Keyoom Weeriit eng' Surkwen
Koamei rubeet ye po peetuusyek artam, kowolji Jeso Setani kobun siruutyet: ikony Kwandang'ung' kityo. Eng' sinagogit ne po nganasennyi kosomei Isaiah ne kagoit rani, ak komachei tuiyenooto agenge koisto ineendet kong'eetee parak po tulweet. Eng' olennywo alak konamei tamirmiryek kainennyi ak kosilji icheek, ak kagibokto che miyandos.
4 1Kaweekyigei Jeso eng' Jordan, ko kaat Kabuuset ne Tiliil, ak ki imutyi Kabuuset eng' surkwen. 2Peetuusyek artam, koyomei Setani; ki ma am kiy age tugul eng' peetuusyechooto; ak ye kingo ibata, koamei rubeet.
3Koleenji Setani, “Ngot ii Weeriitap Kamuktaindet, imwachi koita ni koek amdit.”
4Kowolji Jeso koleenji, “Ki kisir, ‘Ma sabei chii eng' amdit kityo.’”
5Ki itogosta anyun Setani ineendet, ak koboorchi laitornatosyek tugul che po ng'wony eng' sait age. 6Koleenji, “Agoonin kimnateet ni tugul ak toroornatennywa, amu ki kagoochi anee, ak agoite ne achame age tugul. 7Ngot anyun ikony anee, koek tugul cheguuk.”
8Kowolji Jeso koleenji, “Ki kisir, ‘Ikony Kwandang'ung', ak ipoisyechi ineendet kityo.’”
9Ki imut anyun ineendet Jerusalem, ak koitoi parak ne po Hekaluut, ak koleenji, “Ngot ii Weeriitap Kamuktaindet, iwirtogei ng'wony eng' yu, 10amu ki kisir, ‘Ing'ate angeennyi agobo inyee, koriip inyee,’ 11ak ‘Eng' eunekwak kotokyin inyee, si matoitu keldang'ung' eng' koita.’”
12Kowolji Jeso koleenji, “Ki kile, ‘Matotyeme Kwandang'ung'.’”
13Ak ye kingo kagobata Setani yoomseet age tugul, kobagaakta ineendet agoi sait age.
Kaweekyigei Weeriitap Kwanda eng' Kimnateet
14Kagoweek Jeso Galilaya eng' kimnateetap Kabuuset ne Tiliil, ak ki saang'at logoiywek agobo ineendet eng' emet komugul. 15Ak koneetis eng' sinagogisyekwak, ak ki itoroor tugul ineendet.
16Ki nyo Nazareth, ole ki kigoyeech, ak ko uu pitennyi, kowo sinagogit oriit ye kibetut ne po sabato, yeityo kotonon kosoman. 17Ki kigoochi bukuitap maotyot Isaiah, ak koyaat, ak konyoor ole ki kisir:
18“Mi anyiny Kabuusetap Kwandanyo, amu ki kagoilda anee si amdaati logoiywek che myee che po poorto. Ki yookto anee si amdaati katyagnatet che po luulenik, ak si koger kogeny che koraat, si atyach che negitotin, 19si amdaati kenyiit ne po myeeindap Kwandanyo.” a a v19 Ipwaati Kenyiitap Jubilii — ye ki kesaach lenuutik, ak kityach luulenik, ak kiweekyi piik emennywa.
20Ki ireek bukuit, ak koweekyi otwogindet, ak kotebee ng'wony. Ki ngerenotos ineendet konyegap piik tugul che mi sinagogit oriit.
21Ak kotoi komwachi icheek koleenji, “Kagosulda rani siruutyoni eng' iituguk.”
22Ki mwa tugul ng'aleek che myee agobo ineendet, ak ki kwong'yo agobo ng'aleek che po myeeindo che mang'une kutinnyi, ak ki le, “Tos ma ni weeriitap Joseph?”
23Koleenji icheek, “Imachalda omwaiwo kalewenoni, ‘Ee cheepsabindet, isaabgei inyee.’ Iyai yu agine eng' emeng'ung', ko uu tugul che kigegas ki kiyai Kapernaum.” 24Ak koleenji, “Amwaiwok iman ale, ma mi maotyot age tugul ne kichamei eng' emennyi. 25Ago amwaiwok iman ale, ki chaang' mosoogik che ki menye Israel eng' peetuusyegap Elijah, ye kiger kipsengwet kenyiisyek somok ak arawek lo, ak ki piit rubeet ne oo eng' emet komugul, 26ak ki ma kiyookto Elijah age tugul eng' icheek, kobatee mosoget age ne mi Sarepat ne po Sidon. 27Ki chaang' che ki tinyei mogondosaik eng' Israel eng' peetuusyegap maotyot Elisha, ago ma kitiliil age tugul kobatee Naaman ne Syriaindet.”
28Ye kingo kagas tuguuchu, konereech tugul che mi sinagogit oriit. 29Ki ng'eetyo, ak ki imaande ineendet saang' eng' nganaseet, ak ki imut agoi ngeguutap tulweet ne ki teech nganasennywa, si kowiirtoe ng'wony. 30Ago ki landa ineendet kwenutap tuiyosyek ak kwo.
Silemei Jeso Tamirmiryet ne Murwoon
31Ki wo Kapernaum, nganaseetap Galilaya, ak koneetis icheek ye kibetut ne po sabato, 32ak ki kwong'yo agobo kaneetisyennyi, amu ki tinyei ng'olyoondennyi kimnateet. 33Ki mi sinagogit oriit chii ne ki tinyei sabeetap oindet ne murwoon; ki wirwirto eng' kutit ne oo, 34Aa! Nee ne ki acheek ak inyee, Jeso ne po Nazareth? Konu si iwong'ech? Angen ne ii—Ne Tiliil ne po Kamuktaindet.
35Ago ki ker kong' Jeso oindonooto, kole, “Siis, imanda eng' ineendet!” Ki wiirtoe oindet ineendet ng'wony eng' tainnywa tugul, ak komanda, ak ki ma koyachi ineendet kiy age tugul ne ya.
36Ki kwong'yo tugul, ak ki teebe age ak age, “Nee ng'olyoondoni? Ng'atei tamirmirik che murwonen eng' kimnateet ak kamuktaet, ak komanda!” 37Ak ki saang'at logoiywek agobo ineendet eng' olooniik tugul che negitotin.
Saabei Kwanda Kobun Weeriinnyi
38Ak ki ng'eet eng' sinagogit, ak kowo kootap Simion. Ki myani kametap kwondap Simion kolalee maat ne oo, ak ki soomei ineendet si kotoret ineendet. 39Ki tonityigei ineendet ak kokergong' maat; ak kisoop ineendet, ak kong'eet eng' yooto ak kotoi koboisyechi icheek. 40Ye kingo top asiista, ki ib piik tugul che ki tinyei che myandos eng' myanwek che teerchiin ole mi ineendet; ak ki inde eunekyik parak ne po age tugul, kosoop icheek. 41Komanda oik agine eng' che chaang', kowaachei koleen, “Inyee Weeriitap Kamuktaindet!” Ki silem icheek, koma chamji kong'alaal, amu ki ingen kole ko ineendet Kristo.
42Ye kingo choru asiista, komong' ak kwo ole komosin. Ki cheeng'e tuiyosyek ineendet, ak kobwonji, ak komachei koger si koma kobagaakta icheek.
43Ago koleenji icheek, “Anyool aamdaati logoiywek che myach ap laitornatetap Kwandanyo eng' nganasook alak agine—amu nooto ko kiit ne ki iyookto anee.”
44Ak ki amdaati eng' sinagogisyegap Judea.