Jesũ Eeta Arutwo Aake a Mbere

Petero aroora ũtukũ wothe atekũnyita kĩndũ, ningĩ kiugo-inĩ kĩa Jesũ akĩguucia thamaki nyingĩ ũũ atĩ akĩmũĩra oime harĩ we. Mũndũ wa mangũ akĩhutio. Mũndũ mũkua ciĩga agĩikũrũkio na nyũmba-igũrũ, akĩrekerwo na hinya wa Ithe witũ, ũguo ũgĩtũma arutani a watho makũrwo. Lawi agĩtiga gĩikaro gĩake.

Gĩcunjĩ 5.

Mũthenya ũmwe, rĩrĩa kĩrĩndĩ kĩamũhatĩkĩire nĩguo kĩigue kiugo kĩa Ithe witũ, Jesũ aarũgamĩte hakuhĩ na iria rĩa Genesareti. ^a Na akĩona tũtarũ twĩrĩ tũrũngiĩ hakuhĩ na iria; nao ategi a thamaki nĩmarĩkĩtie kuuma thĩinĩ watuo, magĩthambia mĩtego yao. Agĩtoonya gatarũ kamwe, karĩa kaarĩ ka Simoni, akĩmũũria aiguũrũkie o hanini kuuma hũgũrũrũinĩ, agĩcooka agĩikara thĩ, akĩruta kĩrĩndĩ arĩ gatarũinĩ.

Rĩrĩa aatigire kwaria, akĩĩra Simoni atĩrĩ, “Twara gatarũ kũrĩa kũriku, mũikũrũkie mĩtego yanyu nĩguo mũnyiite thamaki.”

Naake Simoni akĩmũcookeria atĩrĩ, “Mwathi witũ, nĩtũrutĩte wĩra ũtukũ wothe tũtanyiitĩte kĩndũ. No tondũ wa kiugo gĩaku, nĩngũikũrũkia mĩtego.” Maarĩkia gwĩka ũguo, makĩnyiita thamaki nyingĩ mũno o nginya mĩtego yao ĩkĩambĩrĩria gũtarũka. Nao makĩheneria arĩa maarutithanagia wĩra nao marĩ gatarũinĩ karĩa kangĩ moke mamateithie; nao magĩũka makĩiyũria tũtarũ tweerĩ o nginya tũkĩambĩrĩria gũtoboka. Rĩrĩa Simoni Petero oonire ũguo, akĩgwa maruinĩ ma Jesũ, akĩmwĩra atĩrĩ, “Njeherera, Mwathani, nĩgũkorwo niĩ ndĩ mũndũ mwĩhia!” Nĩgũkorwo nĩamakĩte mũno, we na arĩa othe maarĩ nake, nĩ ũndũ wa thamaki iria maanyiitĩte,

o na Jakubu na Johana, aariũ a Zebedi, arĩa maarĩ athiritũ a Simoni, o nao nĩmagegire. Nake Jesũ akĩĩra Simoni atĩrĩ, “Ndũgetigĩre; kuuma rĩu ũgũtegaga andũ.”

Nao maarĩkia gũkururia tũtarũ twao hũgũrũrũinĩ, magĩtiga indo ciothe, makĩmũrũmĩrĩra.

Mũndũ Watherio

Rĩrĩa Jesũ aarĩ itũũra rĩmwe rĩa matũũra macio, hagĩũka mũndũ waiyũrĩtwo nĩ mangũ mooru. Rĩrĩa oonire Jesũ, akĩĩgũithia agĩturumithia ũthiũ thĩ, akĩmũthaitha atĩrĩ, “Mwathani, ũngĩenda, no ũhote kũndheria.”

Nake Jesũ agĩtambũrũkia guoko gwake, akĩmũhutia, akiuga atĩrĩ, “Nĩngwenda. Therio.” O rĩmwe mangũ makĩmweherera.

Nake Jesũ akĩmwatha ndakeere mũndũ o na ũrĩkũ, akĩmwĩra atĩrĩ, “No thiĩ wĩonanie kũrĩ mũthĩnjĩri Ngai, na ũrute iruta rĩrĩa Musa aathanire nĩ ũndũ wa gũtherio gwaku, rĩtuĩke ũira kũrĩ andũ.”

No ũhoro wake ũgĩthiĩ na mbere kũhunja makĩria; nakĩo kĩrĩndĩ kĩnene gĩgĩcookanĩrĩra nĩguo kĩmũigue na kĩhonio mĩrimũ yakĩo. No Jesũ nĩehũũraga kaingĩ, agathiĩ kũndũ gũtarĩ andũ, akahooya.

Hinya wa Ithe witũ wa Kũrekanĩra Mehia

Mũthenya ũmwe rĩrĩa aarutanaga, nĩ kwarĩ na Afarisai na arutani a watho maikarĩte thĩ, arĩa mookĩte kuuma tũtũũra tuothe twa Galili, na kuuma Judea na Jerusalemu. Naguo hinya wa Ithe witũ warĩ ho nĩguo ahonie arĩa aarũaru. Na kahinda o kau, andũ magĩũka makuuĩte mũndũ wakuĩte ciĩga arĩ igũrũ rĩa kĩbarĩ, makĩgeria kũmũtoonyia thĩinĩ nĩguo mamũige mbere ya Jesũ. Na tondũ matiigana kuona njĩra ya kũmũtwara thĩinĩ nĩ ũndũ wa kĩrĩndĩ, makĩhaica nyũmba igũrũ, makĩmũikũrũkĩria arĩ igũrũ rĩa kĩbarĩ gĩake, agereire mũanya wa nyũmba igũrũ, o gatagatĩ, mbere ya Jesũ.

Rĩrĩa Jesũ oonire wĩtĩkio wao, akiuga atĩrĩ, “Mũrata wakwa, mehia maku nĩmarekanĩirwo.”

Nao aandĩki a watho na Afarisai makĩambĩrĩria gũkararania, makĩĩyũria atĩrĩ, “Mũndũ ũyũ nũũ ũraruma Ngai? Nũũ ũngĩhota kũrekanĩra mehia tiga o Ngai wiki?”

Nake Jesũ, tondũ nĩamenyire ũrĩa meeciiragia, akĩmacookeria atĩrĩ, “Mũreeciiria atĩa ngoroinĩ cianyu? Nĩ ũrĩkũ ũhũthũ makĩria: kuuga, ‘Mehia maku nĩmarekanĩirwo,’ kana kuuga, ‘Ũkĩra ũthiĩ’? No nĩguo mũmenye atĩ Mũrũ wa Mũndũ arĩ na ũhoti gũkũ thĩ wa kũrekanĩra mehia” — akĩĩra mũndũ ũcio wakuĩte ciĩga — “ngũkwĩra, ũkĩra, ooya kĩbarĩ gĩaku, ũthiĩ mũciĩ.”

O rĩmwe akĩrũgama mbere yao, akĩoya kĩbarĩ kĩrĩa aakomeete igũrũ rĩakĩo, agĩthiĩ mũciĩ akĩgoocaga Ithe witũ. Nao othe makĩgega mũno; makĩgooca Ithe witũ, maiyũrĩtwo nĩ guoya, makiuga atĩrĩ, “Ũmũthĩ nĩtuonete maũndũ ma magegania.”

Jesũ Eeta Lawi

Thuutha wa maũndũ macio, Jesũ akiuma nja, akĩona mũtozi wa mbeeca wĩtagwo Lawi aikarĩte harĩa heetagĩrwo mbeeca cia igooti, akĩmwĩra atĩrĩ, “Nũmĩrĩra.”

Nake Lawi agĩũkĩra, agĩtiga indo ciothe, akĩmũrũmĩrĩra. Na rĩĩrĩ, Lawi akĩrugĩra Jesũ iruga inene gwake mũciĩ, na gĩkundi kĩnene kĩa atozi a mbeeca na andũ angĩ magĩikara methainĩ hamwe nao. No Afarisai na aandĩki a watho ao makĩnuguna, makĩĩra arutwo aake atĩrĩ, “Nĩkĩĩ mũrĩĩanagĩra na mũkanyuuanĩra na atozi a mbeeca o na ehia?”

Nake Jesũ akĩmacookeria atĩrĩ, “Ti arĩa agima a mĩĩrĩ mabataire nĩ ndagĩtarĩ, no nĩ arĩa arũaru. Niĩ ndiũkire gwĩta arĩa athingu, no nĩ ehia nĩguo merire.”

Kĩũria Gĩkoniĩ Kwĩhinga Kũrĩa Irio

Nao makĩmwĩra atĩrĩ, “Arutwo a Johana nĩmehingaga kũrĩa irio kaingĩ na makahooya, o na arutwo a Afarisai no taguo, no aku nĩmarĩĩaga na makanyua.”

Nake Jesũ akĩmeera atĩrĩ, “Mũngĩhota kũiguithia arata a mũhikania mehinge kũrĩa irio rĩrĩa arĩ hamwe nao? No nĩgũgaakinya matukũ marĩa mũhikania akeeherio kũrĩ o, nao matukũinĩ macio nĩmakeehinga kũrĩa irio.”

Ningĩ akĩmahe ngerekano, akĩmeera atĩrĩ, “Gũtirĩ mũndũ ũtarũraga kĩraka kuuma nguoinĩ njerũ agĩgĩtumĩrĩra nguo ngũrũ. Angĩka ũguo-rĩ, nĩatarũra nguo ĩrĩa njerũ, nakĩo kĩraka kĩu kĩerũ gĩtingĩiganĩra na nguo ĩrĩa ngũrũ. Na gũtirĩ mũndũ ũĩkagĩra ndibei njerũ mondoinĩ ngũrũ cia njũa; angĩka ũguo, ndibei ĩrĩa njerũ nĩĩtũrĩkangia mondo icio, ĩgaitĩka, nacio mondo cia njũa ikaanangĩka. Aca, ndibei njerũ no nginya ĩĩkĩrwo mondoinĩ njerũ cia njũa. Na gũtirĩ mũndũ ũrĩa anyuĩte ndibei ngũrũ wendaga ĩrĩa njerũ, nĩgũkorwo oigaga atĩrĩ, ‘Ĩrĩa ngũrũ nĩ njega.’”