Ruka 5 FHB Father's Heart Bible™

5 ¹Rimwe zuva, vanhu vazhinji pavakaunganira Jesu vachimutsikirira kuti vanzwe shoko raBaba vedu, akanga amire pedyo neDziva reGenesareti. ^a a v1 Dziva reGenesareti izita rimwe reGungwa reGarirea. ²Akaona zvikepe zviviri zvakamira pedyo nedziva; vabati vehove vakanga vazvisiya vachisuka mimbure yavo. ³Akapinda mune chimwe chezvikepe, chaSimoni, akamukumbira kuti asundire chikepe zvishoma kubva kumahombekombe, akabva agara pasi achidzidzisa vanhu vazhinji ari muchikepe.

⁴Paakapedza kutaura, akati kuna Simoni, “Sundira kumvura yakadzika ugodzikisa mimbure yako kuti ubate hove.”

⁵Simoni akapindura akati, “Tenzi, tashanda usiku hwose asi hatina kubata chinhu. Asi neshoko renyu, ndichadzikisa mimbure.” ⁶Pavakaita izvi, vakabata hove zhinji kwazvo zvokuti mimbure yavo yakatanga kubvaruka. ⁷Vakaninira shamwari dzavo dzaiva mune chimwe chikepe kuti dziuye kuzovabatsira; dzakauya dzikazadza zvikepe zvose zviri zviviri zvokuti zvakatanga kunyura. ⁸Achiona izvi, Simoni Petro akawira pamabvi aJesu akati, “Ibvai kwandiri, Ishe, nokuti ndiri munhu mutadzi!” ⁹Nokuti akanga abatwa nokushamisika, iye navose vaaiva navo, nokuda kwehove dzavakanga vabata,

¹⁰uye saizvozvowo Jakobho naJohani, vanakomana vaZebhedhi, vaibatsirana naSimoni. Jesu akati kuna Simoni, “Usatya; kubva zvino uchabata vanhu.”

¹¹Saka vakakwevera zvikepe zvavo kumahombekombe, vakasiya zvinhu zvose, vakamutevera.

Murume Akanatswa

¹²Jesu paakanga ari mune rimwe ramaguta, kwakauya murume akanga azere nechirwere chakaipa cheganda. Paakaona Jesu, akawira pasi nechiso akakumbira zvikuru achiti, “Ishe, kana muchida, munogona kundinatsa.”

¹³Jesu akatambanudza ruoko rwake, akamubata achiti, “Ndinoda. Natswa.” Pakarepo chirwere cheganda chakabva paari.

¹⁴Jesu akamurayira kuti arege kuudza munhu, achiti, “asi enda, undozviratidza kumupristi ugopa zvakarayirwa naMozisi pamusoro pokunatswa kwako, souchapupu kuvanhu.”

¹⁵Asi shoko pamusoro pake rakanyanya kupararira; vanhu vazhinji vakaungana kuti vamunzwe uye kuti vaporeswe pazvirwere zvavo. ¹⁶Asi Jesu aiwanzoenda kunzvimbo dzakanga dzisina vanhu achinonyengetera.

Simba raBaba Rokukanganwira

¹⁷Rimwe zuva paakanga achidzidzisa, vaFarisi navadzidzisi vomutemo vakanga vagere, vakanga vabva kumisha yose yeGarirea, nokuJudhiya nokuJerusarema. Uye simba raBaba vedu rakanga riripo kuti aporese vairwara. ¹⁸Panguva iyoyo, varume vakauya vakatakura murume akanga akafa mutezo ari pabonde, vachiedza kumupinza kuti vamuvate pamberi paJesu. ¹⁹Vakashaya nzira yokupfuura nayo napakati pavanhu vazhinji kuti vamupinze, vakakwira pamusoro pedenga reimba vakamudzikisa ari pabonde rake napakati pamazenga, pakati pavanhu, pamberi chaipo paJesu.

²⁰Jesu paakaona kutenda kwavo, akati, “Shamwari, zvivi zvako wakanganwirwa.”

²¹Vanyori navaFarisi vakatanga kuita nharo, vachiti, “Ndianiko munhu uyu anotuka Mwari? Ndiani angakanganwira zvivi kunze kwaMwari oga?”

²²Jesu achiziva zvavakanga vachifunga, akavapindura akati, “Munofungireiko mumwoyo yenyu? ²³Ndechipiko chiri nyore: kuti, ‘Zvivi zvako wakanganwirwa,’ kana kuti, ‘Simuka ufambe’? ²⁴Asi kuti muzive kuti Mwanakomana woMunhu ane simba panyika rokukanganwira zvivi”—akati kumurume akanga akafa mutezo—“Ndinoti kwauri, simuka, utore bonde rako, uende kumba.”

²⁵Pakarepo akasimuka pamberi pavo, akatora bonde rake, akaenda kumba achirumbidza Baba vedu. ²⁶Vose vakabatwa nokushamisika; vakarumbidza Baba vedu, vakazara nokutya, vachiti, “Taona zvinhu zvinoshamisa nhasi.”

Jesu Anodana Revhi

²⁷Shure kwaizvozvo, Jesu akabuda akaona muteresi ainzi Revhi akagara pahofisi yemutero. Akati, “Nditevere.”

²⁸Saka Revhi akasimuka, akasiya zvinhu zvose, akamutevera. ²⁹Ipapo Revhi akaitira Jesu mabiko makuru mumba make, uye vateresi vazhinji navamwe vakagara pakudya navo. ³⁰Asi vaFarisi navanyori vavo vakanyunyutira vadzidzi vake, vachiti, “Munodyireiko nokunwa navateresi navatadzi?”

³¹Jesu akavapindura akati, “Havasi vakagwinya vanoda chiremba, asi vanorwara. ³²Handina kuuya kuzodana vakarurama, asi vatadzi kuti vatendeuke.”

Mubvunzo Pamusoro Pokutsanya

³³Vakati kwaari, “Vadzidzi vaJohani vanowanzotsanya nokunyengetera, saizvozvowo vadzidzi vavaFarisi, asi venyu vanodya nokunwa.”

³⁴Jesu akati, “Mungagona here kuita kuti shamwari dzomuwani dzitsanye iye achiri navo? ³⁵Asi mazuva achauya apo muwani achatorwa kwavari, ipapo, mumazuva iwayo, vachatsanya.”

³⁶Akavaudzawo mufananidzo achiti, “Hapana munhu anobvarura chigamba kunguo itsva ndokuchisona panguo tsaru. Kana akadaro, anobvarura nguo itsva, uye chigamba chitsva hachingaenzani netsaru. ³⁷Hapana munhu anoisa waini itsva mumatende matsaru; kana akadaro waini itsva ichaputitsa matende, igodururwa, uye matende achaparara. ³⁸Kwete, waini itsva inofanira kudirwa mumatende matsva. ³⁹Uye hapana munhu anoti anwa waini tsaru achizoda itsva, nokuti anoti, ‘Tsaru yakanaka.’”