Iyookto Kwanda Tuugeennyi
Ki aamwa Johana logoiywek eng' surkwen, ak kiteebe kogeny piik kole kiyai nee iman: koeng'ji age ne tinyei sumotik aeng', amat kenemchi piik ne siirei, amat keyoor tuguuk. Ki mwa tengektap Herod ak kigoito kapkorotyit amu niito. Ki kibatisanei Jeso among piik tugul, ak kole Kwandanyi ko ineendet Weeriinnyi ne achame.
Ng'alaali Kwandanyo eng' mustari 22
3 1Eng' kenyiit ne po taman ak muut eng' laitornatetap Tiberio Kaisar, ye ki pounindetap Judea Pontio Pilato, ak ki laitoryatap Galilaya Herod, ak Philipu tupchennyi ko laitoryatap emetap Ituraya ak Trakoniti, ak Lisania ko laitoryatap Abilene, 2Eng' peetuusyegap tisiik che eecheen Annas ak Caiaphas, ko ki nyo ng'olyootap Kwandanyo Johana weeriitap Zekariah eng' surkwen. 3Ki wo eng' emetap Jordan komugul, koamdaati kabatisanet ne po siguunet si konyochini kaat tengekwogik, 4Ko uu ye ki kisir ng'aleegap maotyot Isaiah eng' bukuit, koleen: “Tuugeetap chii ne kuursei eng' surkwen: Ochop ooreetap Kiptaiyat, olitiit ortinwekyik. 5Tuun kiloong'u atebweet age tugul, ak kiripribi tulweet age tugul ak toorwet. Koek ortinwek che kunuuren kolitiit, ak ortinwek che sing'ortot koek che tiliileen, 6ak keer piik tugul yetunetap Kwandanyo.”
7Koleenji anyun Johana tuiyosyek che bwonjin kabatisanennyi: “Lagogap erenook! Ng'oo ne ki iteiywok si omwechigei piruutyet ne nyoonei? 8Oii anyun logoek che nyoljin siguunet. Omotoi omwachigei, ‘Kitinyei Abraham kwandanyo.’ Amu amwaiwok, imuuch Kwandanyo koisto lagok che po Abraham eng' koik chu. 9Kagiting'e agot nguno aiywet tigitigap keetiik; keetit age tugul ne ma iyei logoek che myach ko keebei ak kewiirchi eng' maat.”
10Ak kiteebe ineendet tuiyosyek, koleenji, “Nee anyun ne keyae?”
11Kowolji koleenji, “Age tugul ne tinyei ngoroik aeng', kogochi ne ma tinyei; ak ne tinyei amitwogik, koyai ko uu nooto.”
12Kibwa kora taagigap aisuruut kabatisanennyi, ak koleenji, “Ee neetindet, nee ne keyae?”
13Koleenji, “Omonem aisuruut ne siire ne king'atin.”
14Ak kiteebe ineendet kora murenigap lugeet, koleenji, “Ak echeek—nee ne keyae?” Koleenji, “Omopwoon chii age tugul eng' kimnateet anan eng' charunee che lembech; omyeeit eng' melektang'wong'.”
15Ki igen piik, ak koigagei tugul eng' muguleldanywa ngo imuuch koek Johana ineegei Kristo. 16Kowolji Johana icheek tugul, koleenji, “Abatisanak anee eng' peek. Ago nyoonei ineendet ne kiim kosiiro—ma nyoljino atyach anoogap kweonikyik. Ineendet ko ibatisanook eng' Kabuuset ne Tiliil ak eng' maat. 17Tinyei keibennyi eng' eunnyi, si kotilil rwanyutennyi komyee, ak koyum chogennyi nganuuk, ago kobeel meteteek eng' maat ne ma imisoksei.”
18Ak eng' ng'aleek alak che chaang' che ng'uunet, koamdoi Johana logoiywek che myach piik. 19Ago ki ng'uunji Johana Herod laitoryat agobo Herodia, osotyotap tupchennyi, ak agobo tuguuk tugul che yaach che ki yai Herod, 20Kotes Herod niito eng' tuguuk alak tugul: ki uut Johana eng' kaptoreet.
Kuurei Kwanda Weeriinnyi kole Chamanennyi
21Ye kingo kabatisan piik tugul, kibatisan kora Jeso. Ye kingo saaei, kiyaatiisyei kipsengwet,
22ak kochorchingei Kabuuset ne Tiliil ko uu poortap cheptuget. Ak konyo kutit kobun kipsengwet, kole, “Inyee Weeriinnyu chamanennyu; agasenengei eng' inyee.”
23Ki tinyei Jeso kenyiisyek che bo sosom noto ye kingo tou poisyennyi. Ki weeriitap Joseph, ko uu ye ki kibwaate piik, ne ki weeriitap Heli, 24weeriitap Mattat, weeriitap Lawi, weeriitap Melki, weeriitap Janai, weeriitap Joseph, 25weeriitap Matatia, weeriitap Amos, weeriitap Nahum, weeriitap Esli, weeriitap Naggai, 26weeriitap Maat, weeriitap Matatia, weeriitap Semein, weeriitap Josek, weeriitap Joda, 27weeriitap Joanan, weeriitap Resa, weeriitap Zerubabel, weeriitap Shealtiel, weeriitap Neri, 28weeriitap Melki, weeriitap Addi, weeriitap Kosam, weeriitap Elmadam, weeriitap Er, 29weeriitap Joshua, weeriitap Elieser, weeriitap Jorim, weeriitap Mattat, weeriitap Lawi, 30weeriitap Simion, weeriitap Judah, weeriitap Joseph, weeriitap Jonam, weeriitap Eliakim, 31weeriitap Melea, weeriitap Mena, weeriitap Matata, weeriitap Nathan, weeriitap Daudi, 32weeriitap Jesse, weeriitap Obed, weeriitap Boaz, weeriitap Salmon, weeriitap Nason, 33weeriitap Aminadab, weeriitap Admin, weeriitap Arni, weeriitap Hesron, weeriitap Peres, weeriitap Judah, 34weeriitap Jakobo, weeriitap Isak, weeriitap Abraham, weeriitap Tera, weeriitap Nahor, 35weeriitap Serug, weeriitap Reu, weeriitap Peleg, weeriitap Eber, weeriitap Shelah, 36weeriitap Kenan, weeriitap Arbaksat, weeriitap Shem, weeriitap Noah, weeriitap Lamek, 37weeriitap Methuselah, weeriitap Enok, weeriitap Jared, weeriitap Mahalalel, weeriitap Kenan, 38weeriitap Enosh, weeriitap Seth, weeriitap Adam, weeriitap Kwandanyo.