ ፀወዐ

ድሕሪ እዙይ ኢየሱስ ወፂኡ፥ ሌዊ ዝስሙ ተቐባሊ ቐረፅ ኣብ መቐበሊ ቐረፅ ተቐሚጡ እንተሎ ረአዮ። “ተኸተለኒ” ድማ በሎ።

ሌዊ ኸዓ ተሲኡ፥ ኵሉ ነገር ሓዲጉ ተኸተሎ። ሽዑ ሌዊ ኣብ ገዛኡ ንኢየሱስ ዓብዪ ድግስ ገበረሉ፤ ብዙሓት ተቐበልቲ ቐረፅን ካልኦት ሰባትን ድማ ምሳቶም ኣብ ማእዲ ተቐመጡ። እቶም ፈሪሳውያንን ፀሓፍቶምን ግና ንደቀ መዛሙርቱ “ስለ ምንታይ ምስ ተቐበልቲ ቐረፅን ሓጥኣንን ትበልዑን ትሰትዩን?” እናበሉ ኣጕረምረሙ።

ኢየሱስ ድማ “ሓኪም ዘድልዮም ሕሙማት ደኣ እምበር፥ ጥዑያት ኣይኮኑን። ንሓጥኣን ናብ ንስሃ ደኣ እምበር፥ ንፃድቃን ክፅውዕ ኣይመፃእኹን” ኢሉ መለሰሎም።

ብዛዕባ ፆም ዝቐረበ ሕቶ

ንሳቶም ድማ “ደቀ መዛሙርቲ ዮሃንስ መብዛሕቲኡ ጊዜ ይፆሙን ይፅልዩን፥ ከምኡ ኸዓ ደቀ መዛሙርቲ ፈሪሳውያን፤ ናትካ ግና ይበልዑን ይሰትዩን እዮም” በልዎ።

ኢየሱስ ድማ “ነቶም ኣዕሩኽ መርዓዊ፥ መርዓዊ ምሳታቶም እንተሎ፥ ከተፅውሞምዶ ትኽእሉ? እቲ መርዓዊ ኻብኣቶም ዝውሰደሉ መዓልቲታት ግና ክመፅእ እዩ፤ ሽዑ፥ በተን መዓልቲታት እቲኣተን፥ ክፆሙ እዮም” በሎም።

ምስላ ኸዓ ነገሮም፦ “ዋላ ሓደ ኻብ ሓድሽ ክዳን ኵርፊት ቀዲዱ ኣብ ኣረጊት ክዳን ኣይሰፍዮን። እንተ ዘይኮነ፥ ነቲ ሓድሽ ይቐድዶ፤ እቲ ሓድሽ ኵርፊትውን ነቲ ኣረጊት ኣይሰማምዖን። ዋላ ሓደ ድማ ሓድሽ ወይኒ ኣብ ኣረጊት ሓርቢ ወይኒ ኣይገብርን፤ እንተ ዘይኮነ እቲ ሓድሽ ወይኒ ነቲ ሓርቢ ይቐዶ፥ ይፈስስ፥ እቲ ሓርቢ ኸዓ ይጠፍእ። ሓድሽ ወይኒ ደኣ ኣብ ሓድሽ ሓርቢ ወይኒ ክግበር ኣለዎ እምበር። ኣረጊት ወይኒ ዝሰተየ ዋላ ሓደ ድማ ፥ ‘እቲ ኣረጊት ይሓይሽ’ ይብል እዩ እሞ፥ ነቲ ሓድሽ ኣይደልን።”