Luka 3

3 ¹Katika mwaka wa kumi na tano wa utawala wa Kaisari Tiberio, Pontio Pilato alipokuwa liwali wa Uyahudi, Herode akiwa mtawala wa robo ya Galilaya, na Filipo nduguye akiwa mtawala wa jimbo la Iturea na Trakoniti, na Lisania akiwa mtawala wa Abilene, ²wakati wa ukuhani mkuu wa Anasi na Kayafa, neno la Baba yetu likamjia Yohana mwana wa Zakaria huko nyikani. ³Akaenda katika nchi yote iliyo kando ya Yordani, akihubiri ubatizo wa toba kwa ajili ya ondoleo la dhambi, ⁴kama ilivyoandikwa katika kitabu cha maneno ya nabii Isaya: "Sauti ya mtu aliaye nyikani: Itengenezeni njia ya Bwana, yanyoosheni mapito yake. ⁵Kila bonde litajazwa, na kila mlima na kilima kitashushwa. Njia zilizopotoka zitanyooshwa, na zilizoparuza zitalainishwa, ⁶na wote wenye mwili wataona wokovu wa Baba yetu."

⁷Basi Yohana akawaambia makutano waliokuja ili kubatizwa naye: "Enyi wazao wa nyoka! Ni nani aliyewaonya kuikimbia ghadhabu itakayokuja? ⁸Basi zaeni matunda yapasayo toba. Wala msianze kujiambia mioyoni mwenu, 'Sisi tunaye Ibrahimu, baba yetu.' Kwa maana nawaambia, Baba yetu aweza kumwinulia Ibrahimu watoto kutoka katika mawe haya. ⁹Tayari shoka limekwisha kuwekwa penye mizizi ya miti; kila mti usiozaa matunda mazuri hukatwa na kutupwa motoni."

¹⁰Makutano wakamwuliza, "Basi tufanyeje?"

¹¹Akawajibu, "Mwenye kanzu mbili na amgawie yule asiye na kitu; naye mwenye chakula na afanye vivyo hivyo."

¹²Watoza ushuru nao wakaja kubatizwa, wakamwuliza, "Mwalimu, tufanyeje?"

¹³"Msitoze zaidi ya kiwango mlichoamriwa," akawaambia.

¹⁴Askari nao wakamwuliza, "Na sisi—tufanyeje?" Akawaambia, "Msimdhulumu mtu kwa nguvu wala kwa kumshtaki kwa uongo; toshekeni na mishahara yenu."

¹⁵Watu walikuwa wakingoja kwa shauku, wote wakiwaza mioyoni mwao kama Yohana mwenyewe ndiye Kristo. ¹⁶Yohana akawajibu wote, "Mimi nawabatiza kwa maji. Lakini yuaja mmoja aliye na nguvu kuliko mimi—sistahili kuilegeza gidamu ya viatu vyake. Yeye atawabatiza kwa Roho Mtakatifu na kwa moto. ¹⁷Pepeo lake li mkononi mwake, naye atausafisha uwanja wake wa kupuria, akusanye ngano ghalani mwake, lakini makapi atayateketeza kwa moto usiozimika."

¹⁸Na kwa maneno mengine mengi ya kuonya, Yohana akawahubiria watu habari njema. ¹⁹Lakini Yohana akamkemea Herode mtawala wa robo kwa habari ya Herodia, mke wa nduguye, na kwa habari ya maovu yote aliyoyafanya Herode, ²⁰Herode akaongeza hili juu ya yote: akamfunga Yohana gerezani.

Baba Amwita Mwanawe Mpendwa

²¹Ikawa watu wote walipokwisha kubatizwa, Yesu naye akabatizwa. Alipokuwa akiomba, mbingu zikafunguka,

²²na Roho Mtakatifu akashuka juu yake kwa umbo la kimwili kama hua. Ikatokea sauti kutoka mbinguni: "Wewe ndiwe Mwanangu mpendwa; nimependezwa nawe."

²³Yesu alikuwa na umri wa kama miaka thelathini alipoanza huduma yake, akidhaniwa kuwa mwana wa Yusufu, mwana wa Eli, ²⁴mwana wa Mathati, mwana wa Lawi, mwana wa Melki, mwana wa Yanai, mwana wa Yusufu, ²⁵mwana wa Matathiya, mwana wa Amosi, mwana wa Nahumu, mwana wa Esli, mwana wa Nagai, ²⁶mwana wa Maathi, mwana wa Matathiya, mwana wa Semein, mwana wa Yoseki, mwana wa Yoda, ²⁷mwana wa Yoanani, mwana wa Resa, mwana wa Zerubabeli, mwana wa Shealtieli, mwana wa Neri, ²⁸mwana wa Melki, mwana wa Adi, mwana wa Kosamu, mwana wa Elmadamu, mwana wa Eri, ²⁹mwana wa Yoshua, mwana wa Eliezeri, mwana wa Yorimu, mwana wa Mathati, mwana wa Lawi, ³⁰mwana wa Simeoni, mwana wa Yuda, mwana wa Yusufu, mwana wa Yonamu, mwana wa Eliakimu, ³¹mwana wa Melea, mwana wa Mena, mwana wa Matatha, mwana wa Nathani, mwana wa Daudi, ³²mwana wa Yese, mwana wa Obedi, mwana wa Boazi, mwana wa Salmoni, mwana wa Nashoni, ³³mwana wa Aminadabu, mwana wa Admini, mwana wa Arni, mwana wa Hesroni, mwana wa Peresi, mwana wa Yuda, ³⁴mwana wa Yakobo, mwana wa Isaka, mwana wa Ibrahimu, mwana wa Tera, mwana wa Nahori, ³⁵mwana wa Serugi, mwana wa Reu, mwana wa Pelegi, mwana wa Eberi, mwana wa Shela, ³⁶mwana wa Kainani, mwana wa Arpakshadi, mwana wa Shemu, mwana wa Nuhu, mwana wa Lameki, ³⁷mwana wa Methusela, mwana wa Henoko, mwana wa Yaredi, mwana wa Mahalaleli, mwana wa Kainani, ³⁸mwana wa Enoshi, mwana wa Sethi, mwana wa Adamu, mwana wa Baba yetu.