عيسىٰ خپل اول مريدان راوبلل

پطروس ټوله شپه کب نیسي او هېڅ نه نیسي، بیا د عيسىٰ په خبره دومره کبان راکاږي چې له هغه غوښتنه کوي چې لاړ شي. یو جذامي سړی لمس کېږي. یو شل سړی له چت څخه ښکته کېږي او زموږ د پلار په قدرت بخښل کېږي، چې شریعت پوهان پرې سخت خوابدي کېږي. لاوی خپل ګمرکي ځای پرېږدي.

څپرکی 5.

يوه ورځ چې کله خلق د پلار کلام اورېدلو دپاره د عيسىٰ نه چاپېره راټول شول او په هغۀ باندې راتاؤ شول، نو هغه د ګنيسرت د جهيل په غاړه ولاړ وو. ^a هغۀ د جهيل په غاړه دوه کشتۍ ولاړې وليدې، چې ماهى نيوونکو پرېښى وې او خپلې جالونه يې پرېمينځل. هغه په يوه کشتۍ کښې چې د شمعون وه کښېناستو او هغۀ ته يې ووئيل چې لږ د غاړې نه اوبو ته يې بوځى، بيا کښېناستو او د کشتۍ نه يې خلقو ته تعليم ورکولو.

کله چې هغۀ خبرې ختمې کړې، نو شمعون ته يې وفرمائيل چې، ”کشتۍ ژورو اوبو ته بوځه او د ماهيانو نيولو دپاره خپلې جالونه وغورځوه.“

شمعون جواب ورکړو چې، ”اُستاذه، مونږ ټوله شپه محنت وکړو خو هيڅ مو ونۀ نيول. خو ستا د وينا په سبب، زۀ جالونه غورځوم.“ کله چې هغوئ داسې وکړل، نو دومره ماهيان يې ونيول چې د هغوئ جالونه شلېدل. نو هغوئ خپلو ملګرو ته چې په بله کشتۍ کښې وُو اشاره وکړه چې راشى او مرسته يې وکړى. هغوئ راغلل او دواړه کشتۍ يې داسې ډکې کړې چې ډوبېدلو ته نژدے شوې. کله چې شمعون پطروس دا وليدل، نو د عيسىٰ په ګونډو راپرېوتو او ورته يې ووئيل چې، ”اے مالِکه، ما نه بېل شه، ځکه چې زۀ يو ګناهګار سړے يم!“ ځکه چې هغه او د هغۀ ټول ملګرى د نيولو شوو ماهيانو په ليدو حېران شول،

او هم داسې يعقوب او يوحنا چې د زبدى زامن او د شمعون ملګرى وُو، هم حېران شول. عيسىٰ شمعون ته وفرمائيل چې، ”مۀ يرېږه، له دې نه به پس تۀ انسانان نيسې.“

نو هغوئ خپلې کشتۍ غاړې ته راوکښلې، هر څۀ يې پرېښودل او د هغۀ مريد شول.

يو سړے پاک کړے شو

کله چې عيسىٰ په يو ښار کښې وو، نو يو داسې سړے راڅرګند شو چې په سخت جذام اخته وو. کله چې هغۀ عيسىٰ وليدو، نو په مخ راپرېوتو او عرض يې وکړو چې، ”اے مالِکه، کۀ تۀ غواړې، نو تۀ ما پاک کولے شې.“

عيسىٰ خپل لاس وغزولو، هغه يې لمس کړو او وفرمائيل يې چې، ”زۀ غواړم. پاک شه.“ نو سمدستى جذام ترې لاړو.

عيسىٰ هغۀ ته حُکم ورکړو چې چا ته ونۀ وائى، ”خو لاړ شه، خپل ځان کاهن ته وښايه او د خپل پاکوالى دپاره هغه نذرانه وړاندې کړه چې موسىٰ حُکم کړے دے، د خلقو دپاره د ثبوت په طور.“

خو د هغۀ د باب خبر لا زيات خور شو. ډېر خلق راټولېدل چې د هغۀ خبرې واورى او د خپلو ناروغيو نه روغ شى. خو عيسىٰ اکثر يوازې ويرانو ځايونو ته لاړ شى او دُعا به يې کوله.

د معافۍ دپاره د پلار قدرت

يوه ورځ چې کله هغۀ تعليم ورکولو، نو فريسيان او د شريعت اُستاذان ناست وُو چې د ګليل د هرې کلى نه او د يهوديې او يروشلم نه راغلى وُو. او د پلار قدرت هلته وو چې هغه ناروغان روغ کړى. هم هغه وخت څو سړى يو شل سړے په کټ راوړلو، او کوشش يې کولو چې هغه دننه راولى او د عيسىٰ مخکښې يې کښېږدى. کله چې هغوئ ته د خلقو د ازدحام په وجه دننه راوستلو هيڅ لار ونۀ موندله، نو هغوئ بام ته وختل او هغه يې په خپل کټ باندې د خښتو د منځ نه راکوز کړو، د خلقو منځ ته، همدا د عيسىٰ مخکښې.

کله چې عيسىٰ د هغوئ ايمان وليدو، نو وفرمائيل يې چې، ”اے يارانو، ستا ګناهونه درته معاف کړے شول.“

نو شرعى عالمان او فريسيان بحث شروع کړو چې، ”دا څوک دے چې په خُدائ پاک باندې کفر وائى؟ د يوازې خُدائ پاک نه بغير څوک ګناهونه معافولے شى؟“

عيسىٰ چې د هغوئ د زړونو خيالونه پوهېدو، نو جواب يې ورکړو چې، ”تاسو په خپلو زړونو کښې ولې داسې سوچ کوئ؟ کوم شے اسان دے، دا وئيل چې، ’ستا ګناهونه درته معاف شول،‘ کۀ دا وئيل چې، ’پاڅه او ګرځه‘؟ خو دې دپاره چې تاسو پوه شئ چې اِبن آدم ته په زمکه باندې اختيار دے چې ګناهونه معاف کړى“— هغۀ هغه شل سړى ته وفرمائيل —”زۀ درته وايم، پاڅه، خپل کټ واخله او کور ته لاړ شه.“

نو سمدستى هغه د هغوئ مخکښې ولاړ شو، خپل کټ يې واخستو او د پلار لوئى بيانوونکے کور ته لاړو. نو ټول حېران شول. هغوئ د پلار لوئى بيانوله او د ويرې نه ډک شول او وې وئيل چې، ”مونږ نن عجيب شيان وليدل.“

عيسىٰ لاوى راوبللو

د دې نه پس، عيسىٰ بهر لاړو او يو محصول راټولوونکے يې وليدو چې نوم يې لاوى وو، د محصول په دفتر کښې ناست وو. هغۀ ورته وفرمائيل چې، ”زما مريد شه.“

نو لاوى پاڅېدو، هر څۀ يې پرېښودل او د هغۀ مريد شو. بيا لاوى د عيسىٰ دپاره په خپل کور کښې يو لوئ دعوت ورکړو، او د محصول راټولوونکو او نورو خلقو يو لوئ ګڼ هجوم د هغوئ سره په دسترخوان ناست وو. خو فريسيانو او د هغوئ شرعى عالمانو د هغۀ مريدانو ته ګيله وکړه چې، ”تاسو د محصول راټولوونکو او ګناهګارانو سره ولې خورئ او څښئ؟“

عيسىٰ هغوئ ته جواب ورکړو چې، ”روغ خلق نه خو ناروغ خلق طبيب ته محتاج وى. زۀ د صادقانو راوبللو دپاره نۀ يم راغلے، بلکې د ګناهګارانو، چې هغوئ توبه وباسى.“

د روژې په حقله يو سوال

هغوئ هغۀ ته ووئيل چې، ”د يوحنا مريدان اکثر روژه نيسى او دُعا کوى، او هم داسې د فريسيانو مريدان، خو ستا مريدان خورى او څښى.“

عيسىٰ وفرمائيل چې، ”آيا تاسو د زوم ملګرى داسې روژه نيولے شئ چې کله زوم د هغوئ سره وى؟ خو داسې ورځې به راشى چې کله زوم د هغوئ نه بوتلے شى، نو بيا، په هغو ورځو کښې، به هغوئ روژه نيسى.“

هغۀ هغوئ ته يوه مِثال هم وفرمائيل چې، ”هيڅوک د نوې جامې نه ټُکړه نۀ شلوى چې په زړه جامه يې وګنډى. که نه، نو هغه نوې جامه شلوى، او نوے ټُکړه د زړې جامې سره نۀ جوړېږى. هيڅوک نوے شراب په زړو مشکونو کښې نۀ اچوى، که نه، نو نوے شراب به مشکونه وچوى، شراب به توئ شى او مشکونه به خراب شى. نه، بلکې نوے شراب په نوو مشکونو کښې اچول په کار دى. او هيڅوک د زړو شرابو د څښلو نه پس نوے نۀ غواړى، ځکه چې هغه وائى چې، ’زاړۀ ښۀ دى.‘“