Jisu pora Tar Poila Chella Khan Ke Matise
Peter pura rati mas dhori kene eku napai, titia Jisu laga kotha te etiya bisi dhore je Tai ke jabole koi. Kushtho bemar thaka ekjon manuh ke Tai chuye. Ekjon lula manuh ke ghor laga chhad pora tola namai diye aru Amar Pitri laga takot pora tai laga paap maph hoi, juntu niyom likha khan ke bisi ghus lagai. Levi tai laga kor luwa jagah chari diye.
5 1Ek dinte, bhir khan amar Pitri laga kotha hunibole Tar usor te thelai thaka homoite, Jisu Gennesaret jhil laga kinar te khara hoi thakise. a a v1 Gennesaret jhil tu Galilee samundar laga dusra nam ase. 2Tar pora jhil laga kinar te duita nao khara thaka dekhise; maas mara manuh khan eitu khan chari kene tarkhan laga jal dhui thakise. 3Nao khan majote ekta, juntu Simon laga ase, eitu te uthi kene, Tar pora Simon ke kinar pora olop dur loi jabole koise, aru bohi kene nao pora bhir khan ke sikhai dise.
4Kotha kowa khotom kori kene, Tar pora Simon ke koise, “Gobhir pani te jabi aru maas dhoribole tumar jal khan phelai dibi.”
5Simon pora jawab dise, “Malik, amikhan pura rati kaam korise aru eku dhoribo para nai. Kintu apuni laga kotha pora, moi jal khan phelai dibo.” 6Eneka kori kene, tarkhan iman bisi maas dhorise je tarkhan laga jal khan phatibole shuru hoise. 7Dusra nao te thaka sathi khan ke modot koribole ahhibole ishara korise; tarkhan ahhi kene duita nao bhorta kori dise, iman tak je nao khan dubi bole shuru hoise. 8Eitu dekhi kene, Simon Peter Jisu laga aathu te giri kene koise, “Moike chari dibi, Probhu, kilemane moi ekjon paapi manuh ase!” 9Kilemane tarkhan pora dhora maas khan dekhi kene, tai aru tar logote thaka sob jon asurit hoi jaise,
10aru eneka James aru John bhi asurit hoise, kun Zebedee laga chokra khan aru Simon laga sathi khan ase. Jisu pora Simon ke koise, “Bhoi na koribi; etiya pora tumi manuh khan dhoribo.”
11Titia tarkhan nao khan kinar te tani kene uthai loise, sob jinis chari kene, Tar piche piche jaise.
Ekjon Manuh Sapha Hoise
12Jisu sheher khan majote ekta te thaka homoite, gaw te biya chamra laga bemar pora bhorta ekjon manuh ahhise. Jisu ke dekhi kene, tai matha niche kori kene giri jaise aru binti korise, “Probhu, jodi apuni itcha ase koile, apuni moike sapha koribo pare.”
13Jisu pora Tar hath age te uthai kene, taike choise: “Moi itcha ase. Sapha hoi ja.” Ekdomte hei chamra bemar tai pora jai jaise.
14Jisu pora taike kun ke bhi nakobole hukum dise, “kintu ja, nijor ke purohit ke dikhai dibi aru tumar sapha hua nimite Moses pora hukum diya jinis khan daan dibi, manuh khan nimite gawahi hoile.”
15Kintu Tar bisoi te kotha aru bhi bisi phailise; dangor bhir khan Tar kotha hunibole aru tarkhan laga bemar pora bhal hobole joma hoise. 16Kintu Jisu bar bar manuh nathaka jagah khan te jai kene prathana korise.
Pitri Laga Pap Maph Koribole Takot
17Ek dinte Tai sikhai thaka homoite, Pharisee khan aru niyom laga sikhok khan bohi thakise, kun Galilee laga sob gaw pora, aru Judea aru Jerusalem pora ahhi kene thakise. Aru bemari khan ke bhal koribole Tar nimite amar Pitri laga takot ta te thakise. 18Thik hei somoite, kunba manuh khan ekjon pangu manuh ke ekta bisna te boji kene anise, taike bhitor te ani kene Jisu age te rakhibole kosis kori thakise. 19Bhir karone taike bhitor anibole rasta napai kene, tarkhan chat uporte uthi jaise aru chat laga tile khan majot pora taike tar bisna sob logote niche phelai dise, thik Jisu age te, majot te.
20Jisu pora tarkhan laga biswas dekhise, titia koise, “Sathi, tumar pap khan tumike maph kori dise.”
21Niyom likha manuh khan aru Pharisee khan kotha patibole shuru hoise, “Eitu manuh kun ase jun Isor ninda kori ase? Isor ekla ke chari kene, kun pap maph koribo pare?”
22Tarkhan ki bhabi thakise janikena, Jisu pora tarkhan ke jawab dise, “Tumikhan nijor mon te kele eneka bhabi ase? 23Kun to aru asan ase: ‘Tumar pap khan tumike maph kori dise,’ kobole, nahole ‘Uthi kene berai ja’ kobole? 24Kintu Manuh laga Putro ke prithibi te pap maph koribole adhikar ase koile tumikhan janibo nimite”—Tai hei pangu manuh ke koise—“Moi tumike koi ase, uthibi, tumar bisna uthai lobi, aru ghor te jabi.”
25Ekdomte tai tarkhan age te khara hoise, tar bisna uthai loise, amar Pitri ke mahima di kene ghor te jaise. 26Asurit pora tarkhan sob ke dhori loise; tarkhan amar Pitri ke mahima dise, bhoi pora bhorta hoi kene, koise, “Aji amikhan asurit kaam khan dekhise.”
Jisu pora Levi Ke Matise
27Eitu pichete, Jisu bahar te ulai jaise aru Levi koi kene mati thaka ekjon kor utha manuh ke kor ghor te bohi thaka dekhise. “Moi laga piche piche ahhibi,” Tai koise.
28Titia Levi uthise, sob jinis chari kene, Tar piche piche jaise. 29Titia Levi pora tar ghor te Jisu nimite ekta dangor bhoj korise, aru kor utha manuh khan aru dusra khan laga dangor bhir tarkhan logote khabole bohise. 30Kintu Pharisee khan aru tarkhan laga niyom likha manuh khan Tar chella khan ke bhirbhir korise, “Tumikhan kele kor utha manuh khan aru paapi khan logote kha aru piya kori ase?”
31Jisu pora tarkhan ke jawab dise, “Bhal thaka manuh ke daktar nalage, kintu bemari khan ke lage. 32Moi dharmik khan ke matibole aha nai, kintu paapi khan ke mon ghurabole matibole ahhise.”
Upwas Kora Bisoi Te Ekta Sawal
33Tarkhan Taike koise, “John laga chella khan bar bar upwas kore aru prathana kore, eneka Pharisee khan laga chella khan bhi, kintu apuni laga khan kha aru piya kore.”
34Jisu pora koise, “Shadi kora chokra tar sathi khan logote thaka homoite, tumikhan tarkhan ke upwas korabole pare? 35Kintu eneka din khan ahhibo jitia shadi kora chokra ke tarkhan pora loi jabo, aru titia, hei din khan te, tarkhan upwas koribo.”
36Tai tarkhan ke ekta dristanto bhi koise: “Kun bhi notun kapor pora ekta tukra phati kene purana kapor te siyai nai. Nahole, tai notun ke bhi phati dibo, aru notun tukra tu purana logote namilibo. 37Kun bhi notun angur ros ke purana chamra laga thola te narakhe; nahole notun angur ros pora thola khan phatai dibo, girai dibo, aru thola khan nostho hoi jabo. 38Nohoi, notun angur ros ke notun chamra laga thola te hi rakhibo lage. 39Aru kun bhi purana angur ros piya pichete notun tu na-itcha kore, kilemane tai koi, ‘Purana tu bhal ase.’”