Kuurei Jeso Kasubikyik che Tai
Ki yai Petero poisyet kemoi komugul ak ma kinam kiy, yetyo konam njireenik che chaang' eng' ng'olyootap Jeso agoi kosoom kole koistoegei. Ki took chii ne tinyei mogondosaik. Ki roong'ji chii ne meiyotiin poorwek kobun kooriik parak ak kenyoiywei ng'oogik eng' kamuktaetap Kwandanyo, ne inyaliil soopik. Ki isto Lawi ole tebee.
5 1Ye kinamgei tuiyet ineendet si kogas ng'olyootap Kwandanyo, ki tonone Jeso ngeguutap araraita ne po Genesaret. a a v1 Araraita ne po Genesaret ko kainet age ne po araraita ne po Galilaya. 2Ki keer moinik aeng' che tononi ngeguutap araraita; ki kagopagaakta ramiigap njireenik icheek ak ki kiuunse regereiywekwak. 3Ki lany ineendet moinget age, ne po Simion, ak kosoom kole koistoegei kitigin kobun ngeguut; yeityo kotep ng'wony ak koneetis tuiyosyek kobun moinget.
4Ye kingo ges ng'alaalet, ki leenji Simion, “Iwe oldap peek che loo ak iitu regereiywekuk si inam.”
5Kowol Simion kole, “Masta, ki kiyai poisyet kemoi komugul ak ki ma kinam kiy. Ago eng' ng'olyoong'ung', aitu regereiywek.” 6Kingo yai nooto, ki nam icheek njireenik che chaang' miising' kot kotoi kogereeris regereiywekwak. 7Ki boorchi partikwak che mi moinget age kole kobwa kotoret; ki pwa ak koityi moinik tugul aeng' kot kotoi koba ng'wony. 8Ye kingo keer Simion Petero nooto, ki but eng' kutung'oigap Jeso ak kole, “Ibagachwo, Kiptaiyat, amu aa chiito ne tengekto!” 9Amu ki nam kwong'indo ineendet ak icheek tugul che ki mi kobooto, agobo njireenik che ki kinam,
10ak ko uu nooto Jakobo ak Johana, weeriigap Zebedayo che ki po partigap Simion. Ki leenji Jeso Simion, “Amat iywei; kobootee nguno ko tuun inamei piik.”
11Kingo nooto, ki itogoste icheek moinikwak parak eng' ngeguut, ak kobagaakta tuguuk tugul, ak koosup ineendet.
Chii ne Kagetiliilit
12Ye kimi Jeso nganaseet age, ki nyo chiito ne ki kotuch mogondosaik che yaacheen. Ye kingo keer Jeso, ki but taiywet ng'wony ak kosoomei, “Kiptaiyat, ngot icham, imuuchi itiliilo.”
13Ki rooch Jeso eunnyi, koting'e ineendet, kole, “Achame. Itiliil.” Ak koma tyanit komanda mogondosaik ineendet.
14Ki ng'at Jeso ineendet kole matinye chii ne imwachini, “ago iwe iboorchigei tisiindet, ak iib tiseiywotap katiliileng'ung' ne ki kong'at Musa, si koboorchi piik.”
15Ago ki testai koeet ng'olyoot agobo ineendet; ki yumjigei tuiyosyek che eecheen si kogas ineendet ak kisoop eng' myanwogikwak. 16Ago ki istoegei Jeso konyil che chaang' koba surkwen ak kosa.
Kimnateetap Kwanda ne po Nyoeet
17Ki peetuut age ye kineetisyei, ki tebi Pharisaik ak kaneetisyogap Ng'atuutyet, che ki pwa eng' nganasosyek tugul che po Galilaya, ak eng' Judea ak Jerusalem. Ak ki mi olooto kimnateetap Kwandanyo si kosoop che myandos. 18Ye kita nooto, ki pwa murenik koip chiito ne meiyot poorweenyi eng' itoget, kotyem konyoonu ko ak koota taitap Jeso. 19Kingo ma konyoor ooreet ne kinyoonu ineendet ko amu tuiyet, ki togosta paragutap koot ak ki choortae ineendet eng' itogunnyi kobun magatinwek, kwenut, taitap Jeso.
20Ye kingo keer Jeso kayanennywa, kole, “Chorwennyu, kagonyoeen tengekwogik.”
21Ki toi sandaanik ak Pharisaik koteebutyei, “Ng'oo chiini ne churachuri Kamuktaindet? Ng'oo ne imuuchi konyoe tengekwogik ago ma Kamuktaindet keny?”
22Kingo nai Jeso bwaatutikwak, kowolji icheek kole, “Amu nee si obwaati eng' mugulelwekwok? 23Nee ne nyumnyum: kole, ‘Kagonyoeen tengekwogik,’ anan kole, ‘Ng'eet ak iwe’? 24Ago si onai kole tinyei Weeriitap chii kimnateet eng' ng'wony si konyoe tengekwogik”—ki leenji chiito ne meiyot poorweenyi—“Amwaun ale, ng'eet, iip itogung'ung', ak iwe koong'ung'.”
25Ak koma tyanit kong'eet taitap icheek, koip itogunnyi, ak kwo koonnyi kotoroori Kwandanyo. 26Ki nam kwong'indo icheek tugul; kotoroori Kwandanyo, konyoor kaiyweisyet, kole, “Kagogeer tuguuk che kwong'onot raini.”
Kuurei Jeso Lawi
27Letap nooto, ki mong' Jeso saang' ak kogeer taagindetap aisuruut ne kiguure Lawi, kotebi eng' oldap yumisyetap taak. Kole, “Asuben.”
28Kingo nooto, ki ng'eet Lawi, kobagaakta tuguuk tugul, ak koosup ineendet. 29Yeityo ki yachi Lawi Jeso saikyet ne oo eng' koonnyi, ak ki tep ng'wony kobooto icheek tuiyet ne oo ne po taagigap aisuruut ak alak. 30Ago ki ng'uunoor Pharisaik ak sandaanikwak kasubikyik, kole, “Amu nee si oame ak oee kobooto taagigap aisuruut ak kiptengeginik?”
31Kowolji Jeso icheek kole, “Ma mache chamindet icheek che koboiyot, ago che myandos. 32Ma anyo aguur che po imanda, ago kiptengeginik si kosik.”
Teebutyet agobo Rugutkeiyet
33Ki leenji ineendet kole, “Irugutkei kasubigap Johana konyil che chaang' ak kosa, ko uu nooto kasubigap Pharisaik, ago icheek cheguuk koamei ak koeei.”
34Kole Jeso, “Imuuchi oyai chorweetap manong'otyot koirugutkei ye kimi kobooto icheek? 35Ago bwonei peetuusyek ye kiisto manong'otyot eng' icheek, yeityo, eng' peetuusyechooto, koirugutkei icheek.”
36Ki mwachi icheek kalewenet kora, kole, “Ma mi chii ne gereer kiyogit eng' ngoryeet ne leel ak kotuiyo eng' ne oo. Angot ko uu nooto, kogereer ngoryeet ne leel, ak ma kerategei kiyogitap ne leel ak ne oo. 37Ma mi chii ne inde divai ne leel eng' lolotinwek che oosen; angot ko uu nooto, koputi divai ne leel lolotinwek, kotumda, ak kobetak lolotinwek. 38Acha, nyolu kiroong'ji divai ne leel eng' lolotinwek che leel. 39Ak ma mi chii ne kagoee divai ne oo ne mache ne leel, amu kole, ‘Myee ne oo.’”